Bilionija trošime ki vojna — koja tani i čačutni cena?

But pare tane trošime bašo vojne.

• „Lani o vlade ko celo sveto trošingje 2,2 bilionija dolarija bašo nekobor vojne. Adava tano najviše pare so dži akana sine trošime bašo vojne“ (The Washington Post, 13 fevruari 2024).

I cena so platinela pe baši jekh vojna tani but poviše nego samo pare. Ake jekh primer: I vojna ki Ukraina.

• Vojnikija. Sprema nesave procenke, skoro 500.000 vojnikija sine mudarde ili ranime otkeda počmingja i vojna angleder duj berš.

• Civilija. Sprema o Obedineta nacie, poviše taro 28.000 tane mudarde ili povredime. Ama jekh baro službeniko taro ON vakergja: „Našti te proceninel pe kobor manušengere životija sine uništime ki akaja vojna“.a

O muke so o manuša cidena taro vojne hem konfliktija ko celo sveto tane but bari cena so ola platinena la.

• 114 milionija — o broj taro manuša so mora sine te selinen pe bašo vojne ili nasilstvo ko celo sveto dži ko septemvri 2023 berš.

• 783 milionija — o broj taro manuša kola so ačhona bokhale. „O konfliktija panda tane i najbari pričina bašo bokhalipe, 70 otsto taro manuša so ačhona bokhale ko celo sveto, živinena ko podračja kote so isi vojne hem nasilstvo“ (Svetsko programa baši hrana).

Dali nekogaš ka završinen o vojne? Šaj li te nadina amen kaj ka ovel mir? Dali nekogaš ka avel vreme keda nane te oven čorole manuša hem sarine ka uživinen ko adava so bijanela i phuv hem ka ovel dovolno hajbaske? So vakerela i Biblija?

Vreme keda ka oven vojne

I Biblija prorokujngja kaj ko celo sveto ka oven vojne hem ola tane pretstavime jekhe javačea ko gras.

• „Hem iklilo jekh javer gras lole bojaja. Leskere javačeske sine dendo te lel o mir tari phuv te šaj o manuša te mudaren pe jekh jekhea. Hem sine leske dendo baro mači“ (Otkrovenie 6:4).

Pali leste džana duj javera javačija so pretstavinena o bokhalipe hem o meribe kova so avela taro zarazna nasvalipa hem javera pričine (Otkrovenie 6:5-8). Te šaj te doznajne poviše bašo akava biblisko proroštvo hem soske šaj te ova sigurna kaj ispolninela pe ko amare dive, dikh i statija „Što pretstavuvaat četirite javači?“

Panda hari ka ovel mir

Panda hari, o pare ko celo sveto nane te koristinen pe bašo vojne. Ama akava nane te kerel jekh manuš. I Biblija vakerela:

• O Devel ka čhinavel „o vojne ki celi phuv“ (Psalm 46:9).

• O Devel ka cidel o lošna posledice taro vojne. „Ka kosel sekoja asvin taro lengere jakhja, hem meribe nane te ovel više, ni žalibe, ni rojbe, ni dukha. Sa so sine angle, nakhlja“ (Otkrovenie 21:4).

• O Devel ka anel trajno mir sarinenge. „Mlo narodo ka živinel ko thana kote so isi mir, ko thana kote soj bezbedna hem ko thana kote so nikoj nane te voznemirinel len“ (Isaija 32:18).

Sprema o bibliska proroštvija o vojne hem o javera nastanija so ovena avdive sikavena kaj panda hari ka ovel mir.

Sar o Devel ka anel mir? Ov ka kerel adava preku pli nebesno vlada, javere lafencar o Carstvo (Matej 6:10). Te šaj te doznajne soj tano akava Carstvo hem so značinela akava tuke, dikh o kratko video Soj e Devleskoro Carstvo?