6 ШЕРО
Со ачшол аменца, кана мерас?
1–3. Со пучен пес о мануша е меримнаске тай со пхенен десаве кхангеря?
И БИБЛИЯ пхенел аменге, кай ка авел диес, кана „вече нанай те овел мериба“. (Откровение 21:4) Таро 5 шеро ахалилям, кай о откупи дел амен и възможност те живинас вечно. Ама о мануша панда мерен. (Еклисиаст 9:5) Адалкхеске йекх важно въпроси, ковато задас аменге, си: „Со ачшол аменца, кана мерас?“
2 О отговори далкхе въпросиеске си бут важно, особено кана мерел декхой, колес дехас. Ащи те пучас амен: „Кате си ов? Дали страдинел? Дикхел ли амен? Ащи ли те помагинел аменге? Ка дикхас ли лес пак декхана?“
3 О кхангеря ден различна отговоря далкхе въпросиенге. Десаве лендар сикавен, кай ако синян лачшо мануш, ка жас ко небес, а ако синян кханило, ка тхабльос андо ади. Десаве пхенен, кай кана мерес, ачшос духос тай живинес тере енданиенца, колато муле. Авер пхенен, кай кана мерес, ка овес съдиме тай ка биянгьовес отново или ка живинес пак авере телосте, сар мануш или даже сар животно.
4. Саво общо варесо сикавен о кхангеря е меримнаске?
4 О кхангеря сикавен бут различна букя. Ама почти саворе сикавен варесо общо. Он сикавен, кай кана мануш мерел, варесо лестар продължинел те живинел. Ама дали си чука?
СО АЧШОЛ АМЕНЦА, КАНА МЕРАС?
5, 6. Со ачшол аменца, кана мерас?
5 О Йехова жанел со ачшол аменца, кана мерас тай ов пхенгяс аменге, кай кана мануш мерел, лескоро животос свършинел. Кана декхой мерел, нищо лестар на продължинел те живинел.a Кана мерас, нащи те дикхас, нащи те шунас тай нащи те мислинас.
6 И Библия пхенел, кай „о муле нищо на жанен“. О муле нащи те дехен, нито те мразинен тай „нанай нито бути, нито замисъл, нито познание, нито мъдрост андо мимори“. (Четине Еклисиаст 9:5, 6, 10.) Андо Псалм 146:4 пхенел пес, кай кана декхой мерел, „лескере мислес“ изчезнинен.
СО ПХЕНГЯС О ИСУСЕС Е МЕРИМНАСКЕ
О Йехова кергяс е манушен те живинен вечно ки пхув
7. Со пхенгяс о Исусес е меримнаске?
7 Кана лескоро лачшо амал, о Лазарес, муло, о Исусес пхенгяс пе ученикиенге: „Амаро амал, о Лазарес, засуто.“ Ама е Исусес на сине предвид, кай о Лазарес совелас. Палал далкхесте о Исусес пхенгяс: „О Лазарес муло.“ (Йоан 11:11–14) Ачука о Исусес сикавгяс, кай о мериба си сар сойба. Ов на пхенгяс, кай о Лазарес гело ко небес или кай уло пере енданиенца, колато муле. Нито пхенгяс, кай о Лазарес мъчинелас пес андо ади или кай бияндило отново сар мануш или животно. О Лазарес все едно совелас хор. Авер–да стиховя сикавен, кай о мериба си сар сойба. И Библия пхенел, кай кана о Стефан уло мудардо, „засуто андо мериба“. (Деяния 7:60) О апостол Павел–да пишингяс, кай десаве християня „засуте андо мериба“. (1 Коринтяни 15:6)
8. Катар жанас, кай о Дел на кергяс е манушен те мерен?
8 Кана о Дел кергяс е Адамиес тай е Ева, дали мангелас он те мерен? На–а! Кергяс лен те овел лен съвършено састипе тай те лошанен е животоске вечно. О Йехова кергяс е манушен те манген те живинен вечно. (Еклисиаст 3:11) О родителя на манген те дикхен пе чшавен те пхурьон тай те мерен. О Йехова–да на мангел давкха аменге. Ама ако о Дел кергяс амен те живинас вечно, соске мерас?
СОСКЕ МЕРАС?
9. Соске и заповед, която диняс о Йехова е Адамиес тай е Ева, на сине пхари?
9 Анди Едемско градина о Йехова пхенгяс е Адамиеске: „Ащи те хас секоне каштестар анди градина, бискай на чальос. Ама таро каш далкхеске те жанел пес со си лачшипе тай со си кханилипе те на хас, соскето андо диес, кана ка хас лестар, непременно ка мерес.“ (Битие 2:9, 16, 17) Дайкха ясно заповед на сине пхари, тай е Йеховас сине право те пхенел е Адамиеске тай е Еваке со си лачшипе тай со си кханилипе. Ако шуненас е Йеховас, ка сикавенас леске, кай уважинен лескери власт. Също ка сикавенас леске кизом си благодарна саворе букиенге, колато диняс лен ов.
10, 11. а) Сар о Бенг хохавгяс е Адамиес тай е Ева? б) Соске нанай нисаво оправдание далкхеске со керде о Адам тай и Ева?
10 За съжаление, о Адам тай и Ева на шунде е Йеховас. О Бенг пхенгяс е Еваке: „Наистина ли о Дел пхенгяс те на хан секоне каштестар анди градина?“ И Ева пхенгяс леске: „Ащи те хас о плоди таро кашта анди градина, ама е плогиеске таро каш, ковато си ко машкар анди градина, о Дел пхенгяс: ‘Ма хан лестар тай ма долен лес, за те на мерен!’“ (Битие 3:1–3)
11 Тогава о Бенг пхенгяс: „Нисар нанай те мерен! Соскето о Дел жанел, кай андо диес, кана ка хан лестар, тумаре якха ка путергьон тай ка ачшон сар о Дел — ка жанен со си лачшипе тай со си кханилипе.“ (Битие 3:4–6) О Бенг мангелас и Ева те мислинел, кай ащи те решинел коркори со си лачшипе тай со си кханилипе. Ов хохавгяс далкхеске–да со ка ачшолас, ако ой на шунелас е Девлес. О Бенг пхенгяс, кай и Ева нанаяс те мерел, адалкхеске и Ева халяс таро плоди тай диняс пе ромес–да те хал. О Адам тай и Ева жаненас, кай о Йехова пхенгясас ленге те на хан таро плоди. Кана хале лестар, решинде те на спазвинен йекх ясно заповед, която на сине пхари. Ачука сикавде, кай на уважинен пере небесноне Дадес, ковато бут дехелас лен. Нанай нисаво оправдание далкхеске со керде!
12. Соске си холяке, кай о Адам тай и Ева на шунде е Йеховас?
12 Бут си холяке, кай о първа мануша на сикавде уважение кариг далкхесте, ковато кергяс лен! Сар ка овелас туке, ако дес всичко тутар те барярес те чшавес тай те чшая, а он ухкьен мамуй туте тай вместо те шунен тут, керен песке со манген? Нанаяс ли те чшиньол то воги ашал далкхеске?
О Адам уло кердо пхувятар тай ирисайло анди пхув
13. Со означиненас е Йеховаскере хоратес „анди пхув ка иринес тут“?
13 Кана на шунде е Девлес, о Адам тай и Ева измукле и възможност те живинен вечно. О Йехова пхенгясас е Адамиеске: „Соскето синян пхув тай анди пхув ка иринес тут.“ (Четине Битие 3:19.) Давкха означинелас, кай о Адам пак ка ачшолас пхув, все едно нисар на уло създиме. (Битие 2:7) Кана кергяс безех, о Адам муло тай спирингяс те съществувинел.
14. Соске мерас?
14 Ако о Адам тай и Ева шуненас е Девлес, панда ка овенас живде. Ама кана на шунде лес, керде безех тай ко крайос муле. И безех си сар кханило насвалипе, ковато наследингям таро Адам тай тари Ева. Саворе биянгьовас безехале, адалкхеске мерас. (Римляни 5:12) Ама о Дел на мангел давкха е манушенге. Ов нисар на мангляс о мануша те мерен. И Библия пхенел, кай о мериба си „душмани“. (1 Коринтяни 15:26)
И ИСТИНА ОСВОБОДИНЕЛ АМЕН
15. Сар освободинел амен и истина е меримнаске?
15 И истина е меримнаске освободинел амен таро хохавне букя, коленде верувинен бут мануша. И Библия сикавел амен, кай е мулен на дукхал лен тай нанай ленге пхаро. Нащи те хоратинас ленца, а он–да нащи те хоратинен аменца. Нащи те помагинас е муленге, а о муле–да нащи те помагинен аменге. Нащи те керен аменге кханилипе, адалкхеске на требе те дарас лендар. Бут кхангеря пхенен, кай о муле живинен декхате тай ащи те помагинас ленге, ако дас декхас парес, за те керел десави церемония или ритуали ленге. Ама кана жанас и истина е меримнаске, на хохавгьовас далкхе букиендар.
16. Саво хохайбе сикавен бут кхангеря е муленге?
16 О Бенг използвинел и хохавни религия, за те хохавел амен тай те традел амен те мислинас, кай о муле продължинен те живинен. Например десаве кхангеря сикавен, кай кана мануш мерел, варесо лестар продължинел те живинел декхате авретхе. Дали тери кхангери сикавел тут далкхесте или сикавел давкха со пхенел и Библия е муленге? О Бенг използвинел хохайбе, за те цидел е манушен таро Йехова.
17. Соске о учение, кай о мануша тхабльон андо ади, си обидно е Йеховаске?
17 О букя, колато сикавен бут кхангеря си даракере. Например десаве сикавен, кай о кханиле ка тхабльон вечно андо ади. Давкха хохайбе си обидно е Йеховаске. Ов нисар нанаяс те домукел о мануша те мъчинен пес чука. (Четине 1 Йоан 4:8.) Со ка мислинес манушеске, ковато накажинел пе чшавес, като тхарел лескере васта анди яг? Ка мислинес, кай ов си бут кханило. Нанай те мангес те овес лескоро амал. Точно чука мангел о Бенг те мислинас е Йеховаске!
18. Соске на требе те дарас таро муле?
18 Десаве кхангеря пхенен, кай кана о мануша мерен, ачшон духовя. Он сикавен, кай требе те уважинас далкхе духовиен, даже те дарас лендар, соскето он ащи те ачшон аменге или лачше амала или даракере душманя. Бут мануша верувинен далкхе хохаймнасте. Он даран таро муле, адалкхеске поклонинен пес ленге, а ма е Йеховаске. Де тут годи, кай о муле на чувствинен тай на ахальовен нищо, адалкхеске на требе те дарас лендар. О Йехова си амаро Създатели. Ов си о истинско Дел тай требе те поклонинас амен само леске. (Откровение 4:11)
19. Сар помагинел аменге давкха кай жанас и истина е меримнаске?
19 Кана жанас и истина е меримнаске, аме синям свободна таро хохавне учения. Дайкха истина помагинел аменге те овас сигурна, кай о Йехова ка керел бут шукар букя аменге андо бъдеще.
20. Со ка ахальовас таро следващо шеро?
20 Андо пуране диеса, йекх служители е Девлескоро, ковато пхенелас пес Йов, пучляс: „Ако мануш мерел, ка живинел ли пак?“ (Йов 14:14) Ащи ли наистина о муле те живинен пак? О отговори, ковато дел амен о Дел анди Библия, си бут шукар. Ка ахальовас лес таро следващо шеро.
a Десаве мануша мислинен, кай кана декхой мерел, лескери душа или лескоро духос продължинел те живинел. За те ахальовес по–бут, дикх и 17 тай и 18 бележка ко крайос далкхе лилесте.