Матей

7 Тай кана молинен тумен, ма пхенен йекх тай също, сарто керен о мануша околе народовиендар, соскето он мислинен, кай о Дел ка шунел лен, ако пхенен бут букя. 8 Туме ма ачшон сар ленде, соскето тумаро Дад жанел со требел туменге още англал те пхенен леске. 9 Аке сар туме требе те молинен тумен: ‘Амаро Дад, ковато синян ко небес, молинас амен те овел свято торо алав. 10 Те авел торо Царство. Те ачшол давкха со ту мангес ки пхув, сарто ачшол ко небес. 12 тай простине амаре безеха, сарто аме простингям калкенге, колато грешинен против аменде. 13 Помагине аменге те на керас безех тай пазине амен таро Бенг. 14 Соскето ако простинен околенге, кана он грешинен, тумаро Дад-да ка простинел туменге. 15 Ама ако на простинен околенге, кана он грешинен, тумаро Дад-да нанай те простинел туменге. 22 Ако ти якх дикхел само кариг o най-важно, то цело телос ка овел светло. 25 Аке соске пхенав туменге: ма хан холи тумаре животоске, со ка хан, со ка пиен или тумаре телоске, со ка урявен. Нали о животос си по-важно таро хабе тай о телос таро шехя? 26 Дикхен внимателно е чириклен ко небес. Он на садинен, на киден, нито гаравен гив декхате, ама тумаро небесно Дад пхарварел лен. На синьен ли туме по-важна лендар? 31 Аке соске нисар ма хан холи тай ма пхенен ‘Со ка хас?’, или ‘Со ка пияс?’, или ‘Со ка урявас?’. 32 Соскето о мануша ден всичко пестар, за те овен лен калка букя. Ама тумаро небесно Дад жанел со требел туменге. 33 Аке соске продължинен те тховен ко първо тхан тумаре животосте о Царство тай давкха со си лачшо е Девлеске андо якха. Тогава о Дел ка дел тумен саворе авер букя, колато требен туменге.