Sar šaj te ove sigurno kaj o Jehova tano zadovolno tutar?

1. Save čuvstvija šaj mučinena sine nesave verna slugen e Jehovaskere?

BUT ohrabrinela amen adava so džanaja kaj o Jehova tano zadovolno taro plo narodo sar grupa! Ki Biblija pišinela: „O Jehova radujnela pe ple slugenge“ (Ps. 149:4). Ama, ponekogaš nesave tane doborom but obeshrabrime so šaj pučena pe: „Dali o Jehova tano zadovolno mandar lično?“ Bute verna slugen e Jehovaskere taro purano vreme ponekogaš mučinena len sine asavke čuvstvija (1. Sam. 1:6-10; Jov 29:2, 4; Ps. 51:11).

2. Kas o Jehova odobrinela?

² I Biblija jasno sikavela kaj o nesovršena manuša šaj te oven odobrime taro Devel. Sar? Mora te sikava vera ko Isus Hristos hem te krstina amen (Jovan 3:16). Agjaar anglo javera sikavaja kaj kaingjem amen bašo amare grevija hem kaj vetingjem e Devleske kaj ka kera leskiri volja (Apo. 2:38; 3:19). O Jehova tano but radosno keda keraja akala bukja te šaj te ova paše amala lea. Sa džikote daja amendar sa te šaj te živina sprema amaro zavet, ka ovel amen e Jehovaskoro odobruvanje hem ov ka dikhel ki amende sar ple paše amala (Ps. 25:14).

3. Kola trin pučiba ka dikha ki akaja statija?

³ Ama, soske ponekogaš nesave šaj mislinena kaj o Jehova na odobrinela len? Sar o Jehova sikavela kaj odobrinela amen? Hem sar jekh hristijani šaj te ovel sigurno kaj isi le e Devleskoro odobruvanje?

SOSKE NESAVE MISLINENA KAJ O JEHOVA NANE ZADOVOLNO LENDAR

4-5. Ko so šaj te ova uverime čak ako mislinaja kaj na vredinaja?

⁴ But džene amendar panda taro tiknipe mislinena kaj na vredinena (Ps. 88:15). Jekh phral so vikinela pe Edrien vakerela: „Sekogaš mislinava sine kaj na vredinava. Setinava man kaj panda sar tikno molinava man sine mli familija te živinel ko raj, iako sium sine sigurno kaj me na sium dovolno šukar te šaj te ovav adathe“. O Toni kova so barilo ki familija kola so nane Svedokija vakerela: „Mle roditelija nikogaš na vakerena mange sine kaj mangena man ili kaj dičinena pe mancar. Adaleske mislinava sine kaj sa so kerava nane dovolno šukar“.

⁵ Ako ponekogaš mislinaja kaj na vredinaja, šukar tano te setina amen kaj korkori o Jehova privlečingja amen ki peste (Jovan 6:44). Ov dikhela o šukar bukja ki amende kola so šaj amen korkori na dikhaja len hem ov džanela so čače isi amen ko vilo (1. Sam. 16:7; 2. Let. 6:30). Adaleske, šaj te verujna le keda ov vakerela amenge kaj siem skapocena (1. Jov. 3:19, 20).

6. Sar osetinela pe sine o apostol Pavle bašo ple grevija so kergja len angleder?

⁶ Angleder te doznajnen o čačipe, nesave amendar kergje bukja baši kolende so šaj panda osetinena pe kriva (1. Pet. 4:3). Javera kola so verno služinena e Jehovaske šaj panda borinena pe pogrešna želbencar. Sar tano tuja, dali tlo vilo osudinela tut bašo nešto? Ako oja, šaj te utešinel tut adava so ka džane kaj javera da verna sluge e Jehovaskere borinena pe sine slična čuvstvoncar. Na primer, o apostol Pavle sine but razočarimo keda razmislinela sine bašo ple slabostija (Rim. 7:24). Džangjola pe, o Pavle kaingja pe bašo ple grevija hem krstingja pe. Sepak, baši peste vakergja kaj tano „najtikno taro apostolija“ hem kaj tano najbaro grešniko (1. Kor. 15:9; 1. Tim. 1:15).

7. So na valjani te bistra keda kerela pe lafi bašo grevija so kergjem len angleder?

⁷ Amaro nebesno Dad vetingja kaj ka prostinel amenge ako kainaja amen (Ps. 86:5). Znači, ako amenge čače žal bašo grevija so kergjem len, šaj te ovel amen doverba kaj o Jehova ka ačhol ko plo lafi hem ka prostinel amenge (Kol. 2:13).

8-9. Sar šaj te cida amendar i misla kaj nikogaš našti te kera dovolno te šaj te ugodina e Jehovaske?

⁸ Sarine amen mangaja te služina e Jehovaske ki pobari mera. Sepak, nesave mislinena kaj nikogaš našti te keren dovolno te šaj o Jehova te ovel lendar zadovolno. Jekh phen so vikinela pe Amanda vakerela: „Obično mislinava kaj te dav mlo najšukar e Jehovaske značinela sekogaš te kerav nešto poviše. But puti korkori mandar očekujnava te dav but poviše taro adava so čače šaj te dav. Palo adava, keda našti te kerav adava so očekujnava mislinava kaj o Jehova tano razočarimo mandar isto sar so sium me“.

⁹ Sar šaj te cida amendar i misla kaj nikogaš našti te kera dovolno te šaj te ugodina e Jehovaske? Ma bistre kaj o Jehova nane kruto, ov tano razumno hem na očekujnela poviše taro adava so šaj te kera. Ov ceninela sa adava so keraja baši leste sa džikote daja leske amaro najšukar. Isto agjaar, razmislin bašo nesave ličnostija tari Biblija kola so služingje e Jehovaske celo vilea. Na primer, razmislin bašo Pavle. Ov revno služinela sine beršencar, agjaar so patujnela sine but kilometre hem kerela sine but sobranija. Ama dali o Jehova na sine više lestar zadovolno keda leskere okolnostija meningje pe hem našti sine poviše te propovedinel sar angleder? Na. Ov ponadari da kerela sine adava so šaj hem o Jehova blagoslovingja le (Apo. 28:30, 31). Slično tano amencar da, kobor šaj te da e Jehovaske zavisinela taro amare okolnostija, a adava šaj te meninel pe. Ama leske tano najvažno taro savo motivi keraja adava. Akana te dikha nekobor načinija sar o Jehova sikavela kaj tano zadovolno amendar.

SAR O JEHOVA SIKAVELA KAJ TANO ZADOVOLNO AMENDAR?

10. Sar šaj te „šuna“ e Jehova sar vakerela amenge kaj mangela amen hem ceninela amen? (Jovan 16:27).

¹⁰ Preku i Biblija. O Jehova rodela načinija te šaj te sikavel ple slugenge kaj mangela len hem kaj tano zadovolno lendar. Ki Biblija tane pišime duj situacie keda o Jehova vakergja e Isuseske kaj mangela le hem kaj kerela le radosno (Mat. 3:17; 17:5). Dali mangea te šune e Jehova sar vakerela tuke kaj tano zadovolno tutar? Amen našti doslovno te šuna e Jehovaskoro glaso, ama ov kerela amencar lafi preku i Biblija. Amen šaj te „šuna“ sar o Jehova vakerela amenge kaj tano zadovolno amendar keda čitinaja o lafija e Isuseskere soj pišime ko evangelija. (Čitin Jovan 16:27.) O Isus sovršeno sikavela sine o osobine ple Dadeskere. Adaleske keda čitinaja sar o Isus vakerela ple učenikonge kaj mangela len hem ceninela len, šaj te zamislina amenge sar o Jehova vakerela adala lafija amenge (Jovan 15:9, 15).

11. Ako isi amen nevolje dali adava značinela kaj o Jehova nane zadovolno amendar? (Jakov 1:12).

¹¹ Preku leskere postapke. O Jehova but mangela te pomožinel amen. Na primer, ov grižinela pe bašo amare materijalna potrebe. Ama, ponekogaš o Jehova šaj te dozvolinel te slučinen pe amenge lošna bukja sar so sine e pravedno Jovea (Jov 1:8-11). O nevolje na sikavena kaj o Devel nane više zadovolno amendar. Namesto adava, ola dena amen prilika te sikava kobor but mangaja e Devle hem kobor bari doverba isi amen ki leste. (Čitin Jakov 1:12.) Džikote nakhaja taro adala nevolje ka dikha sar o Jehova grižinela pe amenge hem sar poddržinela amen džikote pomožinela amen te istrajna.

12. So šaj te sikljova taro Dmitrij?

¹² Razmislin bašo Dmitrij, jekh phral tari Azija. Ov ačhilo bizi buti hem poviše masekija našti sine te arakhel javer buti. Adaleske, odlučingja te bajrarel pli služba hem adalea te sikavel kaj isi le doverba ko Jehova. Nakhle but masekija a ov panda našti sine te arakhel buti. Palo adava but nasvalilo so čak našti sine te uštel taro kreveti. Ov počmingja te mislinel peske kaj nane više šukar rom hem dad, hem pučela pe sine dali o Jehova panda tano zadovolno lestar. Palo adava, jekh rat, leskiri čhaj ko listo printingja o lafija taro Isaija 30:15: „Ačhoven smirime hem sikaven doverba, adava ka ovel tumari sila!“ Oj geli ko leskoro kreveti dengja le o listo hem vakergja: „Tato, keda nane te osetine tut šukar šaj te setine tut ko akava stiho“. O Dmitrij halilo kaj leskere familija isi la panda so te hal, so te uravel hem kaj te živinel adaleske so o Jehova pomožinela len. Ov vakerela: „Adava so valjani sine te kerav, sine te ačhovav smirimo hem ponadari da te ovel man doverba ko mlo Devel“. Ako tu da isi tut slično problemi, šaj te ovel tut doverba kaj o Jehova grižinela pe tuke hem kaj ka pomožinel tut te istrajne.

13. Preku kaste o Jehova šaj te sikavel amenge kaj tano zadovolno amendar, hem sar?

¹³ Preku o phralja hem o phenja. O Jehova koristinela amare phralen hem phenjen te šaj te sikavel amenge kaj tano zadovolno amendar. Na primer, ov šaj te pottikninel e javeren te ohrabrinen amen baš keda adava valjani amenge. Akava doživingja jekh phen tari Azija keda sine ko pharo periodi. Oj ačhili bizi buti hem but nasvalili. Palo adava lakoro rom kergja seriozno grevo hem poviše našti sine te služinel sar starešina. Oj vakerela: „Našti sine te haljovav soske akava slučinela pe mange. Mislinava sine kaj šaj kergjum nešto pogrešno hem kaj o Jehova nane više zadovolno mandar“. Amari phen molingja e Jehova taro vilo te uverinel la kaj isi la leskoro odobruvanje. Sar o Jehova sikavgja lake adava? Oj objasninela: „O starešine kergje mancar lafi hem pomožingje mange te dikhav kaj o Jehova panda mangela man“. Palo nesavo vreme oj palem molingja e Jehova te pomožinel lake. Oj vakerela: „O isto dive dobingjum jekh pismo tari jekh grupa phralja hem phenja taro sobranie. Džikote čitinava sine lengere ohrabruvačka lafija, osetingjum kaj o Jehova šungja mli molitva“. Oja, o Jehova but puti sikavela kaj tano zadovolno amendar preku e javerengere ljubezna lafija (Ps. 10:17).

14. Ko kova javer način o Jehova sikavela kaj tano zadovolno amendar?

¹⁴ Isto agjaar, o Jehova sikavela amenge kaj tano zadovolno amendar agjaar so koristinela e phralen hem e phenjen te šaj te del amen sovet keda adava valjani. Na primer, ko prvo veko, vodimo taro Devel o apostol Pavle pišingja 14 pismija ple phralenge. Ko adala pismija ov dengja len direktno sovet, ama ko jekh ljubezno način. Soske o Jehova vodingja e Pavle te del asavko sovet? O Jehova tano šukar Dad kova so „ukorinela ple čhaven“ kolen so mangela len (Izr. 3:11, 12). Znači ako nekoj dela amen sovet kova so temelinela pe ki Biblija, adava na značinela kaj o Jehova nane više zadovolno amendar, ustvari adava sikavela kaj o Jehova panda mangela amen (Evr. 12:6). So javer sikavela amenge kaj o Jehova tano zadovolno amendar?

JAVERA DOKAZIJA KAJ O JEHOVA TANO ZADOVOLNO AMENDAR

15. Kaske o Jehova dela plo sveti duh, hem ko so uverinela amen adava?

¹⁵ O Jehova dela plo sveti duh okolenge kastar soj zadovolno (Mat. 12:18). Šaj te puča amen: „Dali sikavava nesave osobine so avena taro sveti duh ko mlo životo?“ Dali primetingjan kaj akana sian postrplivo nego angleder te pendžare e Jehova? Ustvari, kobor poviše sikljovea te sikave o osobine taro sveti duh, doborom pouverimo ka ove kaj o Jehova tano zadovolno tutar. (Dikh i ramka „O osobine so avena taro sveti duh tane...“)

16. Kas o Jehova koristinela te šaj te vakerel o šukar haberi, hem sar osetinea tut bašo adava? (1. Solunjanja 2:4).

¹⁶ Panda jekh način sar o Jehova sikavela kaj tano zadovolno nekastar tano agjaar so dela le i zadača te vakerel o šukar haberi. (Čitin 1. Solunjanja 2:4.) Primetin sar jekhe phenjake so vikinela pe Džoselin koristingja adava so kerela e javerencar lafi bašo šukar haberi. Jekh dive, keda uštili taro sojbe i Džoselin osetinela pe sine razočarimi. Oj vakerela: „Na sine man sila hem mislinava sine kaj na sium korisno. Ama, sium sine pioneri hem adava dive valjani sine te ikljovav ki služba. Adaleske molingjum man hem geljum ki služba“. Adava sabaj i Džoselin zapoznajngja jekhe ljubezno romnja i Meri, koja so prifatingja te proučinel i Biblija. Nekobor masekija pokasno, i Meri vakergja kaj keda i Džoselin khuvgja lake ko udar oj ko adava momenti molinela pe sine e Devleske te pomožinel la. So siklili i Džoselin taro akava iskustvo? Oj vakerela: „Adava sine sar ka phene o Jehova vakerela mange: ‘Me sium zadovolno tutar‘“. Džangjola pe, nane sekoj te mangel te šunel o haberi so propovedinaja le. Ama, šaj te ova uverime kaj o Jehova radujnela pe keda dikhela kaj daja amendar sa te šaj te vakera o šukar haberi e javerenge.

17. So sikljovea taro adava so vakergja i Viki baši otkupnina? (Psalm 5:12).

¹⁷ O Jehova pomožinela okolenge kastar soj zadovolno te ovel len korist tari otkupnina (1. Tim. 2:5, 6). Ama, so ako amaro vilo panda nane uverimo kaj o Jehova tano zadovolno amendar, iako isi amen vera ki otkupnina hem krstingjem amen? Ma bistre, našti sekogaš te ovel amen doverba ko amare čuvstvija, ama šaj te ovel amen doverba ko Jehova. Okola so isi len vera ki otkupnina tane pravedna anglo leskere jakhja hem ov vetinela kaj ka blagoslovinel len. (Čitin Psalm 5:12; Rim. 3:26.) Jekhe phenjake so vikinela pe Viki, pomožingja adava so razmislinela sine baši otkupnina. Jekh dive, otkeda hor razmislingja baši otkupnina, oj halili jekh važno buti: „Taro jekh puti haliljum kaj o Jehova tano but vreme mancar strplivo, a me sar te phene vakerava leske: ‘Tlo mangipe nane doborom baro te šaj te mange man. I žrtva tle čhaveskiri našti te učharel mle grevija‘“. Otkeda razmislingja kobor baro poklon tani i otkupnina, oj počmingja te osetinel kobor o Jehova mangela la. Džikote razmislinaja baši otkupnina amen da šaj te osetina kaj o Jehova mangela amen hem ka uverina amen kaj tano zadovolno amendar.

18. Ko so šaj te ova uverime ako ponadari da mangaja amare nebesno Dade?

¹⁸ Iako šaj but ka trudina amen te primenina akala predlogija tari akaja statija, sepak ponekogaš šaj te osetina amen obeshrabrime hem te puča amen dali o Jehova tano zadovolno amendar. Ako slučinela pe tuke akava, ma bistre kaj ov odobrinela „okolen so ponadari da mangena le“ (Jak. 1:12). Adaleske, ponadari da ov paše e Jehovaja hem primetin ko kola načinija o Jehova sikavela tuke kaj tano zadovolno tutar. Sekogaš neka ovel tut ki godi kaj o Jehova „nane dur nikastar amendar“ (Apo. 17:27).