O TERNE PUČENA
Sar šaj te pomožinel mange i Biblija? — dujto delo: Uživin ko čitibe i Biblija
„I Biblija šaj te ovel dosadno ako na čitinea la ko ispravno način“, vakerela jekh tinejdžeri so vikinela pe Vil.
Dali mangea te džane sar šaj te uživine ko čitibe i Biblija? Akaja statija ka pomožinel tuke ko adava.
Zamislin tuke adava so čitinea
Te šaj te zamisline tuke adava so čitinea šaj te probine akala bukja:
Birin nesavo biblisko izveštaj so mangea te proučine. Adava šaj te ovel nesavo biblisko nastan, jekh delo taro evangelija ili snimka taro dramsko čitibe i Biblija ki amari internet strana, jw.org.
Čitin adava delo tari Biblija. Šaj te čitine le korkori ili ko glaso tle amalencar ili tle familijaja. Jekh dženo šaj te ovel o raskažuvači, a o javera šaj te delinen pe ko uloge.
Probin nesave taro akala predlogija:
Crtin adava so čitinea, na primer nekobore slikencar sikav ko kova redo slučingje pe o nastanija. Teli sekoja slika kratko pišin so slučinela pe.
Crtin jekh šema taro adava so čitinea. Na primer, džikote čitinea baši nesavi pozitivno ličnost tari Biblija, povrzin lakere šukar osobine hem postapke adalea save bereketija dobingja.
Ker reportaža. Izvestin bašo nastanija taro nekobor strane hem „intervjuirin“ e glavno likon hem okolen so sine prisutna ko adava nastan.
Ako nesavo liko na angja mudro odluka, zamislin porazlično krajo. Na primer, razmislin baši situacija keda o Petar odrekujngja pe taro Isus (Marko 14:66-72). Sar šaj sine o Petar pošukar te reagirinel keda sine ko pritisok?
Ako avena tuke idee, prifatin o predizvik te pišine tli drama koja so temelinela pe ko nesavo biblisko izveštaj. Vaker hem kola pouke šaj te sikljoven pe taro adava (Rimjanite 15:4).
Šaj te zamisline tuke o bibliska nastanija!
Istražin!
Ako šukar pazinea ko detalija ka arakhe nesave garavde biserija. Ustvari, ponekogaš jekh ili duj lafija ko nesavo biblisko izveštaj šaj te otkrinen amenge but neve informacie.
Na primer, sporedin Matej 28:7 hem Marko 16:7.
Soske o Marko posebno istakningja kaj o Isus ka pojavinel pe e učenikonge „hem e Petareske“?
Tikni pomoš: O Marko na sine prisutno ko akala nastanija. Najverojatno, ov doznajngja taro Petar so slučingja pe.
Garavdo biseri: Soske o Petar sine utešimo keda šungja kaj o Isus mangela te dikhel le? (Marko 14:66-72). Sar o Isus sikavgja kaj tano čačutno amal e Petareske? Sar šaj tu da sar o Isus te ove čačutno amal?
Keda zamislinea tuke o biblisko izveštaj hem istražinea o detalija, panda poviše ka uživine ko čitibe i Biblija.