Йоан

3 Машкар о Фарисея сине йекх мануш, колескоро алав сине Никодим. Ов сине йекх таро юдейска водачя. 2 Ов ало паш о Исусес машкар и рат тай пхенгяс леске: „Учителю, жанас кай о Дел бичшалгяс тут те сикавес амен, соскето никхой нащи те керел о букя колато ту керес, ако о Дел нанай леса“. 3 О Исусес пхенгяс леске: „Верувине манде, ако мануш на биянгьовел пак, нащи те овел анде Девлескоро Царство“. 4 А о Никодим пучляс лес: „Сар ащи мануш те биянгьовел щом си вече баро? Никхой нащи те дел пе даякере вогиесте тай пак те биянгьовел, нали?“. 5 О Исусес пхенгяс леске: „Верувине манде, за те овел мануш анде Девлескоро Царство, требе те биянгьовел пак, демек те дел цело андо пани тай е Девлескоро свято духос те авел упрал лесте. 6 Калка колато биянгьовен таро мануша си е пхувяке, ама калкa колен о Дел избиринел пе святоне духоса си за ко небес. 7 Ма чудине тут кай пхенгьом туке кай требе те биянгьовен пак. 8 И балвал пхудел накате мангел тай шунес ла сар пхудел, ама на жанес катар авел тай кате жал. О също си секоне йекхе манушеса колес о Дел избиринел лескере святоне духоса; на ахальовес сар ачшол давкха“. 9 Тогава о Никодим пучляс лес: „Ама сар ащи те ачшон калка букя?“. 10 О Исусес пхенгяс леске: „Сар ащи те овес учители ко Израил тай те на жанес калка букя? 11 Верно пхенав туке: хоратинас далкхеске со жанас тай далкхеске со дикхлям, ама туме на приеминен давкха со пхенас. 12 Хоратингьом туменге букиенге колато си атхе ки пхув, ама туме на верувинен далкхесте со пхенав туменге. Тогава сар ка верувинен, ако хоратинав туменге букиенге колато си ко небес? 13 Никхой на гело ко небес, освен о Манушикано Чшо, ковато ало таро небес. 14 Тай сарто о Моисей ваздингяс е сапес упрал каштесте, кана сине анди пустиня, е Манушикане Чшес-да ка вазден учесте, 15 за те ащи секой ковато верувинел лесте те живинел вечно. 16 Соскето о Дел боркха бут дехингяс е манушен таро светос, кай диняс пе йекхоре Чшес, за те ащи секой ковато верувинел лесте, те на овел унищожиме, а те живинел вечно. 17 Соскето о Дел бичшалгяс пе Чшес ко светос ма за те съдинел е манушен, а за те овен спасиме ашал далкхеске со ка керел ов. 18 Кавка ковато сикавел вяра лесте, нанай те овел осъдиме. А кавка ковато на сикавел вяра, вече си осъдиме, соскето на сикавгяс вяра андо алав е Девлескере йекхоре Чшескоро. 19 Аке ашал соске ка овен съдиме о мануша: соскето и светлина али ко светос, ама о мануша дехенас и тъмнина, а ма и светлина, соскето керенас кханилипе. 20 Соскето секой ковато керел кханиле букя, мразинел и светлина тай на авел кариг лате, за те на дикхьон о кханиле букя колато керел. 21 Ама секой ковато керел букя колато си лачше е Девлескере якхенде, авел кариг и светлина, за те дикхьол кай о букя колато керел, си сарто мангел о Дел“. 22 После о Исусес тай лескере ученикя геле ко гава колато си ки Юдея тай ов ачшило хари време отхе ленца тай покръстинелас манушен. 23 Ама о Йоан-да покръстинелас манушен ко Енон, ковато си паше жи ко Салим, соскето отхе сине бут пани. О мануша авенас паш лесте тай ов покръстинелас лен. 24 Давкха сине англал те чшиен лес андо пханлибе. 25 Тай е Йоанескере ученикя почнинде те ден пес йекхе манушеса таро Юда, далкхеске со пхенел о закони кай требе те керел мануш, за те овел шужо англал о Дел. 26 Тай он але паш о Йоан тай пхенде леске: „Учителю, жанес ли кай о мануш ковато сине туса околе ригатар тари лен Йордан тай колеске пхенгян кай о Дел бичшалгяс лес, акана покръстинел тай саворе жан паш лесте?“. 27 О Йоан пхенгяс: „Мануш нащи те керел нищо, освен ако о Дел на дел лес те керел давкха. 28 Ме пхенгьом кай на синьом о Христос, а кай о Дел бичшалгяс ман англал лесте, тай туме шунгьен давкха тумаре каненца. 29 Кавка ковато лел е боря, ов си о жамутро. Ама е жамутрескоро амал, кана бешел паше жи лесте тай шунел лес те хоратинел е боряса, иси лес бари радост. Аке соске мери-да радост си бари. 30 Лескере ученикя требе те ачшон са по-бут, а мере требе те ачшон са по-хари“. 31 Кавка ковато авел упрал, си по-баро саворе манушендар. Ама кавка ковато си тари пхув, хоратинел букиенге колато си ки пхув, соскето си тари пхув. Кавка ковато авел таро небес, си по-баро саворе манушендар. 32 Ов хоратинел е букиенге колато дикхляс тай шунгяс кана сине ко небес, ама никхой на мангел те верувинел далкхесте со пхенел. 33 Кавка ковато верувинел далкхесте со пхенел ов, сикавел кай си сигурно кай о Дел пхенел и истина. 34 Соскето кавка колес о Дел бичшалгяс, хоратинел е Девлескере думес, соскето о Дел си путерде вастенгоро кана дел по духос. 35 О Дад дехел е Чшес тай мукляс всичко лескере вастенде. 36 Калка колато верувинен лесте, ка живинен вечно, а калка колато на шунен лес, нанай те живинен вечно. O Дел ка продължинел те нерверинел пес лендар.