Ov paše e Devleja zasekogaš!

Valjani te de tutar sa te ove paše amal; valjani te de tutar sa te ačhove paše amal. Ako trudingjantu te ove hem te ačhove paše e Devleja ka ove blagoslovimo. O Isus vakjergja okolenge so verunjena ki leste: ,O čačipe ka oslobodinel tumen‘ (Jovan 8:32). So značinela odova?

Šaj te oveltu sloboda akana. Šaj te ove slobodno taro hovavne nauke hem hovajba so širinela o Beng. Odoleske so sijam paše e Jehovaja isi amen nadež, a odova kjerela amen te ova slobodna (Rimjanite 8:22). Okola so i tane e Devleja paše na darana ni taro meribe (Evreite 2:14, 15).

Tu šaj te uživine ki sloboda ko e Devleskoro nevo sumnal. Savi šukar sloboda adžikerela tu panda hari! Ki rajsko Phuv ka ove slobodno taro maribe, nasvalipe hem kriminal. Slobodno taro čorolipe hem bokhalipe. Slobodno taro phuripe hem meribe. Slobodno tari dar, maltretiribe hem nepravda. I Biblija vakjerela bašo Devel: ,Tu phravea to vas hem dea sarinenge so mangena‘ (Psalm 145:16).

Okola so i paše e Devleja ka dživdinen zasekogaš. O večno dživdipe tano jek baro poklon taro Devel so ka del le sarinenge so mangena te oven paše lea (Rimjanite 6:23). Samo zamislin tuke kobor šukar ka ovel kjeda večno ka dživdine!

Ka oveltu vakti te kjere but bukja. Šaj ka mange te bašale disavo instrumenti. Ili ka mange te sikljove disavo zanati ili te crtine. Šaj ka mange te sikljove bašo životne ili bašo rastenija. Ili ka mange te phire ko razna phuvja te dikhe razno manušen. Sa akava ka šaj te kjere ako dživdineja večno!

Ka oveltu vakti te oventu but amala. Kjeda večno ka dživdine ka pendžare bute manušen kola so ule paše e Devleja. Ka pendžare lengere šukar osobine, hem olada ka oven tuja paše, te amala. Tu ka mange lende thaj ola ka mangen tute (1. Korinkjanite 13:8). O večno dživdipe ka deltu vakti te ove paše sarinencar ki Phuv! A najšukar taro sa, sar ka nakhen o berša ka ove but popaše e Jehovaja. Mangaja tuke te ove paše e Devleja sekogaš!