Матей

3 Кана бешелас ки Маслиново планина, лескере ученикя але паш лесте коркоре тай пучле лес: Кана ка ачшон калка букя тай состар ка ахальовас, кай алян тай кай авел о крайос калке диесенгоро? 7 О народовя ка марен пес йекх авереса тай йекх държава ка ухкьол мамуй авере държавате, ка овел бокхалипе тай земетресения буте тханенде. 9 Тогава о мануша ка гонинен тумен, ка мударен тумен тай саворе народовя ка мразинен тумен, соскето синьен мере ученикя. 13 Кавка, ковато ка ачшол верно жи ко крайос, ка овел спасиме. 14 Ки цело пхув мере ученикя ка шунярен и лачши новина е Царствоске, за те шунен ла о мануша саворе народовиендар, тай тогава ка авел о крайос. 36 Никхой на жанел кана ка овел о диес тай о сахати, нито о ангеля ко небес, нито о Чшо, а само о Дад. 37 Соскето кана ка авел о Манушикано Чшо, о букя ка овен сарто сине кана живинелас о Ной. 38 Калке диесенде англал о потопи, о мануша ханас тай пиенас, о мруша ленас песке ромниен тай о жувля прандененас жи ко диес, кана о Ной диняс андо ковчеги. 39 Он на мангенас те жанен со ачшол, жикай на ало о потопи тай на мударгяс саворен, сарто ка овел, кана ка авел о Манушикано Чшо-да. 45 Кова си о верно тай гогявер служители, колес лескоро господари диняс и задача те дикхел околе служителенге лескере кхересте тай те дел лен хабе, кана требе? 46 Кавка служители ка овел щастливо, кана лекскоро господари иринел пес тай дикхел, кай ов керел и бути, която диняс лес. 47 Пхенав туменге и истина, о господари ка дел лес и задача те дикхел саворе букиенге, колато иси лес.