Keda gele peske tari gradina Eden, o Adam hem i Eva sine len but čhave. Lengoro prvo čhavo, o Kain, ulo zemjodelco, a lengoro dujto čhavo, o Abel, arakhela sine bakhren.

Jekh dive o Kain hem o Abel dengje žrtve e Jehovaske. Džanea li soj adava žrtva? Adava tano poklon so dela pe e Devleske. O Jehova radujngja pe baši žrtva e Abeleskiri, ama na radujngja pe baši žrtva e Kaineskiri. Adaleske o Kain but holjangja. O Jehova vakergja e Kaineske ma te ovel ponadari holjamo soske ka šaj te kerel nešto lošno. Ama, o Kain na šungja le.

Namesto adava, o Kain vakergja e Abeleske: „Ava mancar ko pole“. Keda resle adari, o Kain napadingja ple phrale hem mudargja le. So kergja o Jehova bašo akava? O Jehova kazningja le agjaar so paldingja le dur tari leskiri familija. O Kain na smejnela sine te iranel pe više palal.

So sikljovaja taro akava? Šaj ka počmina te holjana ako nane sa sar so mangaja amen. Ako dikhaja kaj amari holi ovela pobari, ili nekoj avela te vakerel amenge kaj siem but holjame, tegani valjani odma te poprajna amen, hem te počmina te kontrolirina amare čuvstvija angleder ola te kontrolirinen amen.

Adaleske so o Abel mangela sine e Jehova hem kerela sine šukar bukja, o Jehova na bistergja le. O Jehova ka iranel e Abele ko životo keda i phuv palem ka ovel raj.

Sar so nakhela sine o vreme, i Phuv pherdili but manuša. But lendar sine lošna. Čak nesave angelija da ule lošna. Ola mukhle o nebo hem ale te živinen tele ki Phuv. Džanea li soske kergje adava? Te šaj te len peske manušikano telo hem te len peske romnja.

Akala angelija hem lengere romnja sine len čhave. Keda barile lengere čhave, ola ule but silna hem nasilna. Ola povredinena sine e manušen. O Jehova na manglja te oven asavke bukja, adaleske odlučingja te uništinel e lošno manušen Potopea.

Ama, sine jekh manuš so na sine sar o javera. Ov mangela sine e Jehova. Leskoro anav sine Noe. Leste sine le romni hem trin čhave, o Sem, o Ham hem o Jafet, hem o sotrin sine len romnja. O Jehova vakergja e Noeske te kerel bari arka te šaj ov hem leskiri familija te spasinen pe ko Potop. I arka tani bari kutija taro kaš so šaj te ačhol upro pani. Isto agjaar o Jehova vakergja e Noeske te čhivel ki arka but životne te šaj ola da te spasinen pe.

O Noe odma počmingja te kerel i arka. Leske hem leskere familijake valjangje okolu 50 berša te šaj te keren la. Ola kergje i arka agjaar sar so vakergja lenge o Jehova. Džikote kerela pe sine i arka, o Noe isto agjaar, vakerela sine e manušenge kaj ka ovel Potop. Ama, nikoj na mangela sine te šunel le.

Ko krajo, alo o vreme te khuven ki arka. Ajde te dikha so ulo palo adava.