Лука

1 Бут мануша лиле те пишинен сар ачшиле о букя, коленде аме-да верувинас. 2 Mануша, колато дикхле лен пе якхенца тай шунярде е Девлескере думес, също пхенде аменге калка букя. 3 Аке соске диньом всичко мандар те ахальовав сар точно ачшиле о букя йекх палал авересте тай решингьом ме-да те пишинав лен за туке, Теофиле, 4 за те ахальовес, кай си верна о букя, колато сикавде тут. 5 Кана о Ирод сине цари анди Юдея, сине йекх свещеники, колескоро алав сине Захария. Ов сине таре Авияскери група тай лескери ромни сине и Елисавета, е Ааронескери чшай. 6 О Захария тай лескери ромни сине лачше е Девлеске андо якха, соскето пхиренас лескере дроместе тай керенас всичко со пхенелас о Йехова. 7 Ама на сине лен чшаве, соскето и Елисавета нащине те кхамньол тай о дуй-да вече сине пхуре. 8 Йекх диес, жикай о Захария служинелас сар свещеники англал о Дел пере групаса, 9 пело пес леске те дел анде Йеховаскоро храми тай те тхарел тамяни, сарто керенас о свещеникя. 10 А о цело народос сине аври тай молиненас пес, жикай ов тхарелас о тамяни. 11 Тогава йекх таре Йеховаскере ангеля ало паш лесте тай заачшило таре олтариескери десно риг, кате тхарелас пес о тамяни. 12 Кана дикхляс лес, о Захария притеснисайло тай даранило. 13 Ама о ангели пхенгяс леске: „Ма дара, Захария, соскето о Дел шунгяс сар вогиестар молинесас тут. Ти ромни, и Елисавета, ка биянел туке чшес тай ка тховес лескоро алав Йоан. 14 Ка овел тут бари радост тай ка овес щастливо тай бут авер-да мануша ка овен щастлива, кай ов бияндило, 15 соскето ов ка овел баро е Йеховаске андо якха. Ама ов на требе те тховел пе мосте нисави мол или ракия. Още англал те биянгьол о Дел ка дел лес по свято духос 16 тай ов ка помагинел буте израилтяниенге те иринен пес паш о Йехова, ленгоро Дел. 17 О Дел ка бичшалел лес англал песте тай лес ка овел сар е Илияскоро духос тай сар лескери сила, за те керел е даденгере сърца смирена сар е чшавенгере тай те помагинел калкенге, колато на манген те шунен, те ачшовен гогявер сар о праведна. Ов ка подготвинел е народос те служинен е Йеховаске.“ 18 О Захария пхенгяс е ангелеске: „Сар ка ачшол давкха? Ме-да, ми ромни-да вече синям пхуре.“ 19 О ангели пхенгяс леске: „Ме синьом о Гавриил тай винаги синьом англал о Дел. Ов бичшалгяс ман те хоратинав туса тай те пхенав туке кайка лачши новина. 20 Ама ту ка лалоргьовес тай нащи ка хоратинес, жикай калка букя на ачшон, соскето на верувингян ко букя, колато пхенгьом тай колато ка ачшон точно кана пхенгяс о Дел.“ 21 А о мануша жаренас е Захарияс аври тай чудиненас пес соске си боркха бут време андо храми. 22 Кана иклило, ов нащине те пхенел ленге нищо тай о народос ахалиле, кай дикхляс чудо. Ов започнингяс те сикавел ленге вастенца со мангел те пхенел, соскето нащине те хоратинел. 23 Кана накхли лескери служба ко храми, ов гело песке кхере. 24 Хари палал далкхесте лескери ромни, и Елисавета, кхамнили тай панч масек на икльолас пумендар. Ой пхенелас: 25 „Со кергяс о Йехова за манге! Ов дикхляс ман тай кергяс те на овел вече состар те лажав англал о мануша.“ 26 Кана ой сине шове масекенгери, о Дел бичшалгяс е ангелес Гавриил ки диз Назарет, която си анди Галилея, 27 паш йекхе чшаяте, която жи акана на сине мрушеса тай сиго ка пранденелас йекхе мрушеске таре Давидескоро потомство. Лескоро алав сине Йосиф, а е чшаякоро алав сине Мария. 28 Тай кана о ангели ало паш лате, пхенгяс лаке: „Мария, ту синян бут благословиме! О Йехова си туса!“ 29 Ама ой бут притеснисайли тай започнингяс те чудинел пес со мангел те пхенел лаке. 30 Аке соске о ангели пхенгяс лаке: „Ма дара, Мария, соскето о Дел благословингяс тут. 31 Аке, ка кхамньос тай ка биянес чшес тай ка тховес лескоро алав Исус. 32 Ов ка овел баро тай ка пхенен за леске, кай си о Чшо е Най-барескоро. О Дел, о Йехова, ка дел лес о престоли лескере дадескоро, е Давидескоро, 33 тай ов завинаги ка овел цари упрал е Яковескере чшавенде. Лескоро царство ка ачшол завинаги.“ 34 Ама и Мария пучляс е ангелес: „Сар ка ачшол, щом нисар на ульом мрушеса?“ 35 О ангели пхенгяс лаке: „О Най-баро ка дел тут по свято духос тай пи сила. Аке соске о чшаво, колес ка биянес, ка овел свято тай ка овел е Девлескоро Чшо. 36 Ти ендани-да, и Елисавета, кхамнили, нищо кай си вече пхури. За лаке пхененас, кай нащи те овен ла чшаве, ама акана си шове масекенгери, 37 соскето е Девлеске нанай пхаро те керел всичко со пхенел.“ 38 Тогава и Мария пхенгяс: „Аке, ме синьом е Йеховаскери робиня! Нека ачшол, сарто пхенгян!“ Тогава о ангели гело песке. 39 После и Мария сигяргяс те жал йекхе юдейсконе дизате, която аракхльовелас ки планина. 40 Отхе бешелас о Захария тай ой гели ленде тай поздравингяс е Елисавета. 41 Кана и Елисавета шунгяс лакоро гласос, о бебес лакере вогиесте ритингяс тай о свято духос ало упрал лате 42 тай ой пхегяс: „Благословиме синян машкар саворе ромниенде тай о бебес те вогиесте-да си благословиме! 43 Коя синьом ме, кай ме Господариескери дай те авел паш манде? 44 Дикх, кана шунгьом то гласос, о бебес ме вогиесте ритингяс от радост. 45 Щастливо синян, кай верувинес, соскето ка ачшон саворе букя, колато пхенгяс туке о Йехова.“ 46 А и Мария пхенгяс: „Вогиестар хвалинав е Йеховас 47 тай ме сърцесте иси бари радост ашал о букя, колато кергяс за манге о Дел, моро Спасители. 48 Соскето ов дикхляс нателе кариг йекхе чшаяте, която шунел лес. От акана саворе мануша ка пхенен, кай синьом щастливо, 49 соскето о баро Дел кергяс баре букя за манге. Лескоро алав си свято 50 тай ов винаги сикавел милост кариг калкенде, колато даран лестар. 51 Ов кергяс баре букя пе силноне вастеса. Гонингяс калкен, колато си барикане пе сърцесте. 52 Ухлявгяс е барен таро престоля тай ленгере тханесте тховгяс манушен, колато си смирена. 53 Чаляргяс е бокхален шукаре букиенца, а е барвален бичшалгяс те жан песке чуче вастенца. 54 Ов помагингяс пере служителенге, е израилтяниенге, соскето на бистерел, 55 кай обещингяс амаре даденге, е Авраамиеске тай лескере чшавенге, вечно те сикавел милост кариг ленде.“ 56 И Мария ачшили паш лате декхате трин масек тай после ирисайли пе кхересте. 57 Ало о време и Елисавета те биянел тай биянгяс чшес. 58 Лакере комшидес тай лакере енданя шунде, кай о Йехова сикавгяс бари милост кариг лате тай лен-да сине бари радост. 59 Кана накхле охто диес, он але, за те керен обрязване е бебеске тай мангенас те тховен леске лескере дадескоро алав Захария. 60 Ама лескери дай пхенгяс ленге: „На-а, лескоро алав ка овел Йоан.“ 61 А он пхенде лаке: „Тере семействосте нанай мануш калке алавеса.“ 62 Тогава он вастенца пучле е дадес саво алав мангел ов те тховел пе чшеске, 63 а ов мангляс те ден лес йекх цикни пхал тай лате пишингяс: „Лескоро алав си Йоан.“ Тай саворе ачшиле путерде моса. 64 Веднага лескоро муй путердило тай започнингяс те хоратинел тай те хвалинел е Девлес. 65 Ленгере саворе комшидес дараниле тай саворе, колато бешенас ки Юдея, започнинде те хоратинен калке букиенге. 66 Тай саворе, колато шунде, мислиненас далкхеске тай чудиненас пес: „Саво ли ка овел кавка чшаво?“ Соскето дикхьолас, кай о Йехова си леса. 67 Тогава о свято духос ало упрал лескере дадесте, упрал о Захария, тай ов започнингяс те пхенел саве букя ка ачшон: 68 „Хвалинен е Йеховас, е Девлес е израилтяниенгоро, соскето ов на бистергяс пе народос тай спасингяс лен. 69 Ов диняс амен зорало спасители таро потомство лескере служителескоро, е Давидескоро, 70 точно сарто пхенгясас пе пророкиенге таро пуране диеса те пхенен аменге. 71 О Дел кергяс давкха, за те спасинел амен амаре душманиендар тай саворендар, колато мразинен амен, 72 Ов ка сикавел милост кариг аменде, сарто обещингяс амаре даденге, тай ка дел пес годи пере святоне договориеске, 73 е совеляке, която диняс е Авраамес, амаре дадес. 74 Ов диняс лес совел, кай кана ка спасинел амен амаре душманиендар, ка служинас леске без те дарас, 75 като цело животос синям леске верна тай дикхас те овас шуже лескере якхенде. 76 А ту, мо чшо, ка овес пророки е Най-барескоро. О Йехова ка бичшалел тут англал песте, за те подготвинес лескe о дром 77 тай те пхенес е народоске, кай ов ка спасинел лен, като простинел ленгере безеха, 78 соскето амаро Дел ахальовел е манушенгери дукх. Аке соске упрал аменде ка авел светлина таро небес, сарто кана дисльол, 79 за те ачшол светло е манушенге, колато си ки тъмнина тай кариг коленде авел о мериба. Кайка светлина ка сикавел аменге со требе те керас, за те овел амен мири е Девлеса.“ 80 А о чшаво барило тай ачшило гогявер, соскето е Девлескоро духос помагинелас леске. Ов бешелас ки пустиня, жикай на ало о диес те почнинел те проповединел е израилтяниенге.