O TERNE PUČENA

Kobor tani važno i popularnost ko socijalna mreže?

Jekh tinejdžerka so vikinela pe Ilejn vakerela: „Keda dikhljum kaj me amala tari škola isi len but amala so sledinena len ko socijalna mreže, mislingjum mange kaj tane but popularna, hem iskreno hari sium sine ljubomorno“.

Dali tu da nekogaš osetingjan tut agjaar? Ako oja, akaja statija ka pomožinel tuke te na pere ki zamka te natprevarine tut te ove popularno ko socijalna mreže.

Kola tane o opasnostija?

Ki Biblija, ko Izreki 22:1 vakerela: „Pošukar tano te birine šukar anav, nego baro barvalipe“. Znači nane pogrešno te mange te ove ko šukar anav, pa čak o javera te mangen tut.

Ama, ponekogaš tli želba te ove prifatimo tani doborom bari, so na sian srekjno ako na sian popularno. Dali adava šaj te ovel opasno? I Anja koja so isi la 16 berš, vakerela kaj adava tano opasno, oj vakerela:

„Dikhljum sar nesave kerena razna glupostija — sar na primer rupinena taro dujto sprati tari škola — samo te šaj te oven popularna“.

Te šaj te privlečinen o vnimanie ple vrsnikongoro, nesave čak sniminena o glupostija so kerena hem adava čhivena ko internet. Na primer, nesave tinejdžerija čhivena videoklipija kote so sikavena sar hana kapsule thojbaske šeja kola so isi len otrovna supstancie — nešto so nikoj na valjani te kerel!

I Biblija vakerela: „Ma keren ništo... tari želba te falinen tumen“ (Filipjanja 2:3; Good News Translation).

Razmislin:

Kobor tani tuke važno i popularnost ko socijalna mreže?
Dali ka rizikujne tlo sastipe hem tlo životo te šaj te privlečine o vnimanie tle vrsnikongoro hem te ove prifatimo lendar?

So vakerena javera terne

„I popularnost ovela opasno keda o manuša tane odlučna te keren sa te šaj te oven popularna. Ola mislinena kaj ako kerena lafi, uravena pe ili ponašinena pe ko odredeno način — čak ako adava tano samo ko socijalna mreže — ka oven popularna. Nane te osetine tut šukar ako kerea nešto soj sprotivno taro tle veruvanja te šaj te ove popularno“ (Liena).

„Hovavni popularnost“

Sepak, o manuša na kerena sekogaš opasna bukja te šaj te oven popularna. I Erika, koja so isi la 22 berš, vakerela kaj nesave manuša koristinena javer taktika:

„O manuša čhivena but slike taro pumaro životo te šaj te dikhen o javera kaj isi len but paše amala kolencar so nakhena but vreme. Agjaar kerena peske hovavni popularnost“.

I Kera, koja so isi la 15 berš, vakerela kaj nesave manuša hovavena ko socijalna mreže te šaj te sikaven kaj tane popularna:

„Dikhljum kaj nesave slikinena pe sar te phene tane ki zabava, a ustvari tane khere“.

O Matej, kole so isi le 22 berš, priznajnela kaj kergja nešto asavko:

„Čhivgjum slika hem sar lokacija označingjum Mont Everest, iako nikogaš na sium sine ki Azija!“

I Biblija vakerela: „Mangaja ko sa o bukja te ova česna“ (Evreija 13:18).

Razmislin:

Ako koristinea socijalna mreže, dali nekogaš čhivgjan nešto so nane čače samo te ove popopularno?
Dali taro slike hem taro komentarija so čhivea len dikhjola pe koj čače sian tu hem soj tuke važno?

So vakerena javera terne

„Nesave manuša šaj te keren sa, samo te dobinen poviše lajkija. Ama, dali mangea te ove pendžardo sar nekoj so kerela lafi hem uravela pe nepristojno hem sar nekoj so falinela pe adalea so isi le? Ili sar nekoj so isi le šukar osobine hem iskreno grižinela pe e javerenge? Šukar tano te džane kaj sian manglo taro javera ama dikh adava te ovel nešto kolea so ka dičine tut“ (Hana).

Kobor tano važno kobor manuša sledinena amen hem kobor lajkija isi amen?

But manuša mislinena kaj, te šaj te oven popularna ko internet, mora te ovel len but manuša so sledinena len hem but lajkija. O Matej, so sine spomnimo angleder, priznajnela kaj ov da mislinela sine agjaar. Ov vakerela:

„Stalno pučava sine e jeveren kobor manuša sledinena len hem kova sine o najbaro broj lajkija so dobingje. Te šaj poviše manuša te sledinen ma, sledinava sine manušen kolen so voopšto na pendžarava hem očekujnava sine ola da te sledinen man. Uljum alčno baši popularnost, a o socijalna mreže samo poviše bajrarena sine adava ki mande“.

Slike: 1. Jekh tinejdžerka dikhela kobor lajkija dobingja hem asala. 2. Jekh čhaj hala tari jekh činija pherdi gudlo. 3. I isto čhaj astarela pe ko vogi hem tani tažno. — I popularnost ko socijalna mreže tani sar gudlo — uživinea džikote haja, ama posle perela tuke muka

I Marija, koja so isi la 25 berš, primetinela kaj nesave manuša mislinena kaj ola vredinena sprema adava kobor manuša sledinena len hem kobor lajkija isi len. Oj vakerela:

„Ako nesave čhaja na dobinena dovolno lajkija bašo pumaro selfi, tegani mislinena peske kaj tane gruba. Džangjola pe, adava tano pogrešno razmislibe, ama but džene reagirinena ko isto način. Ustvari, ola adalea maltretirinena korkori pes“.

I Biblija vakerela: „Te na ova čalmdžie, ma te natprevarina amen jekh jekhea, te na zavidina jekh jekheske“ (Galatjanja 5:26).

Razmislin:

Ako koristinea socijalna mreže, dali primetinea kaj adava pottikninela tut te sporedine tut e javerencar?
Dali tuke považno te oven tut poviše manuša so ka sledinen tut ko socijalna mreže, nego te kere tuke čačutne amala kola so mangena tut?

So vakerena javera terne

„Te šaj te ove popularno ko socijalna mreže mora te ove nekoj kaske so o javera vooduševinena pe, a adava obično značinela te ove sar lende. Akava šaj te čhivel tut previše te ove koncentririmo ko adava sar o javera dikhena ki tute hem so te kere te šaj panda poviše te mangen tut. Normalno tano te mange o javera te mangen tut, ama i želba te ove popularno šaj te kerel te ove opsednimo adalea“ (Džošua).

Arakh tut tari hovavni skromnost

Dali primetingjan kaj nesave manuša kobajagi žalinena pe, ama ustvari mangena te frden čalmi adalea so isi len?

„Otkeda kingjum mange nevo vrda, o manuša non-stop mangena te vozinav len!“
„But nervirinela man adava so sarine falinena man so uspejngjum te slabonav!“

Akala tane primerija baši hovavni skromnost — keda nekoj žalinela pe, a ustvari frdela čalmi.

Predupreduvanje: Keda nekoj falinela pe agjaar, obično adava nervirinela e javeren soske džanena koja tani lengiri namera. Akava poviše nervirinela e manušen nego keda nekoj otvoreno falinela pe.

Javer puti keda ka čhive nesavi slika ili komentari ko socijalna mreže, pazin ma te mukhe vpečatok kaj isi tut hovavni skromnost. Šun o mudro sovet tari Biblija: „Javer neka falinel tut, a na tlo muj“ (Izreki 27:2).