Sar finansirinela pe adava so kerena e Jehovaskere svedokija?

Amare aktivnostija prvenstveno finansirinena pe taro dobrovolna prilogija so dena len e Jehovaskere svedokija.a Ko thana kote so ikeraja amare sostanokija isi kutie bašo prilogija. Javera načinija sar šaj te den pe dobrovolna prilogija šaj te arakhe ki amari internet-stranica, ko delo Donacie. Sekoj šaj te birinel dali mangela te del prilogija bašo amaro propovedibe ko celo sveto, bašo potrebe e sobraniengere, ili bašo solduj bukja.

E Jehovaskere svedokija na dena desetok hem lendar na očekujnela pe te den odredeno suma pare ili odredeno procenti tari pli zarabotka (2. Korinkjanite 9:7). Ko amare sostanokija nikogaš na khedaja prilogija hem o vlezi tano besplatno. Isto agjaar, na platinaja o govorija bašo krstibe, parujbe, venčavka hem javera religiozna službe. Na khedaja pare preku humanitarna zabave hem svečena večere, nagradna igre, karnevalija ili slična nastanija, a isto agjaar na rodaja e manušendar te den pare. O prilogija so dena pe tane anonimna (Matej 6:2-4). Ko amare internet-stranice hem publikacie nane reklame kolendar so laja pare.

Sekova sobranie e Jehovaskere svedokongoro sekova masek dela finansisko izveštaj ko ple sostanokija, kolende so šaj sekoj te avel. O smetkovodstvo taro sekova sobranie tano redovno proverimo te šaj te ova sigurna kaj o dobrovolna prilogija tane ispravno koristime (2. Korinkjanite 8:20, 21).

Sar šaj te den pe dobrovolna prilogija

• Kutie bašo prilogija: Šaj te čhive tlo prilog ko kutie bašo dobrovolna prilogija so arakhljona ko amare dvorane, kongresna sale ili ko javera thana kote so ikerena pe amare sostanokija.

• Prilogija preku internet: Ko but phuvja, preku i stranica Donacie, šaj te den pe prilogija debitno hem kreditno kartičkaja, preku elektronsko bankarstvo hem ko javera elektronska načinija.b Preku akala načinija, nesave Svedokija odredinena suma pare koja so sekova masek avtomatsko prefrlinela pe ki smetka tari organizacija (1. Korinkjanite 16:2).

  

• Javera načinija te del pe: Te šaj te de prilogija ko javera načinija šaj ka valjani angleder te kere nesave planija bašo adava hem/ili te rode sovet taro pravno sovetniko. Agjaar šaj te koristine ako ki tli phuv isi zakoni te na platine danok ili te platine pohari danok. Okola so mangena te den prilog ko nesave taro akala načinija akana, ili palo plo meribe, šaj te kontaktirinen e podružnicaja taro lengoro than te šaj te dobinen o potrebna informacie hem te doznajnen sar šaj te den prilogija preku:

  • bankovna smetke

  • životno ili penzisko osiguruvanje

  • imot

  • hartie tari vrednost hem obvrznice

  • testamentija

Bašo poviše informacie sar šaj te de dobrovolna prilogija, mečin ko linko Donacie.