1. Koj tano o Isus?

O Isus tano mokjno angeli kova so živinela ko nebo. O Jehova stvoringja le angleder te kerel sa o javera bukja. Adaleske ki Biblija pišinela baši leste kaj ov tano „prvobijamo taro sa soj tano kerdo“ (Kološanite 1:15). Isto agjaar, i Biblija vakerela kaj o Isus tano e Devleskoro edinstveno bijamo Čhavoa soske ov sine o edinstveno so sine stvorimo direktno taro Jehova (Jovan 3:16). O Isus kergja buti ple Dadea e Jehovaja, agjaar so pomožingja leske te stvorinel sa o javera bukja. (Čitin Izreki 8:30.) O Isus ponadari da tano but paše e Jehovaja. Ov verno vakerela e javerenge e Devleskere lafija hem upatstvija hem adaleske baši leste vakerela pe kaj tano „o Lafi“ (Jovan 1:14).

Adaleske so o prva manuša, o Adam hem i Eva, na sine poslušna e Devleske, amen grešinaja, cidaja muke hem meraja.a Ama, na siem bizi nadež. O Jehova preku plo Čhavo o Isus Hristos, kergja te ova oslobodime taro grevo hem taro meribe. I Biblija sikavela kaj o Isus dengja plo životo sar otkupnina. I otkupnina tani cena so platinela pe te šaj te oslobodinel pe nekas. I cena so platingja o Isus sine leskoro sovršeno manušikano životo. (Čitin Matej 20:28.) Adaleske so o Isus sine sovršeno manuš hem sekogaš poslušno e Jehovaske, ov šaj sine te živinel večno keda sine tele ki Phuv. Sepak, ov dobrovolno dengja plo životo te šaj amen palem te dobina sa adava so našavgje o Adam hem i Eva. Adalea isto agjaar, o Isus sikavgja kobor ov hem o Jehova mangena amen. Akaja lekcija ka pomožinel tuke te bajrare tlo cenenje bašo e Isuseskoro meribe.

1. Savi korist isi amen taro e Isuseskoro meribe avdive?

Adaleske so siem grešnikija, amen keraja but bukja kola so o Jehova na mangela len. Sepak, ako iskreno kainaja amen bašo amare grevija, ako molinaja e Jehova te prostinel amenge preku o Isus Hristos hem ako trudinaja amen te na povtorina adala greške, šaj te ova paše amala e Devlea (1. Jovanovo 2:1). I Biblija vakerela: „O Hristos mulo jekh puti hem zasekogaš bašo grevija, pravedniko bašo nepravedna, te šaj te anel tumen ko Devel“ (1. Petrovo 3:18).

2. Savi korist ka ovel amen taro e Isuseskoro meribe ki idnina?

O Jehova bičhalgja e Isuse te del plo sovršeno manušikano životo „te šaj sekoj so verujnela [ko Isus] te na ovel uništimo, nego večno te živinel“ (Jovan 3:16). Adaleske so o Isus dengja plo životo, o Jehova panda hari ka cidel sa o lošna posledice tari e Adameskiri neposlušnost. Adava značinela kaj, ako sikavaja vera ki e Isuseskiri žrtva, ka ovel amen prilika te živina zasekogaš ko raj ki Phuv (Isaija 65:21-23).

DOZNAJN POVIŠE

3. E Isuseskoro meribe oslobodinela amen taro grevo hem taro meribe

VIDEOKLIPI: Soske mulo o Isus? (prvo delo) (2:01)

• Savi prilika našavgja o Adam adaleske so na sine poslušno e Devleske?

Čitin Rimjanite 5:12, a palo adava keren lafi bašo akava pučibe:

• Save posledice angja tuke e Adameskoro grevo?

Čitin Jovan 3:16, a palo adava keren lafi bašo akava pučibe:

• Soske o Jehova bičhalgja ple Čhave ki Phuv?

1. 1. O Adam sar sovršeno manuš na sine poslušno e Devleske hem adaleske sa o manuša grešinena hem merena

2. 2. O Isus sar sovršeno manuš sine poslušno e Devleske hem adaleske sa e manušen isi len prilika te oven palem sovršena hem te živinen zasekogaš

4. Sa e manušen šaj te ovel len korist taro e Isuseskoro meribe

VIDEOKLIPI: Soske mulo o Isus? (dujto delo) (2:00)

• Sar šaj o meribe jekhe manušeskoro te koristinel sa e manušenge?

Čitin 1. Timotej 2:5, 6, a palo adava keren lafi bašo akava pučibe:

• O Adam sine sovršeno manuš, ama adaleske so grešingja, akana sa o manuša grešinena hem merena. O Isus sine isto agjaar sovršeno manuš. Sar ov obezbedingja „soodvetno otkupnina“?

5. I otkupnina tani tuke poklon taro Jehova

E Jehovaskere sluge dikhena ki otkupnina sar poklon kova so o Jehova dengja lenge lično. Na primer, čitin Galatite 2:20, a palo adava keren lafi bašo akava pučibe:

• Sar o apostol Pavle sikavgja kaj dikhela ki otkupnina sar poklon soj dendo lično leske?

Keda o Adam grešingja, ov hem leskere potomcija sine osudime te meren. Ama, o Jehova bičhalgja ple Čhave te merel te šaj tut te ovel tut prilika te živine zasekogaš.

Džikote čitinea o sledna stihija, zamislin tuke sar osetinela pe sine o Jehova keda dikhela sine sar leskoro Čhavo cidela muke. Čitin Jovan 19:1-7, 16-18, a palo adava keren lafi bašo akava pučibe:

• Sar osetinea tut keda džanea so o Jehova hem o Isus kergje baši tuke?

SO SIKLILEM

Adaleske so o Isus mulo, o Jehova šaj te prostinel amare grevija hem šaj te živina zasekogaš.

Sar ka odgovorine?

• Soske mulo o Isus?

• Soske e Isuseskoro sovršeno manušikano životo sine soodvetno otkupnina?

• Savi korist isi amen taro e Isuseskoro meribe avdive hem savi korist ka ovel amen ki idnina?

ISTRAŽIN

Dikh soske bašo e Isuseskoro sovršeno manušikano životo vakerela pe kaj tano otkupnina.

„Ki koja smisla e Isuseskiri žrtva tani ’otkupnina bute dženenge‘?“ (internet statija)

Doznajn so valjani te kera te šaj te ova spasime taro grevo hem o meribe.

„Sar spasinela amen o Isus?“ (internet statija)

Dali šaj o Jehova te prostinel čak o seriozna grevija?

„Odgovor na bibliski prašanja“ (Stražarska kula taro 1 maj 2013)

Dikh sar adava so siklilo baši e Isuseskiri žrtva pomožingja jekhe manušeske te meninel pli ličnost.

„Povekje ne mu robuvam na nasilstvoto“ (internet statija)

1. Sar šaj te sikava kaj siem blagodarna bašo adava so kergje amenge o Devel hem o Hristos?

I Biblija vakerela kaj „sekoj so verujnela [ko Isus]“ ka šaj večno te živinel (Jovan 3:16). Sar šaj te sikava kaj isi amen vera? Adava šaj te kera le preku amare odluke hem postapke (Jakov 2:17). Keda sikavaja vera amare lafencar hem amare postapkencar, amen ovaja popaše amala e Isusea hem leskere Dadea, e Jehovaja. (Čitin Jovan 14:21.)