Марко

17 Соскето о Ирод бичшалгясас манушен те долен е Йоанес тай те чшиен лес андо пханлибе ашал и Иродиада, която сине лескере пхралескери ромни, е Филипиескери тай кола о Ирод лилясас ромняке. 18 Соскето о Йоан пхенелас леске: „о Закони пхенел кай на требе те лес те пхралескере ромня“. 19 Аке соске и Иродиада мразинелас лес тай мангелас те мударел лес, ама нащине те керел лес, 20 соскето о Ирод уважинелас е Йоанес. Ов жанелас кай о Йоан керел давкха со си лачшо е Девлескере якхенде тай кай си е Девлескоро мануш, далкхеске пазинелас лес, никхой те на керел леске кханилипе. Кана о Йоан хоратинелас, сине леске бут шукар те шунел лес, далкхеске чудинелас пес со те керел леса. 30 О апостоля иринде пес паш о Исусес тай пхенде леске всичко со керде тай сар сикавде е манушен. 31 Ама бут народос жанас-авенас тай на ачшолас лен време даже те хан маро. Аке соске ов пхенгяс ленге: „Айде те жас йекхе тханесте, кате нанай никхой, за те почивинен туменге хари“. 33 Ама о народос дикхле, кай он жан, тай бут жене шунде далкхеске. Тай мануша саворе дизендар сигярде тай ресле жи отхе пхириндос англал ленде. 34 Кана ухлистило тари лодка, дихляс е манушен колато кхидисайлесас тай съжалингяс лен соскето сине мъчиме тай нашалде сар бакроре би пастирийескоро. Тай започнингяс те сикавел лен бут букя.