„Birinen... kaske ka služinen“

1. So mora te kera te šaj te ova čače srekjna, hem soske? (Isaija 48:17, 18).

AMARO DAD soj ko nebo but mangela amen hem mangela te uživina ko životo akana hem ki idnina (Prop. 3:12, 13). Keda ov kergja e manušen dengja len posebna talentija, ama na dengja len sposobnost te vladinen upro javera manuša, a ni palem korkori te odlučinen soj tano ispravno, a soj pogrešno (Prop. 8:9; Erem. 10:23). Ov džanela kaj mora te služina leske hem te živina sprema leskere merilija ako mangaja te ova čače srekjna. (Čitin Isaija 48:17, 18.)

2. So mangela o Satana te verujna hem so kergja o Jehova te šaj te dokažinel kaj o Satana hovavela?

² O Satana mangela te verujna kaj šaj te ova srekjna bizo Jehova, javere lafencar kaj o manuša šaj uspešno te vladinen upro javera manuša (1. Moj. 3:4, 5). Te šaj te dokažinel kaj o Satana hovavela o Jehova dozvolinela e manušenge nesavo vreme te vladinen upro javera manuša. Ama jasno tano kaj o manušikano vladibe na funkcionirinela šukar. Tari javer strana, ki Biblija tane spomnime but murša hem džuvlja kolen so sine len srekjno životo džikote služingje e Jehovaske. O najšukar primer bašo adava tano o Isus Hristos. Ki akaja statija najangle ka dikha taro kola pričine ov biringja te služinel e Jehovaske. Palo adava, ka dikha soske amaro nebesno Dad zaslužinela te obožavina le hem ko krajo ka dikha nekobor pričine soske birinaja te služina e Jehovaske.

SOSKE O ISUS BIRINGJA TE SLUŽINEL E JEHOVASKE

3. So nudingja o Satana e Isuseske hem so biringja o Isus te kerel?

³ Džikote o Isus sine ki phuv mora sine te birinel kaske ka služinel. Kratko otkeda krstingja pe, o Satana vakergja kaj ka del le sa o carstvija ki phuv samo ako perela ko kočaka hem pokloninela pe leske. O Isus odgovoringja: „Naš Satano! Soske pišimo tano: ’E Jehova, tle Devle, mora te obožavine hem samo leske te služine‘“ (Mat. 4:8-10). Soske o Isus angja asavki odluka? Te dikha nekobor pričine.

4-5. Kola tane nesave pričine soske o Isus biringja te služinel e Jehovaske?

⁴ I glavno pričina soske o Isus biringja te služinel e Jehovaske tani o mangipe, le isi le hor mangipe sprema plo Dad so nikogaš našti te čhinavgjovel (Jovan 14:31). Osven adava, o Isus služinela e Jehovaske soske adava tano ispravno (Jovan 8:28, 29; Otk. 4:11). Ov džanela kaj taro Jehova avela o životo, kaj šaj te ovel amen doverba ki leste hem kaj ov tano darežlivo (Ps. 33:4; 36:9; Jak. 1:17). O Jehova sekogaš vakerela sine o čačipe e Isuseske. Osven adava, sa so isi e Isuse dobingja le taro Jehova (Jovan 1:14). O Satana tano skroz porazlično taro Jehova. Ov tano i pričina soske o manuša merena, ov hovavela hem sa so kerela, kerela tari alčnost hem tari sebičnost (Jovan 8:44). Adaleske so o Isus džanlja akava nikogaš ni ki godi na alo leske te ovel sar o Satana hem te buninel pe protiv o Jehova (Fil. 2:5-8).

⁵ Panda jekh pričina soske o Isus biringja te služinel e Jehovaske tani adaleske so razmislinela sine kola šukar bukja ka aven taro adava (Evr. 12:2). Ov džanlja kaj ako ačhola verno ka slavinel ple Dadeskoro anav hem kaj adalea ka šaj te ciden pe sa o muke so angja len o Beng.

SOSKE O JEHOVA ZASLUŽINELA TE OBOŽAVINA LE

6-7. Soske but džene avdive na služinena e Jehovaske, ama soske ov zaslužinela te obožavina le?

⁶ But džene avdive na služinena e Jehovaske adaleske so panda na doznajngje kobor šuže osobine isi le hem nane svesna so sa ov kergja lenge. Agjaar sine hem okolencar kolenge so o apostol Pavle propovedingja ki Atina (Apo. 17:19, 20, 30, 34).

⁷ O Pavle objasningja e manušenge tari Atina kaj o čačutno Devel dela „sarinenge o životo, o dišibe hem sa“. Ov isto agjaar vakergja: „Preku leste isi amen životo, dvižinaja amen hem postojnaja“. O Devel tano Stvoriteli kova so „taro jekh manuš stvoringja sa e narodon“. Adaleske, samo le isi le pravo te obožavina le (Apo. 17:25, 26, 28).

8. So nane nikogaš te kerel o Jehova? Objasnin.

⁸ Adaleske so o Jehova stvoringja celo univerzum hem tano o Najbaro Vladeteli, ov šaj te čhivel e manušen silaja te služinen leske. Ama, ov nikogaš nane te kerel adava. Namesto adava, o Jehova dela amen dokazija kaj postojnela hem kaj but mangela sekole jekhe amendar. Ov mangela kobor so šaj poviše manuša te oven leskere amala hem adava zasekogaš (1. Tim. 2:3, 4). Adaleske, o Jehova obučingja amen te šaj te sikava e javeren baši leskiri namera hem te vakera bašo sa o šukar bukja so ka kerel e manušenge (Mat. 10:11-13; 28:19, 20). Ov organiziringja amen ko sobranija kote so šaj te obožavina le hem te dobina pomoš taro starešine kola so but grižinena pe (Apo. 20:28).

9. Taro so jasno dikhela pe kobor tano baro e Jehovaskoro mangipe?

⁹ Kobor tano baro e Jehovaskoro mangipe jasno šaj te dikhel pe taro način sar postapinela okolencar so na mangena te verujnen kaj ov postojnela. Razmislin bašo akala bukja: Taro početok pa dži akana, milijarde manuša biringje te živinen sprema ple merilija bašo adava soj ispravno, a soj pogrešno. Sepak, o Jehova mangipaja dela len sa adava so valjani lenge bašo životo hem te uživinen ki leste (Mat. 5:44, 45; Apo. 14:16, 17). Ov dengja len sposobnost te keren peske amala, te ovel len familija hem te uživinen ko šukar bukja taro plo trudo (Ps. 127:3; Prop. 2:24). O dokazija jasno sikavena kaj amaro Dad soj ko nebo mangela sa e manušen (2. Moj. 34:6). Akana te dikha nesave pričine soske biringjem te služina e Jehovaske hem sar ov blagoslovinela amen bašo adava.

SOSKE BIRINAJA TE SLUŽINA E JEHOVASKE

10. a) Koja tani i glavno pričina soske služinaja e Jehovaske? (Matej 22:37). b) Sar o Jehova sikavgja kaj tano strplivo tuja? (Psalm 103:13, 14).

¹⁰ Isto sar o Isus, i glavno pričina soske služinaja e Jehovaske tani adaleske so but mangaja le. (Čitin Matej 22:37.) Keda sikljovaja bašo e Jehovaskere osobine amen zamangaja le panda poviše. Na primer, razmislin kobor o Jehova tano strplivo amencar. Keda o Izraelcija na šunena le sine ov molingja len akale lafencar: „Iranen tumen, molinava tumen, taro tumaro lošno drumo“ (Erem. 18:11). O Jehova džanela kaj siem nesovršena, džanela „kaj siem taro pravo“. (Čitin Psalm 103:13, 14.) Keda razmislinea baši e Jehovaskiri strplivost hem bašo leskere javera but šuže osobine, na pottikninela li tut adava te služine leske zasekogaš?

11. Kola tane nesave pričine soske biringjem te služina amare nebesno Dadeske?

¹¹ Panda jekh pričina soske mangaja te služina e Jehovaske, tani adaleske so džanaja kaj adava tano ispravno (Mat. 4:10). Osven adava, džanaja kola šukar bukja šaj te anel amari verno služba. Keda služinaja verno e Jehovaske pomožinaja te slavinel pe leskoro anav, dokažinaja kaj o Beng hovavela hem radujnaja o vilo amare Dadeskoro. Isto agjaar, ako avdive birinaja te služina e Jehovaske isi amen nadež kaj ka služina leske zasekogaš (Jovan 17:3).

12-13. So sikljovaja tari Džejn hem tari Pem?

¹² Panda taro tiknipe šaj te razvina silno mangipe sprema o Jehova — mangipe so ponadari da ka bajrol sar so ka phujrova. Baš adava slučingja pe duje phenjenge so vikinena pe Džejn hem Pem.a I Džejn sine la 11, a i Pem 10 berš keda počmingje te proučinen i Biblija. Iako lengere roditelija na mangle te proučinen, ola mukhle len te proučinen i Biblija e Jehovaskere svedokoncar samo ako sekova vikend džana ki crkva pumare familijaja. I Džejn vakerela: „Adava so sikliljum tari Biblija preku e Jehovaskere svedokija, pomožingja mange te borinav man protiv o pritisok taro vrsnikija te lav droga hem te živinav nemoralno životo sar lende“.

¹³ Palo nekobor berša akala duj čhaja ule objavitelija. Pokasno, ola počmingje e pionersko službaja, a ko isto vreme grižinena pe sine pumare phure roditelenge. I Džejn objasninela sar osetinela pe bašo sa adava so o Jehova kergja baši late: „Taro lično iskustvo uveringjum man kaj o Jehova tano verno, kaj grižinela pe ple amalenge hem sar so pišinela ko 2. Timotej 2:19, ’o Jehova pendžarela okolen soj leskere‘“. Jasno tano kaj o Jehova grižinela pe okolenge so ka birinen te mangen le hem te služinen leske!

14. Sar braninaja e Jehovaskoro anav? (Dikh hem o slike.)

¹⁴ Amen mangaja o manuša te doznajnen kaj o lošna bukja so šungje len bašo Devel tane hovajba. Na primer, zamislin tuke kaj isi tut nesavo paše amal kova soj ljubezno, darežlivo hem spremno tano te prostinel. Jekh dive šunea sar nekoj krivinela tle amale kaj tano lošno hem kaj nane česno. Sar ka reagirine? Sigurno ka branine le. Slično, keda o Satana hem okola upro kaste so ov vlijajnela probinena te kaljaren e Jehovaskoro anav, agjaar so širinena hovajba baši leste, amen revno braninaja le agjaar so vakeraja o čačipe baši leste (Ps. 34:1; Isa. 43:10). Amen sikavaja kaj mangaja te služina e Jehovaske celo dušaja amare lafencar hem amare postapkencar.

15. Save blagoslovija dobingja o apostol Pavle adaleske so kergja bare promene ko plo životo? (Filipjanja 3:7, 8).

¹⁵ Amen spremno keraja promene ko amaro životo te šaj te služina e Jehovaske ko način soj leske prifatlivo ili te šaj te kera poviše ki služba baši leske. Na primer, o apostol Pavle otkažingja pe tari važno položba so sine le ki evrejsko religija te šaj te ovel sledbeniko e Hristoseskoro hem te služinel e Jehovaske (Gal. 1:14). Adaleske sine le but šuže iskustvija ki služba bašo Jehova hem dobingja prilika te vladinel zaedno e Isusea ko nebo. Ov nikogaš na pelo pišmani so biringja te služinel e Jehovaske, a nane te pera pišmani ni amen. (Čitin Filipjanja 3:7, 8.)

16. So sikljovaja taro e Džulijakoro iskustvo? (Dikh hem o slike.)

¹⁶ Ako i služba bašo Jehova tani amenge i najvažno buti ko životo, tegani ka ovel amen srekjno životo akana hem ki idnina. Razmislin bašo primer jekhe phenjakoro so vikinela pe Džulija. Angleder te doznajnel o čačipe, panda sar tikni i Džulija giljavela sine ko hor ki crkva. Oj giljavela sine doborom šukar so počmingja te dobinel obuka te šaj te ovel opersko pejačka. Palo kratko vreme, i Džulija uli but pendžardi hem počmingja te giljavel ko but pendžarde sale bašo koncertija. Džikote sikljola sine ki jekh pendžardi muzičko škola, jekh součeniko počmingja te kerel laja lafi bašo Devel hem objasningja lake kaj e Devleskoro anav tano Jehova. Kratko palo adava, i Džulija počmingja te proučinel i Biblija duj puti ko kurko. Ko krajo, oj odlučingja te del plo vreme hem pli sila e Jehovaske namesto te ovel opersko pejačka. Adaja odluka na sine lokhi. I Džulija vakerela: „But manuša vakergje mange kaj mlo talenti frdingjum le ko pani, ama me mangljum mlo životo celosno te koristinav le te šaj te služinav e Jehovaske“. So mislinela i Džulija avdive baši odluka so angja angleder poviše taro 30 berš? Oj vakerela: „Isi man andruno mir hem sigurno sium kaj ki idnina o Jehova ka ispolninel sa o želbe mle vileskere“ (Ps. 145:16).

PONADARI DA SLUŽIN E JEHOVASKE

17. Sar adava so siem but paše ko krajo vlijajnela upro okola so biringje te služinen e Devleske hem upro okola so na panda na kergje adava?

¹⁷ Živinaja ko vreme keda siem but paše ko krajo. O apostol Pavle pišingja: „Soske, ’samo panda hari‘ hem ka ’resel okova so avela hem nane te kasninel‘“ (Evr. 10:37). Sar akava vlijajnela upri amende? Okola so na služinena e Jehovaske isi len panda hari vreme te birinen te keren adava. Adaleske, valjani te keren o potrebna bukja so šaj posigate (1. Kor. 7:29). A ako više biringjem te služina e Jehovaske, džanaja kaj iako ka valjani te trpina nevolje, adava ka trajnel „samo panda hari“.

18. Ko so pottikninena amen o Jehova hem o Isus?

¹⁸ O Isus na pottikningja ple učenikon samo te počminen te džan pali leste, nego hem te prodolžinen te keren adava (Mat. 16:24). Adaleske, ako više beršencar služinaja e Jehovaske, te ova odlučna te na otkažina amen. Valjani but te trudina amen te šaj te prodolžina te živina sprema i odluka so angjem la te služina e Jehovaske. Šaj nane te ovel lokho, ama panda avdive šaj te ova srekjna hem te oven amen but blagoslovija (Ps. 35:27).

19. So sikljovaja taro Džin?

¹⁹ Nesave mislinena kaj ako služinena e Jehovaske ka našti te uživinen ko životo. Ako sian terno dali mislinea kaj propuštinea nešto adaleske so služinea e Jehovaske? Jekh terno phral so vikinela pe Džin, vakerela: „Mislinava sine kaj adava so sium e Jehovaskoro svedoko but ograničinela man. Dikhjola mange sine kaj but taro čhave kolencar so bariljum uživinena sine adaleske so šaj sine te džan ko zabave, te oven ki vrska ili te khelen nasilna videoigre, a me mora sine te džav ko sostanokija hem ki služba“. Sar akava razmislibe vlijajngja upro Džin? Ov vakerela: „Počmingjum te živinav dvolično životo hem nesavo vreme sine mange interesno. Ama, ustvari na sium sine čače srekjno. Počmingjum te razmislinav bašo adava sar ka koristinel mange ako šunava adava so vakerela i Biblija hem adaleske biringjum te služinav e Jehovaske celo vilea. Ottegani mislinava kaj o Jehova odgovorinela ki sekoja mli molitva“.

20. Ko so valjani te ova odlučna?

²⁰ Jekh psalmisti giljavgja e Jehovaske: „Srekjno tano okova kole so tu ka birine hem kaske so dozvolinea te avel tute paše te šaj te živinel ko tle dvorija“ (Ps. 65:4). Te ova odlučna te dža palo e Isus Navineskoro primer kova so vakergja: „Me hem mli familija ka služina e Jehovaske!“ (Is. Nav. 24:15).