14 LEKCIJA

Istaknin o glavna misle

Evr. 8:1

SO TE KERE: Pomožin adalenge so šunena tut polokhe te pratinen tlo govor, hem istaknin sar sekoja glavno misla sikavela koja tani i cel hem i tema e govoreskiri.

SAR TE KERE ADAVA:

Neka ovel tut cel. Razmislin dali e govoreskiri cel tani te informirinel, te uverinel ili te pottikninel e manušen so ka šunen tut hem sprema adava ker tlo govor. Sa o glavna misle valjani te pomožinen tuke te uspejne ko adava.

Džikote spreminea tut, puč tut: „Save pučiba ili prigovorija baši akaja tema šaj te ovel e publika? Kole redoja bi pučena o pučiba?“ Palo adava, vaker o informacie ko adava redo te šaj o manuša lokhe te pratinen len, te haljoven len hem te prifatinen len.
Istaknin i tema e govoreskiri. Džikote ikerea o govor, istaknin i tema adalea so ka povtorine nesave glavna lafija taro govor.
Vaker o glavna misle ko jasno hem ednostavno način. Birin sar glavna misle samo adala soj tane povrzime e temaja hem kola so šaj šukar te objasnine len ko vreme soj tuke dendo. Ma te oven tut but asavke glavna misle, jasno vaker sekoja jekh lendar, ker tikni pauza angleder te vakere i javer hem pohari dža tari jekh glavno misla ki javer.

Te šaj te pomožine adalenge so šunena tut polokhe te pratinen tut, šaj te vakere o glavna misle panda ko uvod. Palo adava, ko krajo taro govor šaj panda jekh puti te vakere o glavna misle te šaj polokhe te pamtinen len.