Keda o izraelska špionja ale ki diz Erihon, ola sine ko kher ki jekh romni so vikinela pe sine Raav. O cari taro Erihon šungja bašo adava hem bičhalgja vojnikija ko lakoro kher. Oj garavgja e špionen ko krovi hem bičhalgja e vojnikon te džan ko pogrešno drumo. I Raav vakergja e špionenge: „Ka pomožinav tumen soske džanava kaj o Jehova tano tumencar hem kaj tumen ka osvojnen akaja phuv. Ama, molinava tumen, vetinen mange kaj ka spasinen me familija“.

Ola vakergje e Raavake: „Vetinaja tuke kaj nikoj taro tlo kher nane te ovel povredimo. Mukh te visinel jekh lolo šelo tari tli pendžerka, hem ti familija ka ovel spasimi“.

I Raav čhivgja jekh šelo te šaj akala duj Izraelcija te hulen tari pendžerka. Ola gele ki planina hem garavgje pe adari trin dive, palo adava irangje pe ko Isus Navin. Tegani, o Izraelcija nakhle i reka Jordan hem spremingje pe te osvojnen i hanaansko phuv. O Erihon sine i prvo diz so osvojngje la. O Jehova vakergja lenge jekh puti ko dive te phiren okolu o Erihon hem agjaar te keren šov dive. Ko eftato dive, adava kergje le efta puti. Tegani o sveštenikija phudingje ko šinga, a o vojnikija vikingje glasno. O zidija okolu o Erihon rušingje pe! Ama o kher e Raavakoro, kova so sine gradimo ko adala zidija, na rušingja pe. I Raav hem lakiri familija spasingje pe adaleske so sine len doverba ko Jehova.

Ki celi hanaansko phuv šundilo so ulo ko Erihon. O carija taro Hanaan khedingje pe zaedno te borinen pe protiv o Izraelcija. Ama, o Gavaoncija sine len javer plani. Uravgje purane šeja, gele ko Isus Navin hem vakergje leske: „Avaja tari dur phuv. Šungjem bašo Jehova hem sa so kergja baši tumende ko Egipet hem ko Moav. Vetinen kaj nane te napadninen amen, hem amen ka ova tumare sluge“.

O Isus Navin verujngja akale manušenge hem vetingja lenge kaj nane te napadinen len. Ama, palo trin dive šungja kaj ola nane tari dur phuv. Ola sine taro Hanaan. O Isus Navin pučlja len: „Soske hovavgjen amen?“ Ola odgovoringje: „Amen darandilem! Džanaja kaj o Jehova tumaro Devel borinela pe tumenge. Molinaja tumen, ma mudaren amen“. O Isus Navin kergja adava so vetingja, hem na mudargja len.

Palo nesavo vreme, khedingje pe pandž hanaanska carija te napadinen e Gavaoncon. O Isus Navin hem leskiri vojska phirgje celi rat te džan te spasinen len. I borba počmingja rano sabajle. O Hanaancija počmingje te našen ko sa o strane. Ama taro Jehova našti sine te našen, ov mukhlja lenge kukudi. Palo adava o Isus Navin molingja pe e Jehovaske te kerel te ačhol o kham ko jekh than. Sar šaj sine te rodel nešto so nikogaš angleder na sine? O Isus Navin sine le doverba ko Jehova! O kham ačhilo ko jekh than hem silno svetingja sa džikote o Izraelcija na pobedingje e hanaansko caren hem lengere vojsken.