Sa džikote vladinela sine o Devel e manušencar, sa o stvorime bukja so kergja len o Devel sine ko jekhipe hem sine len mir maškar peste

Soske valjani amenge e Devleskoro Carstvo?

Ko početok tari manušikani istorija, amaro Stvoriteli, koleskoro anav soj tano Jehova, sine o edinstveno Vladeteli. Ov vladingja mangipaja hem kergja jekh but šuži rajsko gradina kote so šaj sine te živinen o manuša. Osven adava, dengja len but hajbaske hem buti so kerela len bahtale (1. Mojseeva 1:28, 29; 2:8, 15). Te na otfrlinen sine o manuša e Devle sar pumaro Vladeteli, ki Phuv panda ka ovel sine mir.

O Adam ikerela o zabranimo plodi kova so nudingja leske i Eva — O prva manuša otfrlingje e Devle sar plo vladeteli

Tari Biblija doznajnaja kaj jekh buntovno angeli, kova so pokasno sine pendžardo sar Satana o Beng, vakergja kaj e Devle nane le pravo te vladinel upro manuša. Ov indirektno vakergja kaj o manuša ka oven pobahtale bizo e Devleskoro vodstvo. Žalno tano so amare prva roditelija, o Adam hem i Eva, gele palo e Satanaskoro primer hem protivingje pe e Devleske (1. Mojseeva 3:1-6; Otkrovenie 12:9).

Adaleske so otfrlingje e Devle sar pumaro Vladeteli, o Adam hem i Eva našti sine poviše te živinen ko raj, hem našavgje i možnost te ovel len sovršeno sastipe hem te živinen večno (1. Mojseeva 3:17-19). Isto agjaar, lengiri odluka negativno vlijajngja upro lengere čhave da so sine len pokasno. I Biblija vakerela kaj adaleske so o Adam grešingja, „o grevo khuvgja ko sveto hem preku o grevo o meribe“ (Rimjanite 5:12). Ama, o grevo angja dži ko panda jekh seriozno problemi kova tano pišimo ki Biblija: „O manuš vladinela upro manuš ki leskiri šteta“ (Propovednik 8:9). Javere lafencar, keda o manuša vladinena jekh upro javer, sekogaš isi lošna posledice.

O POČETOK TARO MANUŠIKANO VLADIBE

O gordo Nimrod, a ki pozadina manuša kola so gradinena bari kula — O Nimrod buningja pe protiv o Jehova

O Nimrod sine o prvo manušikano vladeteli so spomninela pe ki Biblija. Ov buningja pe protiv o Devel. Panda taro vreme e Nimrodeskoro, but džene koristingje pli mokj te šaj te keren šteta e javerenge. Okolu 3.000 berš angleder, o cari o Solomon pišingja: „Dikhljum o asva okolengere soj mučime hem na sine koj te utešinel len. I mokj sine ko adala so mučinena len“ (Propovednik 4:1).

Avdive da ništo na meningja pe. Ko 2009 berš ki jekh publikacija taro Obedineta Nacie, vakerela pe kaj o lošno način vladibaskoro tano jekh taro glavna pričine soske ovena lošna bukja ko sveto.

ALO VREME BAŠI PROMENA!

E svetoske valjanena pošukar vladetelija hem pošukar vladibe. Amaro Stvoriteli vetingja amenge baš adava!

Slike: O posledice taro manušikano vladibe. 1. Jekh romni tari Azija bešela ki melali ulica hem ikerela ple čhave kova so rovela. 2. Jekh nasvalo manuš pašlo ki bolnica. 3. O vojnikija pukajnena ki jekh vojna. 4. Manuša so protestirinena. 5. Jekh daj ple čhajaja tergjona anglo pumaro kher hem dikhena kaj o staklo taro udar tano phago. 6. Ki jekh zagadimi diz dikhjona hodžakija hem električna kabelija — Čak o najšukar vlade na uspejngje te rešinen o seriozna problemija e manušengere

O Devel kergja jekh Carstvo ili vlada koja ka zameninel sa e manušikane vladen hem kova so „ka ačhovel zasekogaš“ (Daniel 2:44). Adava tano o Carstvo koleske so molinena pe milionja manuša (Matej 6:9, 10). Ama, o Devel nane te ovel adava kova so ka vladinel ki akaja vlada. Namesto adava, ov biringja te ovel o vladeteli nekoj so živingja sar manuš ki Phuv. Kas biringja o Devel?