Sar te ačhove nekasaja paše?

Te ove nekasaja paše mora te sikave mangipe. So pobuter sikljoveja bašo Jehova dobor pobaro mangipe ka oveltu sprema leste. Sar so bajrola to mangipe sprema o Devel agjaar pobut ka mange te služine leske. Akava ka ohrabrineltu te ove e Isuseskoro učeniko (Matej 28:19). Jekha-jek e Jehovaskere svedokoncar, ka šaj zasekogaš te ačhove paše e Devleja. So mora te kjere?

Mora te sikave kaj mangea e Devle agjaar so ka šune leskere zakonija. ,Te mange e Devle značinela: te ikjere leskere zakonija, a leskere zakonija nae phare‘ (1. Jovanovo 5:3).

Kjer odova so sikljoveja. O Isus vakjergja jek paramisi. Jek gogjaver manuš kjergja po kher ko bar. Jek glupavo manuš kjergja po kher ko pesko. Kjeda ali bari balval, o kher so sine kjerdo ko bar napelo, ama o kjer so sine kjerdo ko pesko pelo hem rumindilo. O Isus vakjergja kaj okola so šunena leskere lafija hem kjerena agjaar ola tane sar o gogjaver manuš so kjergja po kher ko bar. Ama okola so šunena leskere lafija, a na kjerena agjaar, ola tane sar o glupavo manuš so kjergja kher ko pesko. Sar kova manuš mangea te ove? (Matej 7:24-27).

Te vetinetu. Akava značinela ki molitva te vakjere e Jehovaske kaj mangea te kjere leskiri volja zasekogaš. Ako kjerea e Devleskiri volja sikavea kaj sijan e Isuseskoro učeniko (Matej 11:29).

Te krstinetu. ,Krstintu, sikav vera ko Isuseskiri žrtva, agjaar ka oven čistime te grevija‘ (Dela 22:16).

Služin e Devleske ko sa. ,Sa so ka kjeren, kjeren odova celo dušaja sar e Jehovaske, a na sar e manušenge‘ (Kološanite 3:23).