LEKCIJA 26
Soske isi lošnipe hem muke?
Keda slučinena pe nesave tragedie normalno tano te puča amen: „Soske slučinena pe asavke bukja?“ Kobor siem bahtale so i Biblija dela jasno odgovor ko akava pučibe!
1. Sar o Satana kergja te ovel lošnipe ko sveto?
O Satana buningja pe protiv o Devel. Ov manglja te vladinel upro javera, adaleske vlijajngja upro prva manuša, o Adam hem i Eva, ola da te buninen pe protiv o Devel. Te šaj te uspejnel ko adava, ov vakergja hovajbe e Evake (1. Mojseeva 3:1-5). Ov kergja oj te mislinel kaj o Jehova na mangela te del la nešto šukar hem kaj o manuša ka oven pobahtale ako na šunena e Devle. Adalea so vakergja e Evake kaj nane te merel, o Satana vakergja o prvo hovajbe. Adaleske i Biblija vakerela kaj o Satana tano „hovavno hem dad e hovajbaskoro“ (Jovan 8:44).
2. So odlučingje te keren o Adam hem i Eva?
O Jehova sine but darežlivo e Adamea hem e Evaja. Ov vakergja kaj šaj te han taro sekova kaš ki Edensko gradina osven taro jekh (1. Mojseeva 2:15-17). Sepak, ola odlučingje te han baš taro adava kaš koleske so o Jehova vakergja te na han. I Eva lelja taro kaš „hem halja“. Palo adava, o Adam da „halja“ (1. Mojseeva 3:6). Ola solduj na šungje e Devle. Adaleske so ola sine sovršena, lenge sine prirodno te keren adava soj ispravno, a na adava soj neispravno. Ama, keda svesno hem namerno odlučingje te na šunen e Devle ola sikavgje kaj na mangena više ov te vakerel lenge so te keren. Adaja odluka angja lenge bare muke (1. Mojseeva 3:16-19).
3. Sar vlijajngja e Adameskiri hem e Evakiri odluka upri amende?
Keda o Adam hem i Eva grešingje, ola ule nesovršena. Adaleske so siem lengere potomcija nasledingjem lendar i nesovršenost. Bašo Adam i Biblija vakerela: „Preku jekh manuš o grevo khuvgja ko sveto hem preku o grevo o meribe, hem agjaar o meribe širingja pe ko sa o manuša“ (Rimjanite 5:12).
Amen cidaja muke taro različna pričine. Ponekogaš cidaja muke adaleske so angjem lošna odluke. Ponekogaš cidaja muke adaleske so o javera angje lošna odluke. A ponekogaš cidaja muke adaleske so siem ko pogrešno than hem ko pogrešno vreme. (Čitin Propovednik 9:11.)
DOZNAJN POVIŠE
Dikh soske o Devel nane odgovorno bašo lošnipe hem o muke so isi avdive ko sveto hem dikh sar ov osetinela pe keda amen cidaja muke.
4. Koj tano odgovorno bašo amare muke?
But džene verujnena kaj o Devel vladinela akale svetoja. Ama, dali adava tano čače? Dikh o VIDEOKLIPI.
Čitin Jakov 1:13 hem 1. Jovanovo 5:19, a palo adava keren lafi bašo akava pučibe:
Dali o Devel tano odgovorno bašo lošnipe hem o muke?
5. O posledice taro e Satanaskoro vladibe
Čitin 1. Mojseeva 3:1-6, a palo adava keren lafi bašo akala pučiba:
Kova hovajbe vakergja o Satana? (Dikh o stihija 4 hem 5.)
Sar o Satana kergja i Eva te mislinel kaj o Jehova garavela nešto šukar taro manuša?
Sprema o Satana, dali o Jehova valjani te vladinel e manušencar te šaj te oven bahtale?
Čitin Propovednik 8:9, a palo adava keren lafi bašo akava pučibe:
So slučinela pe adaleske so o Jehova na vladinela e svetoja?
1. O Adam hem i Eva sine sovršena hem živinena sine ko raj. Ama, ola šungje e Satana hem buningje pe protiv o Jehova
2. Pali adaja pobuna, ko sveto širingje pe o grevo, o muke hem o meribe
3. O Jehova ka čhivel krajo e grevoske, e mukenge hem e meribaske. O manuša palem ka oven sovršena hem ka živinen ko raj
6. E Jehovaske nane sa jekh keda cidaja muke
Soske šaj te ova sigurna kaj e Jehovaske nane sa jekh keda cidaja muke? Dikh so vakergje o cari o David hem o apostol Petar bašo akava. Čitin Psalm 31:7 hem 1. Petrovo 5:7, a palo adava keren lafi bašo akava pučibe:
Sar osetinea tut keda džanea kaj o Jehova dikhela tle muke hem mangela te pomožinel tuke?
7. O Devel ka čhivel krajo sa e mukenge
Čitin Isaija 65:17 hem Otkrovenie 21:3, 4, a palo adava keren lafi bašo akava pučibe:
Soske tano utešno te džana kaj o Jehova ka čhinavel sa o muke so doživinena avdive o manuša?
Dali džanljan?
Keda o Satana vakergja o prvo hovajbe, ov klevetingja e Jehova agjaar so tvrdingja kaj ov nane pravedno hem ljubezno Vladeteli. Adalea ov kaljargja e Jehovaskoro anav hem kergja o manuša te mislinen lošno bašo Jehova. Keda o Jehova panda hari ka čhinavel sa o lošnipe hem o muke, ov ka dokažinel kaj le isi le pravo te vladinel hem ka sikavel kaj leskoro vladibe tano najšukar. Te slavinel pe e Jehovaskoro anav tani i najvažno buti ko celo univerzum (Matej 6:9, 10).
NESAVE ŠAJ VAKERENA: „O lošnipe hem o muke avena taro Devel soske ov agjaar iskušinela amen“.
So ka vakere tu?
SO SIKLILEM
O Satana hem o prva duj manuša tane najviše odgovorna bašo lošnipe so isi ko sveto. E Jehovaske nane sa jekh keda amen cidaja muke hem ov panda hari ka čhinavel len.
Sar ka odgovorine?
Kova hovajbe vakergja o Satana e Evake?
Sar adava so o Adam hem i Eva buningje pe protiv o Devel vlijajngja upri amende?
Kotar džanaja kaj e Jehovaske nane sa jekh keda cidaja muke?
ISTRAŽIN
Sikljov so vakerela i Biblija bašo adava soj tano o grevo.
Čitin poviše bašo adava so tvrdingja o Satana ki Edensko gradina.
„Zošto Bog gi dopušta stradanjata?“ (Stražarska kula taro 1 januari 2014)
Dikh o odgovor ko jekh pučibe so mučinela bute manušen.
Dikh sar i Biblija pomožingja jekhe manušeske kova so cidingja but muke.