Ko Izrael džikote sine suša, o Jehova vakergja e Ilijaske: „Dža ki Sarepta. Adari jekh udovica ka del tut te ha“. Keda reslja ko porte e dizjakere, o Ilija dikhlja jekhe udovica sar khedela kašta. Tegani ov rodingja latar hari pani. Keda geli te anel leske, ov vikingja pali late hem vakergja lake: „Molinava tut ane mange hari maro da“. Ama, oj vakergja leske: „Nane man maro te dav tut. Isi man samo hari varo hem zejtini kobor te kerav hari hajbaske me čhaveske hem mange“. O Ilija vakergja lake: „O Jehova vetingja kaj ako dengjan man hari maro, tegani o varo hem o zejtini so isi tut, nikogaš nane te trošinen pe sa džikote palem na dela bršim“.

Tegani i udovica geli khere hem kergja maro bašo e Jehovaskoro proroko. Sar so vetingja o Jehova agjaar ulo, i udovica hem o čhavo lakoro sine len so te han sa džikote na počmingja palem te del bršim. Bašo sa adava vreme o kjupija e varea hem e zejtinea, sine pherde.

Jekh dive, ulo nešto but lošno. O čhavo e udovicakoro but nasvalilo hem mulo. I udovica počmingja te molinel e Ilija te pomožinel lake. O Ilija lelja le taro lakere vasta hem ingargja le ki upruni soba ko kher. Mukhlja le ko kreveti hem počmingja te molinel pe: „Jehova molinava tut, iran palem o životo akale čhaveskoro“. Adava so rodingja o Ilija sine but čudno, soske dži tegani nikoj na irangja pe taro mule? Na samo adava, akaja udovica hem lakoro čhavo na sine Izraelcija.

Ama, o Jehova irangja ko životo akale čhave! O Ilija vakergja e udovicake: „Dikh! To čhavo tano palem dživdo“. Oj sine but radosno hem vakergja e Ilijaske: „Akana džanava kaj tu sian Devleskoro manuš. Adava džanava soske vakerea samo adava so phenela tuke o Jehova te vakere“.

Tari e Ahaveskiri palata ko Jezrael dikhjola sine e Navutejeskiri niva drakhencar. O Ahav manglja adaja niva hem adaleske manglja te kinel la lestar. Ama, o Navutej na manglja te bikinel i niva soske adava sine protiv e Jehovaskoro Zakoni te bikinel pe i phuv so dobingja la ko nasledstvo. Dali o Ahav poštujngja e Navutejeskiri ispravno odluka? Na. O Ahav sine but holjamo. Sine doborom holjamo so na ikljola sine tari soba, hem na hala sine maro.

E Ahaveskiri romni, i lošno carica i Jezavela, vakergja leske: „Tu sian cari ko Izrael. Šaj te ovel tut sa so mangea. Me ka kerav te dobine adaja niva“. Oj pišingja pismo e dizjakere starešinenge, te vakeren kaj o Navutej kergja lafi protiv o Devel hem adaleske te mudaren le barencar. O starešine kergje adava so vakergja lenge i Jezavela, hem oj vakergja e Ahaveske: „O Navutej mulo. I niva tani tli“.

I Jezavela na mudargja samo e Navuteje, oj mudargja javere da manušen so mangena sine e Jehova. Oj služinela sine hovavne devlenge hem kerela sine javera da lošna bukja. O Jehova dikhlja sa o lošna bukja so kerela sine i Jezavela. Dali ov nešto kergja bašo adava?

Palo meribe e Ahaveskoro, leskoro čhavo o Joram ulo cari. O Jehova bičhalgja jekhe manuše so vikinela pe sine Juj, te kazninel e Jezavela hem lakere familija.

O Juj uklilo ki pli kočija, hem gelo ko Jezrael, kote so živinela sine i Jezavela. O Joram gelo pe kočijaja te ikljol anglo Juj hem pučlja le: „Isi li mir maškar amende?“ O Juj vakergja: „Našti te ovel mir sa džikote ti daj, i Jezavela, kerela lošna bukja“. Tegani o Joram manglja te iranel pli kočija hem te našel. Ama, o Juj pogodingja le e strelaja hem ov mulo.

Palo adava, o Juj gelo ki e Jezavelakiri palata. Keda šungja koj avela, i Jezavela šminkingja pe, kergja peske frizura hem adžikerela le sine ki pendžerka. Keda reslja o Juj, oj počmingja te vakerel leske gruba lafija. Tegani, o Juj vikindor vakergja lakere slugenge kola so sine uzi late: „Frden la tele!“ Ola frdingje la tari pendžerka hem oj muli.

Palo akava, o Juj mudargja e Ahaveskere 70 čhaven hem uništingja sa o bukja so sine povrzime te obožavinel pe o Vaal. Dali akava uverinela tut kaj o Jehova dikhela sa hem kaj ko pravo vreme ka kazninel adalen so kerena lošna bukja?