Йоан

2 Накхле дуй диес тай анди диз Кана сине бияв тай е Исусескери дай-да сине отхе. 2 Ко бияв канинде е Исусес тай лескере ученикиен-да. 3 Кана ачшили лен бут хари мол, е Исусескери дай пхенгяс леске: „Нанай лен мол“. 4 Ама о Исусес пхенгяс лаке: „Ми дай, давкха нанай амари бути. Още на ало о време те керав нещо“. 5 Тогава лескери дай пхенгяс калкенге, колато чшоренас и мол: „Керен со ка пхенел туменге“. 6 Отхе сине шов баре канес паниеске керде барестар, за те тховен о юдея пе васта англал те хан маро, сарто сине ленгоро обичай. Секо йекх кана киделас декхате 44-66 литра. 7 О Исусес пхенгяс ленге: „Пхерен о канес паниеса“. Тай он пхерде лен жи упре. 8 После пхенгяс ленге: „Акана чшорен хари тай ингален лес е манушеске, ковато дикхел ко бияв всичко те овел сарто требе“. Тай он ингалде леске. 9 Кавка мануш пробингяс и мол, която сине керди паниестар, без те жанел катар си ой (ама о мануша, колато чшоренас и мол, жаненас). Тогава викингяс е жамутрес 10 тай пхенгяс леске: „Саворе първо икален и шукар мол тай кана о мануша макьон хари, икален и мол, която нанай боркха шукар. А ту гаравгян и шукар мол тай чак акана икалгян ла“. 11 О Исусес кергяс по първо чудо ки диз Кана, която си анди Галилея тай сикавгяс пи сила. Тай лескере ученикя верувинде лесте. 12 Палал далкхесте ов гело андо Капернаум пе даяса, пе пхраленца тай пе ученикиенца, ама на ачшиле бут отхе. 13 Сиго о юдея ка празнувиненас и Пасха тай о Исусес гело андо Йерусалим. 14 Кана гело андо храми дикхляс калкен, колато бикиненас грувниен, бакрен тай гълъбиен, тай калкен, колато бешенас тай аравенас парес. 15 Тогава кергяс йекх камшики шелендар, гонингяс таро храми е бакрен тай е грувниен заедно е манушенца, колато бикиненас лен, тай чшоргяс о монетес е манушенгере, колато аравенас парес, тай ирингяс ленгере масес. 16 Тай пхенгяс е манушенге, колато бикиненас гълъбиен: „Махнинен калка букя атхар! Ме Дадескоро кхер нанай пазари!“. 17 Тогава лескере ученикя дине пес годи, кай си пишиме: „И любов кариг тере кхересте си сар яг ме сърцесте“. 18 А о юдея пучле лес: „Саво чудо ка керес, за те сикавес аменге, кай о Дел диняс тут и власт те керес калка букя?“. 19 О Исусес пхенгяс ленге: „Перавен кавка храми тай ме, трине диесенге ка керав лес пак“. 20 Тогава о юдея пхенде леске: „Требенас 46 бреша, за те керен кавка храми, а ту ка керес лес пак трине диесенге ли?“. 21 Ама кана пхенелас храми, ов хоратинелас пе телоске. 22 Кана ов сине възкресиме, лескере ученикя дине пес годи, кай ов пхенелас ленге давкха, тай верувинде, кай о букя, колато сине пишиме анде Девлескоро Слово, тай о букя, колато пхенгясас о Исусес, си верна. 23 Ама кана ов сине андо Йерусалим за ки Пасха, кергяс чудеса. Кана дикхле о чудеса, колато керелас, бут мануша верувинде лесте. 24 Ама е Исусес на сине доверие ленде, соскето жанелас саве мануша си он. 25 тай лес на сине нужда декхой те пхенел леске кой саво си, соскето ов жанелас со си е манушенге андо сърцес.