O TERNE PUČENA
Soske valjani te molinav man?
Sprema jekh anketa, 80 posto taro tinejdžerija ki Amerika molinena pe, ama samo ekvaš lendar molinena pe sekova dive. Sigurno nesave lendar pučena pe: „Dali i molitva tani samo jekh način te oslobodine tut taro stres ili, palem, vklučinela nešto poviše“?
Soj tani i molitva?
I molitva tani čačutno razgovor amare Stvoritelea kova so kergja sa. Zamislin so značinela adava! Iako o Jehova tano pobaro taro manuša ko sekova pogled, ov „nane dur nikastar amendar“ (Dela 17:27). Ustvari, i Biblija pottikninela amen: „Oven paše e Devlea, hem ov ka ovel paše tumencar“ (Jakov 4:8).
Sar šaj te ove paše e Devlea?
Jekh način tano preku i molitva — agjaar tu kerea lafi e Devlea
Javer način tano preku o proučibe e Biblijakoro — agjaar o Devel „kerela lafi“ tuja.
Asavki komunikacija taro solduj džene — i molitva hem o proučibe e Biblijakoro — ka pomožinel tuke te ovel tut zoralo amalipe e Devlea.
„Te kere lafi e Jehovaja, e Najbarea ko celo univerzum, tani i najbari čest so šaj te ovel jekhe manuše“ (Džeremi).
„Keda ki molitva vakerava e Jehovaske mle najhor čuvstvija, ovava popaše lea“ (Miranda).
Dali o Devel šunela amen?
Šaj verujnea ko Devel, pa čak molinea tut leske, a sepak na sian celosno uverimo kaj šunela tut. Ama, i Biblija vakerela kaj o Jehova tano „adava so šunela o molitve“ (Psalm 65:2). Oj pottikninela amen: „Sa tumaro pharipe frden leske“. Soske? „Soske ov grižinela pe tumenge“ (1. Petrovo 5:7).
Razmislin: Sigurno odvojnea vreme redovno te kere lafi tle paše amalencar. Šaj te kere adava e Devlea da. Redovno molin tut leske agjaar so ka koristine leskoro lično anav, Jehova (Psalm 86:5-7; 88:9). I Biblija vakerela: „Molinen tumen sekogaš“ (1. Solunjanite 5:17).
„I molitva tani razgovor kote so vakerava mle nebesno Dadeske sa so isi man ko vilo“ (Mojzes).
„Kerava lafi e Jehovaja bašo sa, čak bašo najtikne bukja, isto sar so bi kerava lafi me dajaja ili nesave paše amalinkaja“ (Karen).
Bašo so te molinav man?
I Biblija vakerela: „Ko sa — molitvaja, molbaja hem blagodaribaja — vakeren e Devleske so rodena“ (Filipjanite 4:6).
Dali adava značinela kaj šaj te molina amen bašo amare problemija da? Oja! Ki Biblija pišinela: „Frde tlo pharipe e Jehovaske, hem ov ka pomožinel tut“ (Psalm 55:22).
Džangjola pe, keda molinea tut e Devleske, na valjani te kere lafi samo bašo tle problemija. „Ako rodava e Jehova samo keda nešto valjanela mange, savo amalipe tano adava?“, vakerela jekh čhaj koja so vikinela pe Šantel. „Mislinava kaj najangle valjani te zablagodarinav man leske, hem na samo baši jekh buti, nego bašo poviše.“
Razmislin: Bašo kola bukja sian blagodarno? Bašo kola trin bukja so slučingje pe avdive šaj te zablagodarine tut e Jehovaske?
„Čak nešto ednostavno, sar jekh šuži luludi, šaj te pottikninel amen te zablagodarina amen e Jehovaske ki molitva“ (Anita).
„Razmislin bašo stvorime bukja kola so posebno svidžinena pe tuke ili bašo nesavo biblisko stiho kova so pogodinela tlo vilo, hem palo adava zablagodarin tut e Jehovaske“ (Brajan).