Деяния

5 А о Филип гело ки диз Самария тай отхе започнингяс те хоратинел е манушенге е Исусеске. 6 Саворе шуненас внимателно о букя колато пхенелас ов. Он шуненас тай дикхенас о чудеса колато керелас. 12 Ама кана верувинде е Филипиеске, ковато шунярелас и лачши новина е Девлескере Царствоске тай е Исусеске, колес избирингяс о Дел, покръстисайле мруша-да, жувля-да. 14 Кана о апостоля андо Йерусалим шунде, кай о мануша тари Самария приеминде е Девлескоро слово, бичшалде паш ленде е Петрес тай е Йоанес. 30 О Филип прастанило тай гело жи лесте тай шунгяс лес сар четинел наглас таро лил, ковато пишингяс о пророки Исаия, тай пхенгяс: „Ахальовес ли о букя, колато четинес?“ 31 Ов пхенгяс: „Со? Сар те ахальовав, ако никхой на сикавел ман?“ Тай викингяс е Филипиес те бешел жи лесте. 32 А ов четинелас наглас калка думес таре Девлескоро Слово: „Ингалдо сине сар бакро те чшинен лес тай сар цикно бакроро, ковато траньел, кана муравен лес, ов-да на путергяс по муй. 34 О евнухи пучляс е Филипиес: „Молинав тут, пхен манге, каске хоратинел о пророки? Песке или декаске авереске?“ 35 О Филип започнингяс те хоратинел калке стихиеске тай пхенгяс леске и лачши новина е Исусеске. 36 Он продължинде пе дроместе тай ресле жи йекхе тханесте, кате сине бут пани. Тогава о евнухи пхенгяс: „Дикх, атхе иси пани, со спиринел ман те покръстинав ман?“