Dali isi stabilno vlada so šaj te vladinel e svetoja? — So vakerela i Biblija?

Ko vlade ko celo sveto slučinena pe bukja so voznemirinena e manušen. Čak ko phuvja kolende so izgledinena kaj o vlade tane stabilna, o političarija kerena bukja so anena ladž, isi izborija kote so isi but tikni razlika ko glasija, politička podelbe hem gragjanska nemirija.

I Biblija vakerela kaj isi jekh vlada koja soj tani stabilno. Šaj više angleder šungjan baši akaja vlada. La o Isus Hristos spomningja la ki pli najpendžardi molitva.

„A tumen molinen tumen agjaar: ’Amaro Dad so sian ko nebo, te falinel pe tlo sveto anav. Te avel tlo Carstvo. Te ovel tli volja, sar ko nebo agjaar ki phuv da“ (Matej 6:9, 10).

So vakerela i Biblija bašo adava Carstvo?

O Carstvo tano stabilno vlada

O Carstvo vladinela taro nebo.

O Isus baši akaja vlada vakergja kaj tano „nebesno Carstvo“ (Matej 4:17; 5:3, 10, 19, 20). Adaleske ov vakergja: „Mlo Carstvo nane delo taro akava sveto“ (Jovan 18:36).

O Carstvo ka vladinel ko than e manušikane vladenge.

I Biblija vakerela: „Adava Carstvo... ka uništinel hem ka čhinavel sa o [manušikane] carstvija, a korkori ov ka ačhovel zasekogaš“ (Daniel 2:44).

O Carstvo, koleste so o Isus Hristos tano Cari, nikogaš nane te ovel uništimo.

I Biblija vakerela: „Leskiri vlast tani večno, koja so nikogaš nane te nakhel, hem leskoro carstvo nikogaš nane te ovel uništimo“ (Daniel 7:13, 14).

O Carstvo ka anel mir hem sigurnost ki phuv.

I Biblija vakerela: „Sekova jekh ka bešel teli pli drakh hem teli pli smokva hem nikoj nane te daravkerel len“ (Mihej 4:4).

Sikljov poviše bašo Carstvo

Keda o Isus sine ki phuv, ov but vreme nakhavgja ko propovedibe „o šukar haberi bašo Carstvo“ (Matej 9:35). Ov isto agjaar prorokujngja:

„Akava šukar haberi bašo Carstvo ka propovedinel pe ko celo sveto, te šaj o manuša taro sa o narodija te šunen le, hem tegani ka avel o krajo“ (Matej 24:14).

Avdive, o šukar haberi bašo Carstvo vakerela pe ko poviše taro 240 phuvja. Pottikninaja tut poviše te doznajne baši akaja vlada hem sar koristinela tuke lakoro vladibe.

Molinaja tut dikh o videoklipi Soj e Devleskoro Carstvo?