O carstvo Izrael so sine le deš plemija sine le but lošna carija, ama o Ahav sine jekh taro najlošna. Ov lelja peske lošno romni so obožavinela sine e Vaale. Lakoro anav sine Jezavela. O Ahav hem i Jezavela kergje ki celo phuv te obožavinel pe o Vaal hem mudargje bute prorokon e Jehovaskere. So kergja o Jehova? Ov bičhalgja e proroko e Ilija te vakerel nešto e Ahaveske.

O Ilija vakergja e Ahaveske adaleske soj but lošno ko Izrael nane te del bršim. Poviše taro trin berš, ko nive na barilo ništo hem o manuša sine but bokhale. Palo adava, o Jehova palem bičhalgja e Ilija ko Ahav. O cari vakergja: „Tu kerea amenge samo problemija! Tu sian krivo bašo sa“. O Ilija vakergja: „Me na sium krivo so na dela bršim. Tu sian krivo soske obožavinea e Vaale. Ajde te dikha koj tano o čačutno Devel. Khede sa e narodo hem e Vaaleskere prorokon ki planina Karmil“.

Keda o manuša khedingje pe ki planina, o Ilija vakergja lenge: „Odlučinen so ka keren. Ako o Jehova tano o čačutno Devel, služinen leske. A ako tano o Vaal, tegani služinen leske. Ajde te dikha adava. O 450 prorokija e Vaaleskere neka spreminen pli žrtva hem neka molinen pe leske, a me ka spreminav žrtva hem ka molinav man e Jehovaske. O Devel so ka odgovorinel jagaja, ov tano o čačutno Devel“. O manuša složingje pe.

O prorokija e Vaaleskere spremingje i žrtva. Celo dive molinena pe sine pumare devleske: „Vaal, šun amen!“ Ama, o Vaal na odgovorinela sine, adaleske o Ilija asala lenge sine, hem vakergja: „Vikinen poviše. Šaj sovela, pa valjani nekoj te vazdel le taro sojbe“. Počmingja te rakjol, a e Vaaleskere sluge panda rodena le sine. Ama, ov na odgovoringja lenge.

O Ilija čhivgja pli žrtva ko žrtveniko hem čhorgja pani upri late. Tegani molingja pe: „Jehova molinava tut, sikav lenge kaj sian tu o čačutno Devel“. Ko adava momenti, o Jehova mukhlja jag taro nebo hem thargja i žrtva. O manuša počmingje te vikinen: „O Jehova tano o čačutno Devel!“ O Ilija vakergja: „Astaren e Vaaleskere prorokon te na našen!“ Adava dive sa o 450 prorokija e Vaaleskere sine mudarde.

Keda pojavingja pe ko nebo jekh tikno oblako, o Ilija vakergja e Ahaveske: „Ka ovel nevreme. Ukli ki tli kočija hem dža tuke khere“. O nebo kalilo, počmingja te phudel bari bavlal hem palo but vreme palem počmingja te del baro bršim. O Ahav vozingja i kočija but sigate. Ama, e Jehovaskere silaja, o Ilija prastandilo posigate tari kočija! Dali završingje e Ilijaskere muke? Te dikha.

I Jezavela but holjangja keda šungja so ulo e Vaaleskere prorokonge. Oj bičhalgja te vakeren e Ilijaske: „Tajsa ka ove mudardo sar e Vaaleskere prorokija. O Ilija but darandilo hem adaleske našlja ki pustina. Ov molingja pe: „Jehova našti više te izdržinav. Mangava te merav“. O Ilija na sine le više sila hem zasukja telo jekh kaš.

Jekh angeli vazdingja le taro sojbe hem vakergja leske: „Ajde ušti hem ha“. Tegani o Ilija dikhlja jekh pogača maro upro tate bara hem jekh khoro pani. Ov halja taro maro hem pilja pani hem palem zasukja. O angeli palem vazdingja le taro sojbe hem vakergja leske: „Ha, soske valjani tuke sila bašo drumo so ka dža“. Adaleske, o Ilija halja panda hari maro. Palo adava, ov cidingja drumo so trajnela sine 40 dive hem 40 rakja, sa džikote na reslja ki planina Horiv. Adathe o Ilija khuvgja ki jekh peštera te sovel. Ama, o Jehova pučlja le: „So kerea akate Ilija?“ O Ilija odgovoringja leske: „O Izraelcija na ikergje pe ko adava so vetingje tuke. Ola uništingje tle žrtvenikija hem mudargje tle prorokon. A, akana mangena te mudaren mande da“.

O Jehova vakergja leske: „Dža hem tergjov ki planina“. Tegani počmingja te phudel silno balval. Pali balval sine zemjotres hem palo adava sine jag. Ko krajo, o Ilija šungja prijatno hem tivko glaso. Tegani o Ilija učhargja po muj ple nametkaja hem iklilo tari peštera. O Jehova pučlja le soske našlja. O Ilija vakergja: „Samo me ačhiljum dživdo“. Ama, o Jehova phengja leske: „Na sian samo tu. Ko Izrael isi panda 7.000 manuša so služinena mange verno. Dža hem čhiv e Eliseje te ovel proroko ko tlo than“. O Ilija odma gelo te kerel adava so vakergja leske o Jehova. So mislinea, dali o Jehova ka pomožinel tut ako kerea adava so rodela tutar ov? Oja, ka pomožinel tut. Ajde te dikha nešto so ulo ko Izrael džikote na dela sine bršim.