Arakhlem jekh skapoceno biseri

Vinston, vaker amenge sar tu počmingjan te rode o čačipe bašo Devel.

Bariljum ki jekh farma ko Kvinslend (Avstralija). Amari familija na sine religiozno. Adaleske so živinaja sine ko izolirimo than, na sine man but kontakt javere manušencar. Keda sine man 12 berš, počmingjum te rodav o čačipe bašo Devel. Molinava man sine te pomožinel mange te džanav o čačipe baši leste. Palo nesavo vreme mukhljum i farma hem arakhljum buti ko Adelejd (Južno Avstralija). Keda sine man 21 berš, džikote sium sine ko odmor ko Sidnej zapoznajngjum e Pamela. Oj vakerela mange sine baši jekh Britansko-izraelsko religiozno grupa kola so vakerena kaj o Britancija avena taro, sar so vikinena len ola, našavde plemija taro Izrael. Sprema adaja grupa, akala plemija tane o deš plemija taro severno carstvo kola so sine ingarde ko ropstvo ko oftoto veko angleder amari era. Adaleske, keda irangjum man ko Adelejd, kerava sine lafi baši akaja tema jekhe kolegaja kova so počmingja te proučinel i Biblija e Jehovaskere svedokoncar. Otkeda kergjem lafi samo nekobor saatija — poviše bašo adava ko so verujnena o Svedokija — haliljum kaj sine odgovorimo ki mli molitva so molingjum man keda sium sine tikno. Agjaar počmingjum te sikljovav o čačipe bašo mlo Stvoriteli hem bašo leskoro Carstvo! Arakhljum o skapoceno biseri (Mat. 13:45, 46).

Pamela, tu da počmingjan te rode adava biseri ko terne berša. Sar arakhljan le?

Bariljum ki religiozno familija ki diz Kofs Harbor (Nevo Južno Vels). Mo dad, mi daj hem lakere roditelija počmingje te verujnen ko adava so sikavela i Britansko-izraelsko grupa. Me, mo potikno phral, mi pobari phen, hem but taro mle bratučetija, siem sine sikavde te verujna kaj o Devel posebno mangela e manušen so isi len britansko poteklo. Ama, me na složinava man sine adalea, hem na osetinava man sine paše e Devlea. Keda sine man 14 berš, džava sine ko razna crkve, sar soj i Anglikansko, i Bap­tističko hem i Adventističko crkva. Ama ola na pomožingje mange te zapoznajnav e Devle.

Mli familija pokasno selingja pe ko Sidnej, kote so zapoznajngjum e Vinstone, kova so adari sine ko odmor. Sar so vakergja ov, adava so keraja sine lafi baši religija kergja te počminel te proučinel e Svedokoncar. Ottegani, o pismija so bičhalela len sine mange sine pherde bibliska stihoncar! Mora te priznajnav, ko početok sium sine sekirimi, čak holjanava leske sine. Ama, sar nakhela sine o vreme haliljum kaj adava tano o čačipe bašo Devel.

Ko 1962 berš, selingjum man ki diz Adelejd te šaj te ovav popaše uzo Vinston. Ov organiziringja te bešav ko Tomas hem ki Dženis Slouman — jekh bračno pari Svedokija kola so služingje sar misionerija ki Papua Nova Gvineja. Tegani sine man samo 18 berš. Ola but grižinena pe sine mange hem but pomožingje mange te džanav poviše bašo Jehova. Palo nesavo vreme me da počmingjum te proučinav e Devleskoro Lafi hem bašo kratko vreme uveringjum man kaj arakhljum o čačipe. Otkeda o Vinston hem me venčingjem amen, odma počmingjem polnovremeno službaja. Iako sine amen pharipa, i služba e Jehovaske angja amenge but bereketija hem pomožingja amenge panda poviše te cenina o skapoceno biseri so arakhlem le.

Vinston, vaker amenge nešto poviše bašo prva berša tari tli služba bašo Jehova.

Kratko otkeda lelem amen e Pamelaja, o Jehova počmingja te del amen posebna zadače ki služba (1. Kor. 16:9). Jekh asavki zadača sine i pionersko služba. O phral o Džek Porter, kova so sine pokrainsko nadgledniko hem leskiri romni i Roslin, pottikningje amen te počmina akale službaja. (O phral o Džek akana služinela sar členi ko Odbor e podružnicakoro Avstralazija.) Pandž berš služingjem sar opšta pionerija. Keda sine man 29 berš, siem sine zamolime te služina ki pokrainsko služba ko ostrovija ko južno delo taro Tihi okean, bašo kola so tegani grižinela pe sine i podružnica ko Fidži. Adala ostrovija tane: Amerikansko Samoa, Samoa, Kiribati, Nauru, Niue, Tokelau, Tonga, Tuvalu hem Vanuatu.

Ko adava vreme, o manuša so živinena sine ko nesave dur ostrovija na sine len doverba ko e Jehovaskere svedokija. Adaleske mora sine te pazina hem te ova pronikliva (Mat. 10:16). O sobranija sine tikne, a nesave lendar našti sine te obezbedinen amenge than sojbaske. Adaleske pučaja sine e manušen taro gava dali šaj te sova ki lende. Ola sine šukar sprema amende hem mukhena amen sine te sova ki lende.

Vinston, tu but interesinea tut bašo prevedibe. Sar počmingjan te interesine tut bašo adava?

Ko adava vreme, o phralja so živinena sine ki Tonga sine len samo nekobor traktatija hem brošurke ki tongansko čhib, jekh taro polineziska čhibja. Ki služba koristinena sine o lil Čačipe kova so ingarela ko večno životo ki anglisko čhib te šaj te proučinen e manušencar. Adaleske, džikote sine i škola bašo starešine koja so trajnela sine štar kurke, trin lokalna starešine kola so iako na džanena sine šukar i anglisko čhib, složingje pe te prevedinen akava lil ki tongansko čhib. I Pamela kucingja o teksti taro lil ki mašina bašo pišibe, hem bičhalgjem le pečatibaske ki podružnica ko SAD. Celo proekti trajngja okolu ofto kurke. Iako o kvaliteti taro prevod na sine najšukar, akaja publikacija pomožingja bute manušenge so kerena lafi ki tongansko čhib te doznajnen bašo čačipe. Me hem i Pamela na siem preveduvačija, ama akava iskustvo bajrargja ki amende interes baši akaja buti.

Pamela, sar razlikujnela pe sine o životo ko ostrovija taro životo ki Avstralija?

Sine but porazlično! Ko nesave thana sine amen razna pharipa: komarcija, baro tatipe hem vlažnost, staorcija, nasvalipe, a ponekogaš na sine amen dovolno hajbaske. Tari javer strana, ko krajo taro sekova dive, uživinaja sine so šaj sine te dikha o okeani tari amari fale — samoansko anav bašo tipično polinezisko kher kova so sine le krovi tari pus hem na sine le zidija. Ponekogaš, rakjate, i mesečina doborom but svetinela sine so šaj sine te dikha o palme e kokosencar hem šaj sine e mesečinakiri svetlina te dikhel pe ko okeani. Asavke but šuže momentija pottikningje amen hor te razmislina bašo Jehova hem te molina amen leske. Adava pomožinela amenge sine te na mislina ko negativna, nego ko pozitivna bukja.

But zamanglem e čhaven, kola so sine but interesna hem but sine lenge čudno keda ka dikhen sine parne manušen. Džikote siem sine ki poseta ko Niue, jekh čhavo galingja o balale vasta e Vinstoneskere hem vakergja: „But svidžinena pe mange tle perduvija“. Dikhjola pe kaj nikogaš angleder na dikhlja doborom balale vasta hem na džanela sine sar te opišinel len!

But manuša adari živinena sine ko lošna uslovija, adaleske sine amenge žal bašo adava. Sine len but šuži okolina, ama na sine len šukar zdravstveno griža hem na sine len dovolno čisto pani pijbaske. Ama, amare phralja na sekirinena pe sine but bašo adava. Ola siklile ko asavko životo. Sine bahtale so sine ple familijaja, so sine len than kote so šaj sine te obožavinen e Jehova hem te služinen leske. Lendar siklilem te koncentririna amen ko adava soj najvažno hem te ovel amen ednostavno životo.

Pamela, tu vakergjan amenge kaj ponekogaš mora sine te le pani taro bunari hem te spremine hajbaske ko neve uslovija. Sar uspejngjan ko adava?

Bašo adava mora te blagodarinav me dadeske. Ov sikavgja man but korisna bukja, na primer, sar te tharav jag hem te gotvinav ki late. Sikavgja man sar te ikljovav ko krajo keda isi man hari materijalna bukja. Džikote siem sine ki poseta ko Kiribati, bešaja sine ko jekh tikno kher so sine le krovi tari pus, zidija taro bambus hem podi taro koralija. Ki adaja prilika, te šaj te kerav jekh ednostavno hajbe, ranljum jekh dupka jagake hem thargjum jag e lušpencar taro kokos. Te šaj te ovel amen pani, adžikerava sine redo ko jekh bunari zaedno javere džuvlencar taro adava than. Ikalena sine pani jekhe kaštea kova so sine dugačko okolu duj metre koleste so sine phanlo sano šelo, slično sar jekh trska mačhenge. Ama, namesto te phanden jadica ko krajo taro šelo, ola phandena sine kofa. Jekh po jekh, sekoja romni frdela sine o šelo hem ko pravo momenti sigate vlečinela le sine. I kofa vrtinela pe sine ki strana hem phergjola sine pani. Mislingjum kaj adava tano ednostavno — sa džikote na alo mlo redo. Mukhljum o šelo nekobor puti, i kofa perela sine ko pani ama na phergjola sine pani! Otkeda sarine asandile mange, jekh romni nudingja pe te pomožinel mange. O manuša taro adava than sekogaš sine spremna te pomožinen amenge.

O solduj džene mangena sine i služba ko ostrovija. Šaj li te vakeren amenge nesave šuže iskustvija?

Vinston: Valjani amenge sine vreme te šaj te zapoznajna nesave običaija. Na primer, keda vikinena amen sine ko hajbe, o phralja ikalena sine sa so sine len. Ko početok, na halilem kaj valjani te mukha lenge da nešto hajbaske. Adaleske haja sine sa o hajbe so sine angli amende! Ama, keda halilem savo tano lengoro običaj, mukhaja sine hajbe lenge da. Iako keraja sine asavke greške, o phralja haljovena amen sine. Isto agjaar, sine but bahtale keda palo šov masek palem posetinaja len sine. Osven o phralja taro adava than, amen siem sine o edinstvena Svedokija taro javer than kas so dikhle dži tegani.

Isto agjaar, amare posete dena sine šukar svedoštvo e manušenge ki okolina. But taro manuša so živinena sine adathe, na verujnena sine e phralenge taro adava than kaj tane delo tari nesavi megjunarodno organizacija. Adaleske, keda me hem i Pamela džaja sine te posetina e phralen, o manuša haljovena sine kaj čače postojnela amari organizacija hem kaj grižinela pe bašo sekova jekh soj delo latar. O manuša sine but vooduševime.

Pamela: Jekh taro najšuže iskustvija slučingja pe mange ko Kiribati, kote so sine sobranie taro samo nekobor phralja hem phenja. Sine samo jekh starešina, o Stinaki Matera, kova so dengja pestar sa te šaj te grižinel pe amenge. Jekh dive alo ki amende jekhe korpaja kolate so sine samo jekh jaro. Ov vakergja: „Akava tano tumenge!“ Ko adava vreme but retko šaj sine te ha jare tari khani. Adava tikno, ama ljubezno gesti, but pogodingja amen.

Pamela, nekobor berš palo adava našavgjan e bebe kova so panda na bijandilo. So pomožingja tuke te nakhe adava pharo periodi?

Ačhiljum khamni ko 1973 berš. Ko adava vreme e Vinstonea siem sine ko ostrovija ko južno delo taro Tihi Okean. Odlučingjem te irana amen ki Avstralija, kote so štar masek palo adava našavgjum e bebe. Solduj džene siem sine but tažna. Sar so nakhela sine o vreme, i dukh ko mlo vilo tiknjola sine, ama na nakhlja celosno sa džikote na dobingjem i Stražarsko kula taro 15 april 2009 berš. Ki rubrika „Pučiba taro čitatelija“ sine odgovorimo ko pučibe: „Isi li nadež te voskresninel o bebe so mulo ki matka e dajakiri?“ I statija uveringja amen kaj o Jehova ka odlučinel so ka kerel bašo adava hem kaj ov sekogaš kerela adava soj ispravno. O Jehova ka sasljarel sa amare rane so kergja amenge akava sveto keda preku plo Čhavo ka „uništinel o bukja so kergja len o Beng“ (1. Jov. 3:8). Isto agjaar, akaja statija pomožingja amenge panda poviše te cenina o skapoceno „biseri“ so isi amen sar e Jehovaskere sluge! Kobor but utešingja amen i nadež bašo e Devleskoro Carstvo!

Otkeda našavgjem amare bebe, palem počmingjem e polnovremeno službaja. Nekobor masekija služingjem ko Betel ki Avstralija hem palo adava prodolžingjem e pokrainsko službaja. Ko 1981 berš, otkeda štar berš služingjem ko Sidnej hem ko gava ko Nevo Južno Vels, siem sine vikime te služina ki podružnica, kote so panda služinaja.

Vinston, dali o iskustvo so dobingjan le ko ostrovija pomožingja tuke ki služba sar členi ko Odbor e podružnicakoro Avstralazija?

Oja, ko nekobor načinija. Prvo, i Avstralija sine zamolimi te grižinel pe baši Amerikansko Samoa hem Samoa. Palo adava, i podružnica ko Nov Zeland sine spojmi e podružnicaja ki Avstralija. Akana, ko podračje e podružnicakoro Avstralazija perena i Avstralija, Amerikansko Samoa hem Samoa, Istočno Timor, Kukovite Ostrovi, Niue, Nov Zeland, Tokelau hem Tonga — a but lendar sine man prilika te posetinav len sar pretstavniko e podružnicakoro. Adava so angleder sorabotinava sine e verna phralencar hem phenjencar taro ostrovija but pomožinela mange džikote služinava ki podružnica.

Ko krajo šaj te vakerav kaj me hem i Pamela odamna halilem, taro amaro iskustvo, kaj e Devle na rodena samo o vozrasna. O terne da rodena adava skapoceno „biseri“ — čak keda o javera tari familija na interesinena pe (2. Car. 5:2, 3; 2. Let. 34:1-3). Šaj te ova sigurna kaj o Jehova tano Devel kova so grižinela pe hem mangela sarine, terne hem phure, te dobinen večno životo!

Angleder poviše taro 50 berš, me hem i Pamela počmingjem te roda e Devle. Tegani, našti sine te zamislina amenge savo životo ka anel amenge adava! Čače tano skapoceno biseri o čačipe bašo e Devleskoro Carstvo! Odlučna siem sa amare silencar te zadržina akava skapoceno biseri!