O Jehova vakergja e Mojsejeske: „Ava ki mande ki planina. Ka pišinav tuke mle zakonija ko ploče taro bar hem ka dav len tuke“. O Mojsej gelo ki planina hem adari ačhilo 40 dive hem 40 rakja. Džikote sine adathe, o Jehova pišingja o deš zapovedija ko duj ploče taro bar hem dengja len e Mojsejeske.

Palo nesavo vreme o Izraelcija mislingje kaj o Mojsej mukhlja len. Ola vakergje e Aroneske: „Valjani amenge nekoj so ka vodinel amen! Ker amenge devel!“ O Aron vakergja: „Den man tumaro zlato.“ Ov topingja o zlato hem lestar kergja zlatno telco. Tegani o manuša vakergje: „Akava telco tano amaro devel so ikalgja amen taro Egipet!“ Ola počmingje te obožavinen e zlatno telco hem te khelen okolu leste. Dali adava sine pogrešno? Oja, soske o narodo vetingje kaj ka služinen samo e Jehovaske. Ama, akana ola na ikergje pe ko plo vetuvanje.

O Jehova dikhlja so ulo, hem vakergja e Mojsejeske: „Dža tele ko manuša. Ola nane mange poslušna hem služinena hovavne devleske.“ O Mojsej hulilo tari planina hem pea lelja o duj ploče.

Keda alo popaše uzo logori, o Mojsej šungja sar o narodo giljavela. Tegani dikhlja sar o narodo khelela hem sar pokloninela pe e zlatno telcoske. O Mojsej but holjangja. Tegani frdingja o duj ploče taro bar hem ola phagile ko kotora. Odma uništingja o zlatno telco. Palo adava pučlja e Arone: „Sar ubedingja tut o narodo te kere akaja lošno buti?“ O Aron vakergja: „Ma holjan. Džanea savo tano akava narodo. Ola mangle devel, topingjum lengoro zlato hem kergjum akava zlatno telco!“ O Aron kergja bari greška. O Mojsej irangja pe palem ki planina hem molingja taro vilo e Jehova te prostinel e manušenge.

O Jehova prostingja adalenge so mangle te ačhoven leske poslušna. Dali haljovea kobor sine važno o Izraelcija te šunen e Mojseje?

Keda o Mojsej sine ki planina Sinaj, o Jehova vakergja leske te kerel jekh posebno šatori, so vikinela pe sine sveto šatori. Adathe o Izraelcija šaj sine te obožavinen le. Ola valjani sine te len pea o šatori segde kote so džana sine.

O Jehova vakergja: „Vaker e manušenge te del sekoj kobor so šaj hem adalea te kerel pe o šatori“. O Izraelcija dengje zlato, srebro, bakari, skapoceno bara hem nakit. Ola isto agjaar dengje volna, len, životinsko koža hem but javera bukja. Doborom but bukja dengje so mora sine o Mojsej te vakerel: „Khedingjem dovolno! Ma anen ništo više“.

But murša hem džuvlja so džanena sine šukar te keren adaja buti, pomožingje te kerel pe o šatori. O Jehova dengja len mudrost te šaj šukar te keren i buti. Nesave tkajnena sine ili vezinena sine, a javera redinena sine bara, obrabotinena sine o zlato hem rezbinena sine kaš.

O manuša kergje o šatori baš agjaar sar so vakergja lenge o Jehova. Ola kergje jekh but šuži zavesa so delinela sine o šatori ko duj delija. Jekh delo vikinela pe sine Sveto, a o javer Najsveto. Ko Najsveto delo, sine čhivdo o kovčeg bašo sojuz, ov sine kerdo taro kaš akacija hem taro zlato. A ko Sveto delo sine zlatno svetilniko, astali hem žrtveniko kote so tharela pe sine temjan. Ko dvoro sine bakarno mijalniko hem baro žrtveniko. O kovčeg bašo sojuz setinkerela sine e Izraelcon ko lengoro vetuvanje kaj ka oven poslušna e Jehovaske. Džanea li so značinela o lafi sojuz? Adava tano jekh posebno vetuvanje.

O Jehova biringja e Arone hem leskere čhaven te služinen ko šatori sar sveštenikija. Ola valjani sine te grižinen pe bašo šatori hem te den žrtve e Jehovaske. Samo o Aron, kova so sine prvosvešteniko šaj sine te khuvel ko Najsveto delo taro šatori. Adava kerela sine jekh puti ko berš, keda dela sine žrtva bašo ple grevija, bašo ple familijakere grevija hem bašo grevija e celo izraelsko narodoskere.

O Izraelcija završingje o šatori jekh berš otkeda iklile taro Egipet. Akana sine len than kote so šaj sine te služinen e Devleske.

O Jehova sikavgja kaj prifatinela sar kergje o šatori adalea so čhivgja jekh oblako upri leste. Sa džikote sine o oblako upro šatori, o Izraelcija ačhona sine ko isto than. Ama, keda o oblako ka vazdel pe, adava sine lenge znako kaj valjani te džan peske taro adava than. Tegani khedena sine o šatori hem džana sine palo oblako.