Лука

2 Калке диесенде о императори Август пхенгяс те гинен саворе манушен ки пхув. 2 (Кавка първо преброяване ачшило, кана о Квириний сине управители анди Сирия.) 3 Саворе геле ко диза, коленде бияндиле, за те гинен лен. 4 О Йосиф-да цидингяс тари диз Назарет, която си анди Галилея, кариг е Давидескери диз Витлеем, която си анди Юдея, соскето сине таре Давидескоро потомство. 5 Ов гело те гинен лес заедно е Марияса, която вече сине лескери ромни тай сиго ка биянелас. 6 Жикай он сине отхе, ало о време ой те биянел 7 тай биянгяс пе първоне чшес, пакяргяс лес тай тховгяс лес те пашльол йекхе баланяте, колатар хан о животна, соскето на аракхле авер тхан, кате те совен. 8 Отхе сине пастиря, колато бешенас аври тай пазиненас пе бакрен презал и рат. 9 Изведнъж йекх таре Йеховаскере ангеля заачшило англал ленде тай бари светлина таро Йехова али турял ленде тай он бут дараниле. 10 Ама о ангели пхенгяс ленге: „Ма даран, соскето альом те пхенав туменге лачши новина, която ка анел бари радост саворе манушенге. 11 Авдиес ке Давидескери диз бияндило тумаро спасители, ковато си о Христос, о Господари. 12 Аке сар ка ахальовен кова си ов: ка аракхен бебес, ковато акана со бияндило. Ов си пакярдо тай пашльовел йекхе баланяте, колатар хан о животна.“ 13 Тогава жи ко ангели але пхердо ангеля, сар бари войска, колато гилябенас е Девлеске: 14 „Слава е Девлеске упре, а ки пхув мири е манушенге, колато си лачше лескере якхенде!“ 15 Кана о ангеля иринде пес ко небес, о пастиря започнинде те пхенен йекх авереске: „Айде веднага те жас ко Витлеем тай те дикхас давкха со о Йехова пхенгяс аменге, кай ачшило.“ 16 Тай он сиго геле тай аракхле е Мария, е Йосифес тай е бебес, ковато акана со бияндило тай совелас йекхе баланяте, колатар хан о животна. 17 Кана дикхле давкха, о пастиря пхенде всичко со пхенгяс ленге о ангели калке чшавеске 18 тай саворе колато шунде калка букя, ачшиле путерде моса. 19 А и Мария пазинелас пе сърцесте саворе калка думес тай мислинелас со означинен. 20 После о пастиря геле песке тай хвалиненас е Девлес, соскето саворе букя, колато шунде тай дикхле, сикавде, кай всичко со пхенде ленге сине верно. 21 Кана накхле охто диеса, керде обрязване е бебеске тай тховде лескоро алав Исус, сарто пхенгясас о ангели още англал и Мария те кхамньол леса. 22 После ало о време според о Закони, ковато о Дел диняс е Моисейес, те керен жертва, за те овен шуже англал о Дел. Тогава он ингалде е бебес ко Йерусалим, за те сикавен лес англал о Йехова тай те сикавен, кай о чшаво си лескоро, 23 сарто пишинел ке Йеховаскоро Закони: „Секо първо мруш, ковато ка биянгьовел, ка овел е Йеховаскоро.“ 24 Тай он керде жертва, сарто пишинел ке Йеховаскоро Закони: „Требе те дес дуй гургулицес или дуй цикокоре гълъбя.“ 25 А ко Йерусалим сине йекх ром, колескоро алав сине Симеон. Ов винаги керелас со мангел о Дел, бут сине вярващо тай жарелас те авел о време, кана о Дел ка спасинел пе народос. О Дел делас лес по свято духос 26 тай сикавгясас леске пе духоса, кай нанай те мерел жикай на дикхел калкес, колес о Йехова избирингяс те овел о Христос. 27 О свято духос ало упрал о Симеон тай ов гело ко храми тай кана и Мария тай о Йосиф анде е Исусес, за те керен о букя, колато пхенел о Закони, 28 ов лиляс лес пе вастенде тай започнингяс те хвалинел е Девлес, като пхенгяс: 29 „Господарю Най-бареа, акана ащи те мерав спокойно, соскето сарто обещингян манге, 30 ме якха дикхле калкес, колес бичшалгян, за те анел спасение 31 тай акана ащи те дикхен лес саворе народовя. 32 Ов си светлина тай ка махнинел и тъмнина, която учшарел е народовиен, тай ка анел слава тере народоске, е израилтяниенге. 33 А е чшавескоро дад тай лескери дай чудиненас пес со означинен о думес, колато шунде за леске. 34 Тай о Симеон благословингяс лен тай пхенгяс е чшавескере даяке, е Марияке: Ашал калке чшавеске бут мануша ко Израил ка перен тай пак ка ухкьен тай ка хоратинен против лесте, 35 за те дикхьол со иси буте манушенгере сърценде. Те жанес, Мария, бари чшури ка чшинел то воги. 36 Отхе сине йекх пророчица, и Анна. Лакоро дад сине о Фануил таре Асириескоро племес. Ой сине бут пхури. Отсарто лиле пес пе ромеса, живинде заедно само ефта бреш. 37 После ов муло тай ой ачшили коркори. Акана сине на 84 тай на накхелас диес без те жал ко храми. Служинелас е Девлеске цело диес тай цело рат, като постинелас тай молинелас пес вогиестар. 38 Тогава ой али жи ленде тай започнингяс те благодаринел е Девлеске тай те пхенел кова си кавка чшаво саворенге, колато жаренас о Дел те спасинел е израилтяниен. 41 Лескоро дад тай лескери дай секо бреш жанас ко Йерусалим, за те празнувинен и Пасха. 42 Тай кана ов сине на 12, он геле отхе, сарто винаги керенас. 43 Кана о празники свършингяс тай он цидинде те жан песке, о чшаво, о Исусес, ачшило ко Йерусалим без он те ахальовен. 44 Он мислиненас, кай ов пхирел заедно околенца тай чак кана накхло йекх диес, започнинде те роден лес паш пе енданиенде тай паш пе амаленде. 45 Ама като дикхле, кай нанай ленца, ирисайле ко Йерусалим тай родинде лес насекъде. 46 Накхле трин диес тай аракхле лес ко храми те бешел е учителенца, те шунел лен тай те пучел лен десавe букя. 47 Саворе, колато шуненас лес, чудиненас пес катар жанел боркха бут букя тай сар ащи те отговоринел ленгере въпросиенге. 49 Ама ов пхенгяс ленге: „Соске родингьен ман? На жангльен ли, кай ка овав ме Дадескере кхересте?“ 50 Ама он на ахалиле со мангелас те пхенел ленге. 51 После ов гело ленца ко Назарет тай сарто винаги, шунелас лен. А лескери дай пазинелас саворе калка думес пе сърцесте. 52 О Исусес барьолас тай ачшолас са по-гогявер тай са по-лачшо е Девлеске тай е манушенге андо якха.