2. Sar o uslovija ko sveto hem o manuša meningje pe taro 1914 berš?

E Isuseskere učenikija pučle le: „Kova ka ovel o znako baši tli prisutnost hem bašo krajo akale svetoskoro?“ (Matej 24:3). Ko odgovor, o Isus vakergja but bukja so ka slučinen pe otkeda ka počminel te vladinel ko nebo sar Cari ko e Devleskoro Carstvo. Ov vakergja kaj ka oven vojne, bokhalipa, zemjotresija hem javera bukja. (Čitin Matej 24:7.) Isto agjaar, i Biblija prorokujngja kaj o životo ko „posledna dive“ ka ovel „but pharo“ adaleske so o manuša ka oven lošna (2. Timotej 3:1-5). Sa akala bukja počmingje sa poviše te oven hem jasno te dikhen pe taro 1914 berš.

3. Soske o uslovija ko sveto ule doborom lošna otkeda počmingja te vladinel e Devleskoro Carstvo?

Kratko otkeda o Isus ulo Cari ko e Devleskoro Carstvo, ov vodingja vojna protiv o Satana hem o demonija. O Satana našavgja ki adaja vojna. I Biblija vakerela: „[O Satana] sine frdimo ki phuv, a zaedno lea sine frdime leskere angelija da“ (Otkrovenie 12:9, 10, 12). Ov tano but holjamo soske džanela kaj ka ovel uništimo. Adaleske kerela ko celo sveto te ovel lošnipe hem muke. Na čudinela amen so o uslovija ko sveto tane doborom lošna! Ama, e Devleskoro Carstvo ka rešinel sa akala problemija.