„Akana mangava i služba!“

NAŠAVGJUM MLO BAHTALIPE

Žalno tano adava so keda sine man 13 berš, mlo paše odnos e Jehovaja počmingja te slabonel. Izgledinela sine sar te phene mle součenikon sine len bari sloboda, a me da mangljum te ovel man asavki sloboda. Mislinava sine kaj mle roditelengere pravilija hem o hristijanska merilija ograničinena man sine. A isto agjaar, o duhovna aktivnostija izgledinena mange sine but phare te keren pe. Iako sekogaš verujnava sine kaj o Jehova postojnela, sepak na osetinava man sine doborom paše lea.

Na čhinavgjum skroz te propovedinav, ama adava kerava le sine so šaj pohari. Keda propovedinava sine, nikogaš na spreminava man sine hem adaleske mučinava man sine te počminav ili te prodolžinav o razgovor. Adaleske mli služba na sine delotvorno hem na osetinava man sine bahtali, a adava kergja panda poviše te na uživinav ki služba. Pučava man sine: „Sar šaj nekoj te propovedinel sekova kurko, sekova masek?“

Keda sine man 17 berš, mangljum te ovav nezavisno. Adaleske pakujngjum mle bukja, geljum mange kheraldan hem selingjum man ki Avstralija. Mle roditelenge sine but pharo keda geljum mange. Ola sine sekirime, ama mislingje kaj ponadari da ka služinav e Jehovaske.

Ki Avstralija čak panda pohari služinava sine e Jehovaske. Na džava sine redovno ko sostanokija. Družinava man sine ternencar kola so sar mande mangena sine te džan ko sostanokija, a palo adava te džan te pien hem te khelen ko diskoteke. Keda razmislinava bašo mlo životo ko adava vreme, haljovava kaj jekhe prea sium sine ko čačipe, a jekhe prea sium sine ko sveto, ama nigde na osetingjum man šukar.

JEKH VAŽNO POUKA SO NA OČEKUJNGJUM

Duj berš pokasno zapoznajngjum jekhe phenja, koja bizo te džanel pottikningja man te razmislinav so kerava mle životoja. Pandž phenja živinaja sine ko jekh kher, hem kaningjem e pokrainsko nadgledniko hem leskere romnja, e Tamara, te oven amencar ko kher jekh kurko. Džikote e Tamarakoro rom završinela sine nesave bukja ko sobranie amen družinaja amen sine laja hem asaja sine zaedno. Adava svidžingja pe mange. Oj na sine komplicirano hem šaj sine lokheste te kerel pe laja lafi. Vooduševimi sium sine keda dikhljum kaj jekh duhovno ličnost šaj te ovel doborom zabavno.

I Tamara sine but revno. Lakoro mangipe baši služba hem bašo čačipe sine zarazno. Oj sine bahtali soske dela sine e Jehovaske plo najšukar, a me na sium sine bahtali soske na dava sine mlo najšukar e Jehovaske. Adava so sine la pozitivno stavi hem so sine čače bahtali but vlijajngja ko mlo životo. Lakoro primer pottikningja man te razmislinav bašo jekh važno čačipe: O Jehova mangela sarine amen te služina leske „bahtalipaja“ hem „bahtale glasoja“ (Ps. 100:2).

POČMINGJUM PALEM TE MANGAV I SLUŽBA

Mangljum te ovav bahtali sar so sine i Tamara, ama te šaj te ovav agjaar bahtali, valjani sine te kerav bare promene. Valjangja mange vreme, ama počmingjum te kerav tikne promene. Počmingjum te spreminav man baši služba hem ponekogaš služinava sine sar pomošno pioneri. Adava pomožingja mange te ovel man pohari trema hem te osetinav man posigurno. Kobor poviše koristinava sine i Biblija ki služba, doborom poviše uživinava sine ki late. Palo kratko vreme sium sine pomošno pioneri sekova masek.

Počmingjum te družinav man phralencar hem phenjencar tari različno vozrast kola so dena sine e Jehovaske plo najšukar hem kola so uživinena sine te služinen leske. Lengoro šukar primer pomožingja mange te razmislinav bašo adava soj tano najvažno ko mlo životo hem te počminav te čitinav i Biblija sekova dive. Sa poviše uživinava sine ki služba hem palo nesavo vreme počmingjum te služinav sar opšto pioneri. Prvo puti palo doborom berša osetinava man sine bahtali hem šukar sine mange ko sobranie.

ARAKHLJUM MANGE POSTOJANO PARTNERI

Jekh berš pokasno zapoznajngjum e Alekse, jekh ljubezno, iskreno phral kova so mangela e Jehova hem i služba. Služinela sine sar sluga-pomošniko hem sine više pioneri šov berš. O Aleks nesavo vreme služinela sine ko Malavi, soske adari sine pobari potreba. Adari, ov družinela pe sine e misionerencar kola so dengje le šukar primer hem kola so ohrabringje le ponadari da te čhivel o Carstvo ko prvo than ko plo životo.

Ko 2003 berš, o Aleks hem me venčingjem amen, hem ottegani zaedno siem ki polnovremeno služba. Siklilem but šuže pouke hem o Jehova dengja amenge bereketi ko but načinija.

PANDA POVIŠE BEREKETIJA

Ko 2009 berš, siem sine kanime te služina sar misionerija ko Istočno Timor, jekh tikni država so pripadinela ki indonezisko grupa taro ostrovija. Siem sine but iznenadime, vooduševime hem daraja sine. Pandž masek pokasno reslem ki glavno diz Dili.

O životo adari sine but pojaver. Valjangjem te prilagodina amen ki nevi kultura, čhib, hajbe hem uslovija živibaske. Ki služba često dikhaja sine manušen so sine but čorole, so sine hari školujme hem so sine mučime. Isto agjaar, dikhlem bute dženen so sine len fizička hem emocionalna problemija tari vojna hem taro nasilstvo.a

I služba adari sine but šukar! Na primer, jekh puti arakhljum e Marijab, jekh tažno čhaj so sine la 13 berš. Angleder nekobor berša muli lakiri daj hem retko dikhela sine ple dade. Sar but čhave ko lakere berša, e Marija da na sine la cel ko plo životo. Setinava man ki jekh prilika keda but rungja džikote vakerela sine sar osetinela pe. Ama, na haljovava la sine so vakerela, soske panda na kerava sine šukar lafi ki lakiri čhib. Molingjum man e Jehovaske hem rodingjum lestar te pomožinel man te ohrabrinav la a palo adava čitingjum lake utešna stihija. Ko sledna nekobor berša dikhljum sar o čačipe meningja e Marijakoro stavi, o izgled hem o životo. Oj krstingja pe hem akana vodinela bibliska kursija. Avdive e Marija isi la bari duhovno familija hem osetinela pe mangli.

O Jehova dela bereketi ko propovedibe ko Istočno Timor. Iako poviše objavitelija tane krstime ko posledna 10 berš, but lendar služinena sar pionerija, sluga-pomošnikija ili starešine. Javera kerena buti ki kancelarija prevedibaske hem pomožinena te prevedinen pe bibliska publikacie ko lokalna čhibja. But sium bahtali keda šunava len sar giljavena ko sostanokija, keda dikhava sar asana hem sar duhovno napredujnena.

NAŠTI TE ZAMISLINAV MANGE POBAHTALO ŽIVOTO

O životo ko Istočno Timor sine but različno taro životo ki Avstralija, sepak našti te zamislinav mange pobahtalo životo. Ponekogaš patujnaja sine ko jekh tikno avtobusi pherdo manušencar kolen so sine pea šuke mačhe hem gajbe zelenčukoja taro pazari. Nesave dive vodinaja sine bibliska kursija ko tikne khera kote so sine but tato hem melalo o podi hem kote so prastana sine khanja. Ama, iako sine amen asavke predizvikija često puti mislinava mange sine: „Akava tano but šužo životo!“

Keda razmislinava ko berša so nakhle, blagodarno sium mle roditelenge so dengje pestar sa te sikaven man bašo e Jehovaskoro drumo hem so poddržingje man, čak ko mle phare tinejdžerska berša. Ko mlo slučaj o lafija taro Izreki 22:6 ispolningje pe. Mi daj hem mo dad dičinena pe e Aleksea hem mancar. Ola tane bahtale keda dikhena amen sar služinaja e Jehovaske. Taro 2016 berš, služinaja ki pokrainsko služba ko podračje tari podružnica Avstralazija.

Pharo mange te verujnav kaj poangle na uživina sine ko propovedibe. Akana mangava i služba! Haliljum kaj bizi razlika so slučinela pe ko amaro životo ka ova čače bahtale samo ako služinaja e Jehovaske celo vilea. O posledna 18 berša so služinava e Jehovaske e Aleksea tane o najšuže berša ko mlo životo. Akana haljovava kobor tane čače o lafija e Davideskere so vakergja len e Jehovaske: „Ka oven bahtale sa okola kaske tu sian than garajbaske ola sekogaš ka vikinen bahtale... Hem okola so mangena tlo anav ka oven bahtale baši tute“ (Ps. 5:11).