O biblisko čačipe kergja te ovav paše mle dadea

SAVI LIČNOST SIUM SINE

But turistija posetinena o pendžarde vodopadija soj tane paše uzi diz Pagsanhan ko Filipini. Mo dad, o Nardo Leron, barilo ko baro čorolipe. Adaleske so sine bari korupcija ko vlastija, ki policija hem ki buti, ov ulo but razočarimo hem holjamo manuš.

Amen siem sine ofto čhave, a me roditelija kerena sine but buti te šaj te bajraren amen. Ola retko sine khere adaleske so kerena sine zemjodelsko buti ko planine. Me hem mo phral o Rodelio, obično mora sine te grižina amen korkori amenge hem but puti ačhovaja sine bokhale. Sar čhave na sine amen but prilike te khela amenge. Štom ka phera sine efta berš, sekoj amendar valjani sine te kerel buti ki plantaža hem te phiravel phare kokosija ko uče planinska drumija. Keda sine amenge but phare te phirava len, mora sine te vlečina len.

Mo dad but marela sine amen e čhaven, ama panda poviše dukhala amen sine keda dikhaja sine sar marela amare daja. Probinaja sine te čhinava le, ama našti sine. Me hem o Rodelio čorjale dogovoringjem amen te mudara le keda ka bajrova. Kobor mangava sine te ovel man dad kova so ka mangel amen!

Adaleske so sium sine taro mo dad but razočarimo hem holjamo, geljum mange kheraldan keda sine man 14 berš. Nesavo vreme živinava sine ki ulica, hem počmingjum te pušinav marihuana. Palo adava arakhljum buti — kerava sine buti agjaar so čamcoja ingarava sine e turisten dži ko vodopadija.

Palo nesave berša pišingjum man ko fakulteti ki Manila. Ama, adaleske so bašo vikend iranava man sine ki buti ko Pagsanhan, na sine man but vreme učibaske. Mislinava sine kaj mo životo nane le nisavi smisla, a ni i marihuana na pomožinela sine mange te bistrav o griže. Počmingjum te probinav metamfetamini, kokain hem heroin. A i droga hem o seksualno nemoral tane but povrzimo. Segde okolu mande dikhava sine čorolipe, nepravde hem muke. Mrzinava sine e vlasten, hem mislinava sine kaj ola tane kriva bašo adava. Pučava sine e Devel: „Soske o životo tano asavko?“ Rodava sine o odgovor ko razna religie, ama adava na pomožingja mange. Počmingjum panda poviše te lav droga te šaj polokheste te trpinav o razočaruvanja.

Ko 1972 berš, o studentija ko Filipini organiziringje protestija protiv o vlastija. Me da učestvujngjum ko jekh asavko protest kova so ko krajo završingja nasilstvoja. But manuša sine astarde tari policija, hem nekobor masekija palo adava, ki phuv sine proglasimi vonredno sostojba.

Palem završingjum ki ulica. Darava sine te na astarel man i policija soske učestvujngjum ko protestija. Te šaj te ovel man pare te kinav droga, počmingjum te čorav. Osven adava, nudinava sine seksualna usluge e barvalenge hem e stranconge. Sine mange sajekh dali ka živinav ili ka merav.

Ko adava vreme, mi daj hem jekh taro me potikne phralja počmingje te proučinen e Jehovaskere svedokoncar. Mo dad but holjangja hem thargja lengiri biblisko literatura. Ama, ola na otkažingje pe, hem pokasno ule e Jehovaskere svedokija.

Jekh dive, keda nesavo Svedoko kergja lafi me dadea baši Biblija, vakergja leske kaj ki idnina ki Phuv ka ovel čačutni pravda (Psalm 72:12-14). Akava vetuvanje doborom but svidžingja pe leske so mo dad odlučingja te džanel nešto poviše. Čitindor i Biblija, ov na samo so uveringja pe kaj o Devel vetingja kaj ka ovel jekh pravedno vlada nego hem doznajngja so adžikerela o Devel taro roma hem o dada (Efešanite 5:28; 6:4). Sigate palo adava, ov hem me javera phralja hem phenja ule Jehovaskere svedokija. Adaleske so sium sine dur kheraldan, na džanava sine ništo bašo adava.

SAR I BIBLIJA MENINGJA MLO ŽIVOTO

Ko 1978 berš, selingjum man ki Avstralija. Ama, ni ki akaja mirno hem barvali phuv, našti sine te arakhav andruno mir. Ponadari da pijava sine hem lava sine droga. Pokasno adava berš, ale ki mande e Jehovaskere svedokija. Svidžingja pe mange adava so čitingje mange tari Biblija bašo mir kova so ka ovel ki Phuv, ama na sine man but doverba ki lende.

Kratko palo adava, irangjum man ko Filipini te ačhovav nekobor kurke. Me phralja hem me phenja vakergje mange kaj mo dad but trudinela pe te ovel pošukar manuš, ama me sium sine doborom razočarimo so na mangava sine te ovel man nisavo kontakt lea.

Mi najtikni phen objasningja mange tari Biblija soske o životo tano pherdo mukencar hem nepravdencar. Našti sine te verujnav kaj jekh tinejdžerka koja so isi la doborom hari iskustvo ko životo sine la odgovor bašo pučiba so mučinena man sine! Angleder te džav mange, mo dad dengja man o lil Ti možeš zasekogaš da živeeš vo rajot na Zemjata,a hem vakergja mange: „Dosta našljan. Akava lil ka pomožinel tuke te arakhe adava so rodea“. Ov pottikningja man te rodav e Jehovaskere svedokon keda ka iranav man ki Avstralija.

Šungjum leskoro sovet hem arakhljum jekh dvorana kote so khedena pe e Jehovaskere svedokija paše uzo mo kher ko Brizbejn. Počmingjum redovno te proučinav i Biblija. Taro nesave proroštvija soj pišime ki Biblija, sar soj ko Daniel 7 poglavje hem ko Isaija 9 poglavje, uveringjum man kaj ki idnina ka vladinel e Devleskoro Carstvo ki Phuv hem kaj ki adaja vlada nane te ovel nisavi korupcija. Isto agjaar, doznajngjum kaj ka živina ko raj ki Phuv. Mangava sine o Devel te dikhel man sar leskoro amal, ama džanava sine kaj mora te kontrolirinav me čuvstvija, hem te čhinavav te drogirinav man, te pijav hem te vodinav nemoralno životo. Odvojngjum man e džuvljatar so živinava sine laja, hem hari pohari oslobodinava man sine taro mle lošna navike. Sine man sa pobari doverba ko Jehova, hem molinava le sine te del man sila te kerav javera da promene.

Sar nakhela sine o vreme haliljum kaj adava so sikljovava tari Biblija čače šaj te meninel e manuše korendan. I Biblija vakerela kaj, ako iskreno trudinaja amen, šaj te urava i „nevi ličnost“ (Kološanite 3:9, 10). Džikote trudinava man sine te kerav sa adava, haliljum kaj me phralja hem me phenja šaj sine ko pravo keda vakergje mange kaj mo dad čače meningja pe. Poviše na sium sine leske holjamo hem na dikhava sine ki leste sar mo dušmani, nego mangava sine te smirinav man lea. Konečno prostingjum leske hem bistergjum adava kobor but mrzinava le sine panda taro tiknipe.

MLO ŽIVOTO AKANA

Sar terno, but puti šunava sine e javeren hem kerava sine lošna bukja kolencar anava sine mange dukh. Ko mlo da slučaj ispolningja pe adava so vakerela i Biblija — o lošno društvo čače ingargja man ko pogrešno drumo (1. Korinkjanite 15:33). Ama, ko e Jehovaskere svedokija arakhljum mange čačutne amala kola so pomožingje mange te ovav pošukar manuš. Maškar lende zapoznajngjum me romnja, e Loreta. Akana zaedno laja pomožinaja e javerenge te haljoven kaj i Biblija šaj te pomožinel lenge.

I Biblija pomožingja me dadeske te ovel rom so grižinela pe romnjake hem te ovel ponizno, miroljubivo hristijani, iako mislingjum mange kaj nešto asavko nikogaš nane te ovel. Keda arakhlem amen otkeda uljum e Jehovaskoro svedoko ko 1987 berš, mo dad gušingja man prvo puti ko mlo životo!

Zaedno me dajaja, ov propovedinela sine i biblisko nadež e manušenge poviše taro 35 berš. Ov ulo vredno hem sočuvstvitelno manuš, hem sine pendžardo palo adava so pomožinela sine e javerenge. Ko adala berša so nakhle, sikliljum te poštujnav le hem te mangav le. Sium sine gordo so sium leskoro čhavo! Mulo ko 2016 berš, ama setinava man ki leste ko šukar bukja. Svesno sium kaj i Biblija pomožingja hem mange hem leske te kera bare promene ki amari ličnost. Ko mlo vilo nane ni hari tari omraza so osetinava la sine angleder. A posebno sium blagodarno so arakhljum me Dade soj ko nebo, e Jehova, kova so vetinela kaj ka čhivel krajo bašo sa o bukja so anena problemija ko familie ko celo sveto.