Jekh pretstavniko tari vlada bašo zdravstvo predupredinela kaj o socijalna mreže vlijajnena lošno upro terne — So vakerela i Biblija?

Ko 23 maj 2023 berš, jekh pretstavniko tari vlada bašo zdravstvo kova soj tano taro SAD predupredingja e manušen kaj o socijalna mreže na vlijajnena šukar upro but terne.

• „Iako o socijalna mreže šaj te koristinen nesave čhavenge hem tinejdžerenge, isi but bukja so sikavena kaj ola šaj te vlijajnen but lošno upro emocionalno hem fizičko sastipe e čhavengoro hem e tinejdžerengoro“ (Social Media and Youth Mental Health: The U.S. Surgeon General’s Advisory, 2023).

O pretstavniko tari vlada bašo zdravstvo kergja istražuvanja so sikavena kaj isi pričina te ova sekirime.

• Ko čhave so isi len taro 12 dži ko 15 berš „kola so nakhena poviše tari trin saatija ko dive ko socijalna mreže, isi pobaro rizik te ovel len emocionalna problemija sar soj simptomija baši depresija hem anksioznost“.

• O tinejdžerija so isi len okolu 14 berš hem „nakhavgje but vreme ko socijalna mreže, but puti sine len problemija sojbaja, sine maltretirime preku internet, na sine zadovolna adalea sar izgledinena, mislinena sine kaj na vredinena hem sine len simptomija baši depresija. Akava poviše puti ovela sine ko džuvlja nego ko murša“.

Sar šaj o roditelija te arakhen pumare čhaven taro asavke opasnostija? Ki Biblija isi praktična sovetija.

So šaj te keren o roditelija

Oven ko tek. Sar roditelija, razmislinen save šaj te oven o opasnostija hem odlučinen dali tumaro čhavo ka koristinel socijalna mreže ili na.

• Biblisko načelo: „Sikav e čhave sprema o drumo koleste so valjani te džal“ (Izreki 22:6).

• Te šaj te doznajnen nešto poviše, čitinen i statija „Da li moje dete treba da koristi društvene mreže?“.

Ako mukhena tumare čhave te koristinel socijalna mreže, oven svesna save šaj te oven o opasnostija hem oven ko tek adalea so kerela tumaro čhavo ko internet. Sar šaj te pomožinen leske?

Arakhen tumare čhave taro lošna sodržine. Sikaven tumare čhave sar te pendžarel hem te izbeginel o lošna sodržine.

• Biblisko načelo: „Blud hem sekova melalipe ili alčnost ni ma te spomninel pe maškar tumende... a isto agjaar bezobrazno ponašibe, lafija soj vakerde bizo te mislinel pe, hem bezobrazna šale“ (Efešanja 5:3, 4).

• Šaj te arakhen praktična sovetija ki statija „Pomozite tinejdžeru da pametno koristi društvene mreže“.

Čhiven granice. Na primer, čhiven pravilija bašo adava keda hem kobor vreme tumaro čhavo šaj te koristinel socijalna mreže.

• Biblisko načelo: „Šukar pazinen sar živinena — na sar okola so nane mudra, nego sar okola soj mudra. Šukar koristinen tumaro vreme“ (Efešanja 5:15, 16).

• Koristinen i poučno animacija Pametno koristin o socijalna mreže te šaj te pomožinen tumare čhaveske te haljol soske tano važno te čhiven pe granice.