Матей

4 После е Девлескоро духос ингалгяс е Исусес ки пустиня, кате о Бенг изкушингяс лес. 2 На халяс 40 диеса тай 40 ракя тай бут бокхалило. 3 Тогава ало паш лесте о Бенг тай дикхляс те традел лес те керел безех тай пхенгяс: „Ако синян е Девлескоро чшо, пхен калка бара те ачшон маре“. 4 Ама ов пхенгяс: „Анде Девлескоро Слово пишинел: „Мануш нащи те живинел само мареса, ама требел леске секо йекх дума-да, която пхенел о Йехова“. 5 После о Бенг ингалгяс лес ко Йерусалим тай чшивгяс лес ко най-учо тхан ко храми 6 тай пхенгяс леске: „Ако синян е Девлескоро чшо, хърпине атхар, соскето си пишиме: „Ов ка бичшалел пе ангелен те пазинен тут“ тай „Он ка лен тут пе вастенде, за те на чалавес то пиро баресте“. 7 О Исусес пхенгяс леске: „Давкха-да си пишиме анде Девлескоро Слово: „Ма траде е Йеховас, тере Девлес, те сикавел дали ащи те помагинел туке“. 8 После о Бенг ингалгяс лес йекхе бут уче планинате тай сикавгяс леске саворе правителства ки пхув тай ленгоро барвалипе 9 тай пхенгяс леске: „Ка дав тут саворе калка букя, ако перес кочиенде тай поклонинес тут манге!“ 10 Тогава о Исусес пхенгяс леске: „Наш мандар, Сатана! Соскето си пишиме: „Тере Девлеске, е Йеховаске, требе те поклонинес тут тай само леске требе те служинес“. 11 Тогава о Бенг мукляс лес тай паш лесте але ангеля те помагинен леске. 13 Ов гело песке таро Назарет тай гело те бешел жи ко езеро ки диз Капернаум, ки пхув която сине е Завулониескери тай е Нефталимиескери, 14 за те ачшол давкха со сине пишиме таро пророки Исаия: 15 „Туме, колато синьен таре Завулониескери пхув тай таре Нефталимиескери пхув тай синьен ко дром кариг о морес, околе ригатар тари лен Йордан анди Галилея, кате бешен мануша околе народовиендар! 16 О мануша колато сине анди тъмнина, дикхле бари светлина тай упрал калкенде колато бешенас отхе кате о мериба учшарел е манушен сар сянка, али бари светлина“. 19 Тай пхенгяс ленге: „Елан манца тай ме ка сикавав тумен сар те овен рибаря колато долен манушен“.