Savi garancija dela o Jehova kaj i phuv ka ovel raj?

1. Savo haberi vakergja o proroko o Isaija e Izraelconge?

O PROROKO o Isaija vakerela kaj o Jehova tano o „Devel e čačipaskoro“. O lafi soj prevedimo sar „čačipa“ bukvalno značinela „amin“ (Isa. 65:16). „Amin“ značinela „neka ovel agjaar“ ili „čače tano agjaar“. Keda o lafi „amin“ koristinela pe ki Biblija povrzimo e Jehovaja ili e Isusea, adava tano garancija kaj nešto tano čače. Znači, o Isaija manglja te vakerel e Izraelconge kaj sekogaš keda o Jehova prorokujnela nešto, adava ovela čače. Ustvari, o Jehova dokažingja adava adalea so ispolninela sekova jekh taro ple vetuvanja.

2. Soske šaj te ovel amen doverba ko e Jehovaskere vetuvanja baši idnina, hem bašo kola pučiba ka kera lafi?

² Dali šaj te ovel amen i isto doverba kaj ka ispolninen pe e Jehovaskere vetuvanja baši idnina? Okolu 800 berša palo Isaija, o apostol Pavle objasningja soske šaj te ova sigurna kaj e Devleskere vetuvanja sekogaš ispolninena pe. O Pavle vakergja: „O Devel našti te hovavel“ (Evr. 6:18). Isto sar so taro jekh izvor našti te thavdel londalo pani hem pani pijbaske, agjaar o Jehova, o izvor e čačipaskoro, našti te hovavel. Adaleske šaj te ovel amen doverba ko sa so vakerela o Jehova, kote soj vklučime hem o vetuvanja baši amari idnina. Ki akaja statija ka dikha akala pučiba: So vetingja o Jehova kaj ka del amen ki idnina? Hem sar o Jehova uverinela amen kaj adava so vetingja čače ka ovel?

SO VETINGJA O JEHOVA?

3. a) Kova vetuvanje tano posebno skapoceno e Devleskere narodoske? (Otkrovenie 21:3, 4). b) Sar reagirinena nesave keda vakeraja lenge bašo akava vetuvanje?

³ O vetuvanje baši koleske ka kera lafi tano but skapoceno sa e Devleskere slugenge. (Čitin Otkrovenie 21:3, 4.) O Jehova vetinela kaj ka avel vreme keda „meribe nane te ovel više, ni žalibe, ni rojbe, ni dukha“. But džene amendar čitinaja akava vetuvanje ki služba keda mangaja te objasnina savo ka ovel o životo ko raj. Sar reagirinena nesave manuša keda šunena akava vetuvanje? Ola šaj ka vakeren: „Akate but šukar pišinela, ama na verujnava kaj akava ka ovel čače“.

4. a) Keda dengja o Jehova o vetuvanje bašo raj, so džanlja? b) Osven so dengja o vetuvanje, so javer kergja o Jehova?

⁴ Keda o Jehova vodingja e Jovane te pišinel akava vetuvanje bašo raj, ov džanlja kaj ko amaro vreme ka vakera akaja nadež e javerenge keda ka propovedina o šukar haberi. Isto agjaar o Jehova džanlja kaj ka ovel pharo bute manušenge te verujnen kaj asavke promene ka slučinen pe ki idnina (Isa. 42:9; 60:2; 2. Kor. 4:3, 4). Tegani, sar šaj te uverina e javeren, hem korkori amen, kaj o blagoslovija soj pišime ko Otkrovenie 21:3, 4 ka ispolninen pe? O Jehova na samo so dengja akava but šužo vetuvanje, ov isto agjaar dengja silna pričine soske šaj te verujna ki leste. Kola pričine dengja amen?

O JEHOVA DELA GARANCIJA KAJ LESKORO VETUVANJE KA ISPOLNINEL PE

5. Kola pričine isi amen te ovel amen doverba ko e Jehovaskoro vetuvanje bašo raj, hem kote šaj te arakha le?

⁵ Ko sledna stihija so ka čitina arakhaja silna pričine te ovel amen doverba ko e Jehovaskoro vetuvanje bašo raj. Adari pišinela: „Okova so bešela ko prestol vakergja: ’Dikh! Kerava sa o bukja neve!‘ Isto agjaar vakergja: ’Pišin, soske ko akala lafija šaj te verujnel pe hem tane čačutne!‘ Hem ov vakergja mange: ’Ola ispolningje pe! Me sium alfa hem omega, o početok hem o krajo‘“ (Otk. 21:5, 6a).

6. Soske o lafija taro Otkrovenie 21:5, 6 bajrarena amari doverba ko e Jehovaskoro vetuvanje?

⁶ Soske akala bibliska stihija bajrarena amari doverba ko e Devleskoro vetuvanje? O lil Otkrovenie — paše tano o baro krajo! bašo akala stihija pišinela: „Akava tano isto sar te phene o Jehova lično potpišingja e verna manušenge garancija ili potvrda bašo akala idna blagoslovija“.b E Devleskoro vetuvanje pišimo tano ko Otkrovenie 21:3, 4. Ama ko 5-to hem ko 6-to stiho, sar te phene o Jehova čhivgja plo potpis kolea so garantirinela kaj ka ispolninel pe leskoro vetuvanje. Akana te dikha pošukar kole lafencar o Jehova garantirinela amenge kaj ka ispolninel plo vetuvanje.

7. Koj počminela te kerel lafi ko 5-to pasus, hem soske akava tano posebno?

⁷ E Devleskiri garancija počminela e lafencar: „Okova so bešela ko prestol vakergja“ (Otk. 21:5a). Akala lafija tane posebna soske ko lil Otkrovenie o Jehova kerela samo trin puti lično lafi, a akava tano jekh taro adala trin situacie. Znači akaja garancija na dela amen nesavo mokjno angeli, čak ni o voskresnimo Isus, nego lično o Jehova! Akava panda poviše bajrarela amari doverba ko lafija taro Otkrovenie 21:5, 6. Soske? Adaleske so o Jehova „našti te hovavel“ (Tit 1:2).

„DIKH! KERAVA SA O BUKJA NEVE“

8. So vakerela o Jehova te šaj te istakninel kaj ka ispolninel plo vetuvanje? (Isaija 46:10)

⁸ Palo adava, o Jehova vakerela: „Dikh!“ (Otk. 21:5). O grčko lafi soj amende prevedimo sar „dikh!“ tano koristimo but puti ko lil Otkrovenie. Jekh priračniko bašo akava lafi vakerela kaj koristinela pe „te šaj te vakerel okoleske so čitinela kaj valjani posebno te pazinel ko adava so ka vakerel pe sledno“. A so sine o sledno so vakergja o Devel? Ov vakergja: „Kerava sa o bukja neve“. Točno tano kaj o Jehova kerela lafi bašo promene so ka kerel len ki idnina. Ama adaleske soj doborom sigurno kaj ka ispolninel pe akava vetuvanje, ov bašo adala promene vakerela kaj više slučinena pe. (Čitin Isaija 46:10.)

9. a) So značinena o lafija „ka kerav sa o bukja neve“? b) So ka slučinel pe e avdisutne „neboja“ hem „phuvjaja“?

⁹ Te dikha o sledna lafija so arakhljovena ko Otkrovenie 21:5: „Kerava sa o bukja neve“. So značinela akava? Ko akava biblisko poglavje, akale lafencar mislinela pe ko duj bukja so ka kerel o Jehova — ov ka meninel hem ka obnovinel. Prvo, te dikha so ka meninel o Jehova. Ko Otkrovenie 21:1 čitinaja: „O purano nebo hem i purani phuv nane više“. O „purano nebo“ tane o politička vlade upri kolende so vlijajnela o Satana hem leskere demonija (Mat. 4:8, 9; 1. Jov. 5:19). Keda ki Biblija koristinela pe o lafi „phuv“ šaj te mislinel pe ko manuša (1. Moj. 11:1; 1. Let. 16:31). Sprema akava, i „purani phuv“ tane o lošna manuša avdive. O Jehova nane samo te kerel nesave promene ko akava „nebo“ hem „phuv“, nego skroz ka cidel len. Ov ka zameninel len e neve neboja hem e neve phuvjaja, adava značinela kaj ka ovel nevi vlada koja so ka vladinel upro pravedna manuša.

10. So ka kerel o Jehova nevo?

¹⁰ Ko Otkrovenie 21:5, ponadari čitinaja so vakerela o Jehova bašo bukja so ka kerel len neve. Primetin kaj o Jehova na vakergja: „Ka kerav sa neve bukja“. Namesto adava ov vakerela: „Ka kerav sa o bukja neve“. O Jehova ka kerel i phuv hem e manušen sar neve hem ka anel len dži ko sovršenstvo. Isto sar so prorokujngja o Isaija, o Jehova ka kerel i phuv jekh but šužo than slično sar i edensko gradina. Isto agjaar sekova jekh amendar ka ovel obnovimo, javere lafencar celosno sasljardo. O sakatija, o korole hem o kašuke ka oven saste hem čak o mule ka oven irame ko životo (Isa. 25:8; 35:1-7).

„KO AKALA LAFIJA ŠAJ TE VERUJNEL PE HEM TANE ČAČUTNE... OLA ISPOLNINGJE PE!“

11. So vakergja o Jehova e Jovaneske te kerel, hem soske?

¹¹ So javer tano delo tari e Devleskiri garancija? O Jehova vakergja e Jovaneske: „Pišin, soske ko akala lafija šaj te verujnel pe hem tane čačutne!“ (Otk. 21:5). O Jehova na zapovedingja leske samo te pišinel, nego vakergja leske hem i pričina. Ov vakergja: „Ko akala lafija šaj te verujnel pe hem tane čačutne“. Adava značinela kaj šaj te ovel amen doverba ko e Devleskere lafija hem kaj tane točna. Siem blagodarna so o Jovan šungja i zapoved te pišinel adava so vakergja leske o Jehova. Adaleske amen šaj te čitina e Devleskoro vetuvanje bašo raj hem te razmislina bašo šuže blagoslovija so adžikerena amen ki idnina.

12. Soske o Jehova šaj te vakerel: „Ola ispolningje pe“?

¹² So vakerela ponadari o Devel? „Ola ispolningje pe!“ (Otk. 21:6). Akate o Jehova kerela lafi sar te phene sa o bukja so vetingja len bašo raj više ispolningje pe. Ustvari, le isi le pravo te vakerel agjaar soske ništo našti te čhinavel le te ispolninel pli namera. Palo adava o Jehova vakerela panda nešto so uverinela amen kaj leskoro vetuvanje čače ka ispolninel pe. Soj tano adava?

„ME SIUM ALFA HEM OMEGA“

13. Soske o Jehova vakergja: „Me sium alfa hem omega“?

¹³ Sar so vakergjem angleder, o Jehova trin puti lično kergja lafi ko vizie so dengja e Jovaneske (Otk. 1:8; 21:5, 6; 22:13). Ko sotrin prilike o Jehova vakergja o isto: „Me sium alfa hem omega!“ I bukva alfa tani i prvo bukva tari grčko azbuka, a omega i posledno. Adalea so koristinela o bukve alfa hem omega, o Jehova pomožinela amen te haljova kaj keda počminela nešto, ov sigurno ka završinel adava.

14. a) Vaker primer keda o Jehova vakergja ki nesavi smisla „alfa“ hem keda ka vakerel „omega“? b) Koja garancija arakhaja ki 1. Mojseeva 2:1-3?

¹⁴ Otkeda o Jehova stvoringja e Adame hem e Eva, ov vakergja lenge savi namera isi le e manušencar hem e phuvjaja. Ki Biblija pišinela: „O Devel blagoslovingja len hem vakergja lenge: ’Te ovel tumen pherdo čhave hem te oven but džene, pheren i phuv hem vladinen upri late‘“ (1. Moj. 1:28). Keda o prvo puti vakergja pli namera, o Jehova sar te phene vakergja „alfa“. Ka avel vreme keda e Adameskere hem e Evakere poslušna hem sovršena potomcija ka pheren i phuv hem ka keren la raj. Tegani o Jehova sar te phene ka vakerel „omega“. Otkeda završingja stvoribaja o nebo hem i phuv hem sa soj ki lende, o Jehova vakergja nešto soj sar garancija. Adava tano pišimo ki 1. Mojseeva 2:1-3. (Čitin.) O Jehova odvojngja o eftato dive sar sveto. So značinela akava? Akava značinela kaj ov posvetingja o eftato dive te šaj te ispolninel pli namera e manušencar hem e phuvjaja. Leskiri namera celosno ka ispolninel pe dži ko krajo taro adava dive.

15. Soske šaj o Satana mislingja kaj uspejngja te čhinavel e Devle ki pli namera?

¹⁵ Otkeda o Adam hem i Eva buningje pe, ola ule grešna hem agjaar o grevo hem o meribe khuvgja ko lengere čhave (Rim. 5:12). Adaleske šaj dikhjola sine kaj o Satana uspejngja te ruminel e Devleskiri namera te pherel i phuv sovršena hem poslušna manušencar. Dali o Satana uspejngja te čhinavel e Jehova nekogaš te vakerel „omega“? Šaj mislingja peske kaj e Jehova nane le but opcie. Jekh opcija sine o Jehova te uništinel e Adame hem e Eva hem te stvorinel javer sovršeno pari kolea so ka ispolninel pli namera. Ama te kerel sine adava, o Satana ka šaj sine te vakerel kaj o Devel hovavela. Soske? Adaleske so o Jehova, sar soj pišimo ki 1. Mojseeva 1:28, vakergja kaj e Adameskere hem e Evakere čhave ka pheren i phuv.

16. Soske šaj o Satana mislingja kaj o Jehova nane te uspejnel te ispolninel pli namera?

¹⁶ Koja javer opcija šaj o Satana mislingja peske kaj ačhili e Devle? Šaj mislingja kaj o Jehova ka dozvolinel e Adameske hem e Evake te ovel len čhave kola so nikogaš nane te oven sovršena (Prop. 7:20; Rim. 3:23). Ko adava slučaj o Beng ka šaj sine te vakerel kaj o Jehova na uspejngja ki pli namera — i phuv te ovel sovršena manušencar.

17. Sar uspejngja o Jehova te rešinel o problemi e Satanaja hem e prva manušencar, hem so ka slučinel pe ko krajo? (Dikh hem i slika.)

¹⁷ O Satana nikogaš našti sine te pretpostavinel so ka kerel o Jehova. E Jehova sine le o najšukar rešenie sar te ispolninel pli namera, iako o Satana, o Adam hem i Eva buningje pe (Ps. 92:5). O Jehova dozvolingja e Adameske hem e Evake te ovel len čhave, agjaar ačhilo ko plo lafi hem dokažingja kaj na hovavela. Isto agjaar, o Jehova sikavgja kaj ništo našti te čhinavel te ispolninel pli namera. Ov kergja sa te šaj te ispolninel la agjaar so preku jekh „potomstvo“ ka spasinel e poslušna čhaven so avena taro Adam hem i Eva (1. Moj. 3:15; 22:18). O Satana nikogaš na očekujngja kaj o Jehova ka rešinel akaja situacija ko asavko način. Soske? Adaleske so i otkupnina temelinela pe ko nesebično mangipe (Mat. 20:28; Jovan 3:16). Asavki osobina našti te arakha ko Satana soske ov tano sebično. Znači, so ka slučinel pe adaleske soj dendi i otkupnina? Ko krajo taro milja berša kote so ka vladinel o Hristos, o sovršena hem o poslušna manuša so avena taro Adam hem i Eva ka živinen ko raj ki phuv, baš sar so sine e Jehovaskiri namera ko početok. Tegani o Jehova sar te phene ka vakerel „omega“.

SAR BAJRARAJA AMARI DOVERBA KO E JEHOVASKORO VETUVANJE BAŠO RAJ?

18. Kola trin garancie dela amen o Devel? (Dikh hem i ramka „Trin pričine soske šaj te ovel amen doverba ko e Jehovaskoro vetuvanje“.)

¹⁸ Ki akaja statija dikhlem nekobor pričine soske šaj te ova sigurna kaj i phuv ka ovel raj. So šaj te vakera e javerenge te šaj te uverina len kaj akava ka ovel čače? Prvo, o Jehova lično dengja akava vetuvanje. Ko lil Otkrovenie pišinela: „Okova so bešela ko prestol vakergja: ’Dikh! Kerava sa o bukja neve‘“. Le isi le mudrost, sila hem želba te ispolninel plo vetuvanje. Dujto, o Jehova tano doborom sigurno kaj ka ispolninel pe akava vetuvanje so kerela lafi sar te phene više ispolningja pe. Ov vakergja: „Ko akala lafija šaj te verujnel pe hem tane čačutne!... ola ispolningje pe“. Trito, ništo našti te čhinavel e Jehova te završinel adava so počmingja, adaleske ov vakergja: „Me sium alfa hem omega“. O Jehova ka dokažinel kaj o Satana tano hovavno hem kaj na uspejngja te čhinavel e Jehova te ispolninel pli namera.

19. So šaj te kere keda e manušenge tano pharo te verujnen ko e Devleskoro vetuvanje bašo raj?

¹⁹ Ma bistre, sekogaš keda vakerea e javerenge savi garancija dela o Jehova kaj ka ispolninel ple vetuvanja, adalea tu panda poviše bajrarea tli doverba ko leskere vetuvanja. Znači, keda o sledno puti ka čitine nekaske o šužo vetuvanje bašo raj so arakhljola ko Otkrovenie 21:4 hem ov vakerela tuke: „Akate but šukar pišinela, ama na verujnava kaj akava ka ovel čače“, tegani so šaj te kere? Šaj te čitine hem te objasnine o 5-to hem o 6-to stiho. Objasnin savi garancija dengja o Jehova kaj ka ispolninel plo vetuvanje adalea so, sar te phene, čhivgja plo potpis (Isa. 65:16).