Матей
3 Накхло хари време тай о Йоан Кръстител ало ки Юдейско пустиня те шунярел е Девлескере Царствоске. 2 Ов пхенелас: „Ачшовен пишмани тумаре безехенге, соскето амаро Цари, о Дел, сиго ка управлинел и пхув таро небес!“. 3 За леске о пророки Исаия пхенгяс: „Декхой пищинел ки пустиня: „Приготвинен е Йеховаскоро дром! Керен со требе, за те овел локо те пхирел пес лескере дроменде! 4 Е Йоанескоро шехи сине камиленгере балендар тай тховелас песке кожено колани. Ов халас скакалеця тай авгин. 5 Паш лесте жанас мануша таро Йерусалим, тари цело Юдея тай саворе гавендар, колато си турял и лен Йордан. 6 Он пхененас англал саворенде саве безеха керде тай ов покръстинелас лен анди лен Йордан. 7 Кана дикхляс, кай бут таро фарисея тай таро садукея авен ко тхан, кате ов покръстинелас е манушен, ов пхенгяс ленге: „Туме синьен сар сапа тай керен кханиле букя. Кой пхенгяс туменге, кай ащи те нашен таре Девлескоро наказание, ковато жарел тумен? 8 Първо сикавен е букиенца, колато керен, кай синьен пишмани. 9 Ма мислинен туменге: „Амаро дад си о Авраам.“! Соскето пхенав туменге, кай ако о Дел мангел, ащи калке барендар те керел чшаве е Аврамиеске. 10 О товер си вече жи ке каштенгере кореня тай си готово те чшинел лен. Секо йекх каш, ковато на дел шукар плодове, ка овел чшиндо тай чшивдо анди яг. 11 Ме покръстинав тумен паниеса, соскето синьен пишмани тумаре безехенге, ама кавка, ковато авел палал манде, си по-зорало мандар тай ме на синьом достойно даже те пинангярав лескере сандаля. Ов ка покръстинел тумен святоне духоса тай ягаса. 12 Пе вастесте икерел и лопата тай ка делинел о гив таро пхус. После ка чистинел кавка тхан тай ка кидел о гив андо хамбари, а о пхус ка тхарел ягаса, която нащи мударгьол“. 13 Тогава о Исусес ало тари Галилея жи ки лен Йордан, за те покръстинел лес о Йоан. 14 Ама о Йоан дикхляс те спиринел лес тай пхенгяс: „Ту ман требе те покръстинес, а ма ме тут!“. 15 О Исусес пхенгяс леске: „Ма спирине ман, соскето като покръстинес ман, ка керас давкха со мангел о Дел“. Тогава о Йоан покръстингяс лес. 16 Кана покръстисайло, о Исусес веднага иклило таро пани. Тогава о небес путердило тай о Йоан дикхляс е Девлескоро духос те ухльол сар гълъби, тай те авел упрал лесте. 17 Тай таро небес шундило гласос, ковато пхенгяс: „Кавка си мо любимо Чшо, ковато анел манге радост“.