Лука

5 Йекх диес, кана о Исусес сине жи ко Генисаретско езеро, турял лесте кидисайле бут мануша за те шунен е Девлескоро слово. 2 Ов дикхляс кай ко езеро сине дуй лодкес тай кай о рибаря иклилесас лендар тай тховенас пе мрежес. 3 Тогава чшивгяс пес йекхе лодкате, която сине е Симониескери, тай пучляс лес дали ащи те жан хари по-наандре ко езеро. После бешло ки лодка тай почнингяс те сикавел е народос. 4 Кана спирингяс те хоратинел, пхенгяс е Симониеске: „Айде те жас по-наандре кате о пани си хор тай те чшиен тумаре мрежес отхе“. 5 А о Симон пхненгяс леске: „Учителю, цело рат мъчисайлям тай нищо на долгям, ама щом ту пхенес, ка чшияв о мрежес“. 6 Кана керде давкха, долде боркха бут мачше кай ленгере мрежес започнинде те пхарагьон. 7 Далкхеске вастеса викинде пе амален околе лодкатар, те авен тай те помагинен ленге. Тай он але тай пхерде о дуй-да лодкес боркха буте мачшенца кай почнинде те потънинен. 8 Кана о Симон Петър дикхляс со ачшило, пело кочиенде англал о Исусес тай пхенгяс: „Господарю, ме на заслужинав те овав жи туте, соскето синьом безехало мануш“. 9 Соскето кана ов тай калка колато сине леса, дикхле кибор бут мачше долде, ачшиле путерде моса тай на жаненас со те пхенен 10 тай о също ачшило е Яковеса тай е Йоанеса, е Зеведейескере чшаве, колато керенас бути е Симониеса. Ама о Исусес пхенгяс е Симониеске: „Ма дара! От акана ка долес манушен, сарто долес мачшен“. 11 Тай он икалде о лодкес таро езеро, мукле всичко тай геле леса. 32 Ме на альом атхе е манушенге, колато керен со си лачшо е Девлеске андо якха, а альом те помагинав е безехале манушенге те овен пишмани пе безехенге.