O Jehova ka pomožinel tut ko problemija so na očekujngjan len

1. Ko so siem uverime?

SAR e Jehovaskoro narodo džanaja kaj ov mangela amen hem kaj mangela te ovel amen o najšukar životo (Rim. 8:35-39). Isto agjaar siem uverime kaj keda primeninaja o bibliska načelija adava tano bašo amaro šukaripe (Isa. 48:17, 18). Ama sar valjani te reagirina ako isi amen problemija so na očekujngjem len?

2. Save problemija šaj te oven amen hem so šaj te puča amen?

² Sa e Jehovaskere sluge isi len problemija. Na primer, šaj nekoj tari familija razočaringja amen. Šaj isi amen nesavo seriozno nasvalipe so čhinavela amen te kera poviše ki služba bašo Jehova. Šaj panda osetinaja o posledice tari jekh prirodno katastrofa. Ili šaj siem progonime baši amari vera. Keda doživinaja asavko nešto šaj ka puča amen: „Soske slučinela pe baš mange akava? Dali kergjum nešto pogrešno? Dali akava sikavela kaj nane man e Jehovaskoro blagoslov?“ Dali nekogaš osetingjan tut agjaar? Ako oja, ma obeshrabrin tut. But taro e Jehovaskere verna sluge osetingje pe slično sar tute (Ps. 22:1, 2; Avak. 1:2, 3).

3. So šaj te sikljova taro Psalm 34:19?

³ Čitin Psalm 34:19. Primetin duj važna bukja soj pišime ko akava stiho: 1) E pravedna manušen ka ovel len nevolje. 2) O Jehova spasinela amen taro amare nevolje. Sar spasinela amen o Jehova? Jekh način tano agjaar so pomožinela amenge te haljova kaj amaro životo avdive nane te ovel bizo problemija. Adava so o Jehova vetinela amenge kaj ka ova radosna džikote služinaja leske na značinela kaj panda akana ka ovel amen životo bizo sekiracie (Isa. 66:14). O Jehova mangela te ovel amen šukar životo, adaleske ohrabrinela amen te koncentririna amen ki idnina keda ka uživina ko životo zasekogaš (2. Kor. 4:16-18). Dži tegani ov pomožinela amenge ponadari da te služina leske (Plač 3:22-24).

4. Bašo so ka kera lafi ki akaja statija?

⁴ Akana te dikha so šaj te sikljova taro verna sluge e Jehovaskere taro purano vreme hem taro amaro vreme. Sar so ka dikha šaj ka oven amen problemija so na očekujnaja len. Ama ako isi amen doverba ko Jehova tegani ov sekogaš ka ovel amencar (Ps. 55:22). Džikote dikhaja akala primerija, puč tut: „So bi kerava me ki jekh slično situacija? Sar akala primerija bajrarena mli doverba ko Jehova? Kola pouke šaj te primeninav ko mlo životo?“

KO PURANO VREME

5. Save problemija kergja o Lavan e Jakoveske? (Dikh i slika tari naslovno strana.)

⁵ E Jehovaskere sluge taro purano vreme doživingje problemija so na očekujngje len. Te dikha o primer e Jakoveskoro. Leskoro dad vakergja leske te lel peske romni taro e Lavaneskere čhaja, kova so sine leske familija hem služinela sine e Jehovaske. Leskoro dad uveringja le kaj ako kerela adava o Jehova but ka nagradinel le (1. Moj. 28:1-4). Adaleske o Jakov kergja adava. Ov taro Hanaan gelo ko kher e Lavaneskoro kaste so isi le duj čhaja — i Lija hem i Rahela. O Jakov zaljubingja pe ki e Lavaneskiri potikni čhaj ki Rahela hem sine spremno te kerel buti efta berš lakere dadeske te šaj te lel la (1. Moj. 29:18). Ama na ulo agjaar sar so zamislingja peske o Jakov. O Lavan na ikergja pe ko plo lafi. Namesto te del e Rahela ov dengja ple pobare čhaja e Lija. Ov dozvolingja e Jakoveske palo jekh kurko te lel e Rahela da ama samo ako kerela leske buti panda efta berš (1. Moj. 29:25-27). Isto agjaar meningja but puti o dogovorija so kerela sine e Jakovea. O Lavan 20 berš iskoristingja e Jakove (1. Moj. 31:41, 42).

6. Save javera problemija doživingja o Jakov?

⁶ O Jakov istrajngja ko javera da problemija. Le sine le bari familija, ama leskere čhave na nakhena sine sekogaš šukar maškar peste. Ola čak bikingje pumare phrale e Josife sar robo. Isto agjaar, duj taro leskere čhave, o Simeon hem o Levi, angje ladž upri familija hem e Jehovaskere anaveske. Pokraj sa adava, e Jakoveskiri mangli romni i Rahela muli džikote bijanela sine e dujto čhave. Hem adaleske so sine baro bokhalipe, o Jakov ko ple phure berša mora sine te selinel pe ko Egipet (1. Moj. 34:30; 35:16-19; 37:28; 45:9-11, 28).

7. Sar o Jehova sikavgja kaj tano zadovolno taro Jakov?

⁷ Iako doživingja sa akala problemija o Jakov nikogaš na našavgja pli vera ko Jehova hem ko leskere vetuvanja. A o Jehova sikavgja leske kaj tano zadovolno lestar. Na primer, iako o Lavan na ponašingja pe lea šukar, o Jehova dengja e Jakove but ko materijalno pogled. Isto agjaar o Jakov sine but blagodarno e Jehovaske keda palem dikhlja ple čhave e Josife, kaske so but vreme mislingja kaj tano mulo. Adava so o Jakov sine paše amal e Jehovaja pomožingja leske te istrajnel ko sa o nevolje so sine le (1. Moj. 30:43; 32:9, 10; 46:28-30). Keda siem paše e Jehovaja tegani amen da šaj uspešno te ikljova ko krajo e problemencar so na očekujngjem len.

8. So manglja o cari o David te kerel?

⁸ O cari o David našti sine te kerel sa so mangela ki služba bašo Jehova. Na primer, e Davide sine le bari želba te gradinel o hrami bašo Devel. Ov vakergja adava e prorokoske e Nataneske. O Natan vakergja leske: „Ker sa so pašljola tuke ko vilo, soske o čačutno Devel tano tuja“ (1. Let. 17:1, 2). Akala lafija sigurno but ohrabringje e Davide. Ov verojatno odma počmingja te kerel planija bašo adava baro proekti.

9. Sar reagiringja o David ko adava so vakergja leske o Natan?

⁹ Kratko palo adava, e Jehovaskoro proroko vakergja nešto e Davideske so šaj sine te razočarinel le. Adaja rat, o Jehova vakergja e Nataneske kaj nane o David te gradinel o hrami, nego jekh taro leskere čhave (1. Let. 17:3, 4, 11, 12). Sar reagiringja o David keda šungja adava? Ov prilagodingja pe. Koncentriringja pe ko adava te khedel pare hem o bukja so ka valjanen leskere čhaveske, e Solomoneske, bašo proekti (1. Let. 29:1-5).

10. Sar o Jehova nagradingja e Davide?

¹⁰ Kratko otkeda vakergja e Davideske kaj nane te kerel o hrami, o Jehova kergja lea sojuz. Ov vetingja leske kaj nekoj taro leskoro potomstvo ka vladinel zasekogaš (2. Sam. 7:16). Ko nevo sveto džikote trajnena o milja berša kote so ka vladinel o Isus, o David but ka radujnel pe keda ka doznajnel kaj o Cari o Isus avela tari leskiri familija. Akava izveštaj pomožinela amenge te haljova kaj čak ako našti te kera sa so mangaja ki služba bašo Jehova, amaro Devel šaj te nagradinel amen ko način so nikogaš na očekujngjem.

11. Sar o hristijanja taro prvo veko sine nagradime iako o Carstvo na alo ko vreme keda ola očekujngje? (Dela 6:7).

¹¹ O hristijanja taro prvo veko soočingje pe pharipaja so na očekujngje. Na primer, ola edvaj adžikerena sine e Devleskoro Carstvo te avel ama na džanle keda ka slučinel pe adava (Dela 1:6, 7). So kergje džikote adžikerena sine? Ola sine zafatime e propovedibaja. Džikote propovedinena sine ko poviše thana, ola šaj sine te dikhen sar o Jehova nagradinela lengoro trudo. (Čitin Dela 6:7.)

12. So kergje o hristijanja taro prvo veko keda sine bokhalipe?

¹² Palo nesavo vreme sine baro bokhalipe ki celo phuv (Dela 11:28). O bokhalipe pogodingja isto agjaar e hristijanen taro prvo veko. Šaj li zamislinea tuke sar adava vlijajngja upri lende? O poglavarija sigurno sekiringje pe sar ka grižinen pe baši pumari familija. A sar osetingje pe o terne kola so planiringje poviše te džan ki služba? Dali mislingje peske kaj mora te otkažinen pe tari pumari cel? Ola prilagodingje pe sprema ple okolnostija. Ponadari da propovedinena sine kobor so šaj hem delinena sine sa so sine len e javere phralencar hem phenjencar tari Judeja (Dela 11:29, 30).

13. Save blagoslovija dobingje o hristijanja džikote trajngja o bokhalipe?

¹³ Save blagoslovija dobingje o hristijanja džikote trajngja o bokhalipe? Okola so dobingje materijalno pomoš osetingje e Jehovaskiri poddrška (Mat. 6:31-33). Sigurno osetingje pe paše okolencar so pomožingje lenge. Ama okola da so dengje pare ili pomožingje ko jekh javer način osetingje i radost so avela taro dejbe (Dela 20:35). O Jehova nagradingja sarinen so prilagodingje pe ko neve okolnostija.

14. So slučingja pe e Varnavaske hem e apostol Pavleske, hem savo sine o rezultati? (Dela 14:21, 22).

¹⁴ But puti o hristijanja taro prvo veko sine progonime. Ponekogaš čak keda ni hari na očekujngje adava. Te dikha so slučingja pe e Varnavaske hem e apostol Pavleske džikote propovedinena sine ki Listra hem ko okolna thana. Ko početok o manuša ljubezno dodžakergje len hem spremno šungje len. Ama pokasno o protivnikija kergje o narodo te ovel protiv o Pavle hem nesave lendar kamenujngje e Pavle hem mukhle le te merel (Dela 14:19). Ama o Varnava hem o Pavle prodolžingje te propovedinen ko jekh javer than. Savo sine o rezultati? Ola kergje but učenikija hem lengere lafija hem primer ohrabringja e javere hristijanen. (Čitin Dela 14:21, 22.) Bute dženen sine len korist taro adava so o Varnava hem o Pavle na otkažingje pe taro propovedibe iako taro jekh puti sine progonime. Sa džikote na otkažinaja amen tari služba so doveringja amenge o Jehova, amen ka ova blagoslovime.

KO AMARO VREME

15. So sikliljan taro primer e phraleskoro Mekmilan?

¹⁵ Angleder 1914-to berš, e Jehovaskere sluge očekujngje nešto te slučinel pe. Te dikha o primer jekhe phraleskoro so vikinela pe Aleksandar Mekmilan. Sar but džene ko adava vreme, akava da phral mislingja kaj panda hari ka džal ko nebo. Ko jekh govor so ikergja le ko septemvri 1914-to berš, ov vakergja: „Akava govor verojatno ka ovel mlo posledno“. Džangjola pe akava na sine leskoro posledno govor. Pokasno o phral Mekmilan pišingja: „Verojatno nesave džene amendar sigate alem ko zaklučok kaj odma ka dža ko nebo“. Ov ponadari vakerela: „Adava so valjani te kera tano te ačhova zafatime ki služba“. O phral Mekmilan sine verno hem ačhilo revno ki pli služba. Šaj sine te ohrabrinel bute phralen so sine ko zatvor adaleske so sine neutralna. Ov sine revno hem redovno džala sine ko sostanokija čak keda sine phuro. Sar e phraleske Mekmilan koristingja adava so ačhilo zafatimo duhovna aktivnostencar, džikote adžikerela sine pli nagrada? Ko 1966-to berš kratko angleder te merel ov pišingja: „Mli vera tani zorali sar nikogaš angleder“. Kobor šukar stavi kova so valjani amen da te ovel amen, posebno ako istrajnaja poviše nego so mislingjem (Evr. 13:7).

16. So na očekujngje te slučinel pe o phral Herbert Dženings hem leskiri romni? (Jakov 4:14).

¹⁶ But sluge e Jehovaskere isi len problemija e sastipaja kola so na očekujngje len. Na primer, ko plo iskustvo o phral Herbert Dženings objasningja sar ov hem leskiri romni uživingje džikote služingje sar misionerija ki Gana.b Ama palo nesavo vreme arakhle leske seriozno nasvalipe so kerela bare promene ko raspoloženie. O phral Dženings citiringja o lafija taro Jakov 4:14 hem objasningja kaj leskiri nevi situacija tani sar jekh „tajsutno dive“ kova so na očekujngja te avel. (Čitin.) Ov pišingja: „Valjani sine te dikha realno ki amari situacija, adaleske gelem amenge tari Gana hem mukhlem amare paše amalen hem irangjem amen ki Kanada [baši medicinsko terapija]“. O Jehova pomožingja e phraleske Dženings hem leskere romnjake ponadari da te služinen leske verno iako sine len pharipa.

17. Sar koristingja e javerenge o primer e phraleskoro Dženings?

¹⁷ O iskustvo e phraleskoro Dženings but pomožingja e javeren. Jekh phen pišinela: „Taro akava iskustvo sium sine ohrabrimi sar nikogaš angleder. Keda čitingjum kaj o phral Dženings mora sine te mukhel ple zadače te šaj te grižinel pe bašo plo sastipe, adava pomožingja man te dikhav ispravno ki mli situacija“. A jekh phral pišinela: „Sium sine starešina deš berš, ama mora sine te čhinavav adale službaja adaleske so nasvaliljum. Adava doborom razočaringja man so našti sine te čitinav iskustvija kote so kerela pe lafi bašo bukja so postigninela len e Jehovaskoro narodo. Ama i istrajnost e phraleskiri Dženings but ohrabringja man“. Akava sikavela amenge kaj keda istrajnaja ko problemija so na očekujngjem len, tegani ohrabrinaja e javeren da. Čak ako ko životo na džala sa sar so mangaja, ponadari da šaj te ova šukar primer baši vera hem istrajnost (1. Pet. 5:9).

18. Sar soj sikavdo ki slika, so sikljovea taro primer e udovicakoro tari Nigerija?

¹⁸ I pandemija KOVID–19 vlijajngja upro but džene taro e Jehovaskoro narodo. Na primer, jekhe udovica tari Nigerija sine la but hari hajbaske hem pare. Jekh sabaj lakiri čhaj pučlja la so ka han otkeda ka spreminen o posledno hajbe so sine len. Amari phen vakergja pe čhajake kaj na ačhilo len ni pare ni hajbe hem kaj valjani te džan palo primer e udovicakoro tari Sarepta, te spreminen o posledno hajbe hem te ovel len celosno doverba ko Jehova (1. Car. 17:8-16). Angleder te počminen te razmislinen bašo adava so ka han ručkoske, ola dobingje kesa bute bukjencar taro phralja. Ki kesa sine dovolno hajbaske so šaj sine lea te nakhen poviše taro duj kurke. I phen vakergja kaj na sine svesno kobor vnimatelno o Jehova šungja la džikote vakergja adala lafija ple čhajake. Čače, keda isi amen doverba ko Jehova, o problemija so na očekujngjem len ko amaro životo ustvari šaj te keren amen popaše lea (1. Pet. 5:6, 7).

19. Savo progonstvo doživingja o Aleksej Jeršov?

¹⁹ Ko berša so nakhle, but taro amare phralja hem phenja istrajngje ko progonstvo kova so na očekujngje kaj ka ovel len. Te dikha o primer e phraleskoro Aleksej Jeršov, kova so živinela ki Rusija. Keda o phral Jeršov krstingja pe ko 1994-to berš, e Jehovaskoro narodo ki adaja phuv na sine progonimo. Pokasno i situacija ki Rusija meningja pe. Ko 2020-to berš, ko kher e phraleskoro Jeršov kergje pretres hem lele lestar but bukja so sine le. Nekobor masekija pokasno, i vlada obviningja le bašo kriminal. Soj panda pološno, adava obvinenie sine temelimo ko jekh video taro jekh manuš kova so poviše taro jekh berš glumingja kaj mangela te proučinel i Biblija. Akaja sine but lošno postapka!

20. Sar o phral Jeršov ulo popaše e Jehovaja?

²⁰ Dali e phrale Jeršov sine le nesavi korist tari akaja situacija? Oja, ov ulo popaše e Jehovaja. Ov vakerela: „Me hem mi romni molinaja amen sine but počesto. Haliljum kaj na bi šaj sine te istrajnav ki akaja situacija bizo e Jehovaskiri pomoš. I lično studija pomožingja mange te na ovav obeshrabrimo. Razmislingjum bašo verna sluge taro purano vreme. Ki Biblija isi but izveštaija so istakninena kobor tano važno te ačhova smirime hem te sikava doverba ko Jehova“.

21. So siklilem ki akaja statija?

²¹ So siklilem ki akaja statija? Ko akava sveto ponekogaš šaj te oven amen problemija so na očekujnaja len. Ama čak te ova ki asavki situacija, ako isi amen doverba ko Jehova ov sekogaš ka pomožinel amenge. Sar so pišinela ko amaro glavno stiho: „But nevolje isi e pravedniko, ama o Jehova spasinela le tari sekoja“ (Ps. 34:19). Adaleske ponadari da te koncentririna amen ki e Jehovaskiri bari mokj, a na ko amare problemija. Tegani isto sar o apostol Pavle amen da šaj te vakera: „Sa šaj te kerav soske pomožinela mange okova so dela man sila“ (Fil. 4:13).