O Mojsej hem o Aron gele te vakeren e faraoneske adava so vakergja lenge o Devel: „Ako na mukhea mle narodo te džal peske, ka mukhav grastane makhja te oven ki celo phuv“. Tegani, jekh kupa makhja napadingje o Egipet, hem e čorolen hem e barvalen. Celo phuv sine pherdi asavke makhjencar. Ama, ko Gesem, kote so živinena sine o Izraelcija, na sine makhja. O prva trin nevolje sine hem e Egipkjanenge hem e Izraelconge, a o javera nevolje sine samo e Egipkjanenge. O faraoni vakergja: „Molinen tumen e Jehovaske te cidel akala makhja. Tegani ka mukhav tumare narodo te džal peske“. Ama, keda o Jehova cidingja e makhjen, o faraoni palem na manglja te mukhel e narodo te džal peske. Palo sa adava so ulo, o faraoni ponadari da ačhilo inatčija.

O Jehova vakergja: „Ako o faraoni na mukhela me narodo, tegani o životne e Egipkjanengere ka nasvaljoven hem ka meren“. O tajsutno dive, o životne počmingje te meren. Ama, o životne e Izraelcongere na mule. Akava da puti o faraoni na mukhlja e narodo te džal peske.

O Jehova vakergja e Mojsejeske te džal ko faraoni, te lel pravo hem te frdel le ko vozduh. O pravo so frdingja širingja pe hem učhargja celo egipetsko phuv. Tegani e Egipkjanenge hem lengere životnenge iklile rane so but dukhana len sine. Ama o faraoni, ni pali akaja nevolja na manglja te mukhel len.

Adaleske o Jehova palem bičhalgja e Mojseje ko faraoni te phenel leske: „Panda li na mangea te mukhe me narodo? Tajsa ka perel bari kukudi ki akaja phuv“. O tajsutno dive o Jehova mukhlja kukudi, gromija hem jag. Adava sine najstrašno nevreme so nekogaš doživingje o Egipkjajna. Sa o kašta hem o rastenija sine uništime, a ko Gesem na ulo ništo. O faraoni vakergja: „Molinen e Jehova te čhinavel akava! Palo adava ka mukhav tumen“. Ama, keda čhinavgja te perel i kukudi hem o bršim, o faraoni palem na mukhlja e narodo te ikljol taro Egipet.

Tegani o Mojsej vakergja: „A akana, o skakulcija ka han sa so ačhilo taro adava so uništingja o nevreme“. Palo adava, pojavingje pe but skakulcija hem hale sa so ačhilo ko nive hem ko kašta. O faraoni palem vakergja: „Molinen e Jehova te spasinel amen taro skakulcija“. Ama, iako o Jehova cidingja e skakulcen, o faraoni palem na mangela sine te mukhel e narodo.

O Jehova vakergja e Mojsejeske: „Vazde to vas upre ko nebo“. Ko adava momenti, o nebo kalilo. Trin dive o Egipkjajna sine ki temnica, našti sine ništo te dikhen. Samo kote so živinena sine o Izraelcija sine svetlo.

O faraoni vakergja e Mojsejeske: „Tu hem tlo narodo šaj te džan tumenge. Mukhen samo tumare životnen akate“. O Mojsej vakergja leske: „Mora te la amare životnen te šaj te da žrtve amare Devleske“. O faraoni sine but holjamo. Počmingja te vikinel: „Cide tut mandar! Ako panda jekh puti ikliljan anglo me jakhja, ka mudarav tut!“

O Mojsej vetingja e faraoneske kaj nane te avel palem ki leste. Ama, angleder te džal peske lestar, vakergja leske: „Ki ekvaš i rat, sekova prvobijamo čhavo ko Egipet, taro e faraoneskoro čhavo pa sa dži ko čhave e robongere ka meren“.

O Jehova vakergja e Izraelconge te keren jekh posebno hajbe. Ov vakergja lenge: „Čhinen jekh bakhro ili buzni, murš, phuro jekh berš, hem taro leskoro rat makhen o avrune udara taro khera“. Peken o mas hem han le marea bizo kvasaco. Džikote hana, oven uravde, o sandale neka oven tumenge ko pre hem oven spremna te ciden. Akaja rat ka oslobodinav tumen“. Šaj li te zamisline tuke kobor sine radosna o Izraelcija?

Ki ekvaš i rat, e Jehovaskoro angeli nakhlja taro sekova kher ko Egipet. Ko udara kote so na sine rat, mudargja e prvobijame čhaven. Ama, ko khera so sine makhle ratea na kergja ništo. Ko sekova egipetsko kher, barvalo ili čorolo, mulo lendar čhavo. Ama, sa e Izraelcongere prvobijame čhave ačhile dživde.

Mulo čak e faraoneskoro da čhavo. O faraoni našti sine više te izdržinel akava. Ov odma vakergja e Mojsejeske hem e Aroneske: „Džan tumenge akatar. Džan hem služinen tumare Devleske. Len tumare životnen hem džan tumenge!“

Keda sine pherdi mesečina, o Izraelcija iklile taro Egipet, delime ko familie hem ko plemija. Sine 600.000 izraelska murša hem but džuvlja hem čhave. Isto agjaar, lencar sine javera da manuša so iklile taro Egipet hem gele te služinen e Jehovaske. O Izraelcija konečno sine oslobodime!

Te šaj te setinen pe sar o Jehova spasingja len, ola valjani sine sekova berš te spreminen asavko posebno hajbe. Akava dive vikinela pe sine Pasha.