О Исус винаги уло послушно

Винаги ли си туке лесно те шунес те родителен? — Подекхана си трудно. Жанес ли кай о Исус уло послушно сарто е Йеховаске, чука пе родителенге–да? — Лескоро примери ащи те помагинел туке те шунес те дая тай те дадес дори кана си туке трудно. Нека те ахальовас по–бут е Исусескере примериеске.

Англал те авел ки пхув, о Исус уло пе Дадеса, е Йеховаса, андо небес. Ама уло лес родителя ки пхув–да. Он пхененас пес Йосиф тай Мария. Жанес ли сар он ачшиле родителя е Исусескере? —

О Йехова лиляс е Исусескоро животос таро небес тай тховгяс лес анде Мариякоро воги, за те ащи ов те биянгьол тай те живинел ки пхув. Давкха уло чудо! О Исус барьолас анде Мариякоро воги точно сар о бебета барьон пе дайенгере вогиенде. Декхате еня масек палал далкхесте, о Исус бияндило. Аке сар и Мария тай лакоро ром, о Йосиф, ачшиле родителя е Исусескере ки пхув.

Кана о Исус уло само 12 брешенгоро, кергяс варесо ковато сикавгяс кизом бут дехел пе Дадес, е Йеховас. Пере семействоса геле чак андо Йерусалим, за те празнувинен и Пасха. Кана ириненас пес, о Йосиф тай и Мария нащине те аракхен е Исусес. Жанес ли кате уло ов? —

О Йосиф тай и Мария сиго ирисайле андо Йерусалим тай започнинде те роден е Исусес. Бут ханас холи, соскето никхате нащине те аракхен лес. Ама палал трин диес аракхле лес андо храми. Жанес ли соске о Исус уло отхе? — Соскето андо храми ащине те сикльовел пе Дадеске, е Йеховаске. Ов дехелас е Йеховас тай мангелас те жанел сар те овел леске угодно. Даже кана барило тай ачшило баро мруш, о Исус винаги шунелас е Йеховас. Ов уло послушно дори кана уло леске трудно тай кана давкха означинелас кай ка страдинел. А шунелас ли също е Йосифес тай е Мария? — Ва, и Библия пхенел кай шунелас лен.

Со сикльовес таре Исусескоро примери? — Требинел те шунес те родителен дори кана си туке трудно. Ка шунес ли лен? —