Откровение

14 Ваздингьом ме якха тай дикхльом е Бакрес ки планина Сион тай леса сине 144 000, коленгере чекатенде сине пишиме лескоро алав тай лескере Дадескоро алав. 4 Он на керде мръсна букя жувлиенца, на суте никхаса. Он си калка, колато пхирен палал о Бакро, кате-да те жал ов. Он сине кинде машкар о мануша сар първа плодове, колато требе те овен динде е Девлеске тай е Бакреске. 6 Тай дикхльом авере ангелес те урял ко небес тай те пхенел е манушенге ки пхув — е манушенге секоне народостар, племестар, чшибатар тай родостар, и лачши новина, която ка ачшол завинаги. 7 Ов пхенелас баре гласоса: „Даран таро Дел тай ден леске слава, соскето ало о диес ов те съдинел е манушен! Аке соске поклонинен тумен калкеске, ковато кергяс о небес тай и пхув, о морес тай саворе тхана, колендар икльон о паня!“