Trudin tut te sikljove neve bukja džikote proučinea

Džikote spreminaja amen te proučina, šaj te puča amen: „So očekujnava te sikljovav?“ Ama, valjani te pazina te na dozvolina amare očekuvanja te keren te na dikha adava so o Jehova mangela te sikavel amen. Sar šaj te džana so mangela o Jehova te sikavel amen?

Molin tut baši mudrost. Molin e Jehova te pomožinel tut te haljove so mangela te sikljove akana (Jak. 1:5). Ma ov zadovolno samo adalea so više džanea (Izr. 3:5, 6).

Mukh i Biblija te vlijajnel upri tute. „E Devleskoro lafi tano dživdo“ (Evr. 4:12). Adaleske, sekova puti keda čitinaja i Biblija šaj te sikljova nešto nevo hem oj šaj te pomožinel amenge ko različna načinija. Ama, akava šaj te slučinel pe samo ako haljovaja kaj isi bukja so na džanaja len hem kaj šaj te sikljova len taro e Devleskoro Lafi.

Ov blagodarno bašo sa so dobinea tari e Jehovaskiri sofra. O duhovno hajbe so dela amen o Jehova tano sar „gozba taro najšukar hajba“ (Isa. 25:6). Probin te ha čak taro „hajbe“ kova so mislinea kaj nane te svidžinel pe tuke. Adalea ka dozvoline e Devleske te pomožinel tuke te ove pošukar manuš hem ka uživine džikote proučinea!