Сикльов те мислинес сар о Йехова тай сар о Исусес

1-2. Со означинел те дехас е Йеховас тай сар о Исусес сикавгяс, кай дехел лес пе целоне гогяса?

О Исусес сикавгяс коя си и най-важно заповед таро Закони, ковато о Дел диняс е Моисейес, като пхенгяс: „Дехе тере Девлес, е Йеховас, те целоне сърцеса, те целоне вогиеса, те целоне силаса тай те целоне гогяса.“ (Лука 10:27) Аме дехас е Йеховас всичконаса со иси амен тай далкхеса саве мануша синям, демек далкхеса со мангас тай чувствинас, е букиенца, колато иси амен сила те керас, тай далкхеса сар мислинас. Аме нисар нанай те ащи те ахальовас напълно сар мислинел о Йехова. Ама ако изучинас сар мислинел о Исусес, ка ахальовас по-лачшес сар мислинел лескоро Дад, соскето о Исусес мислинел точно сар лесте. (1 Кор. 2:16)

² О Исусес дехелас пе дадес пе целоне гогяса. Ов жанелас со мангел о Дел лестар тай кергяс лес, даже кана сине леске бут пхаро. Като мислинелас най-бут далкхеске сави си лескере Дадескери воля, о Исусес на мукляс авер букя те ачшон по-важна за леске.

3. Со сиклило о Петрес таро Исусес тай со пхенгяс, кай требе те керен о християня? (1 Петър 4:1)

³ О Петрес тай окола апостоля, сине е Исусеса тай ащине те ахальовен сар мислинел ов. Кана о Петрес пишингяс по първо лил, ковато о Дел пхенгяс леске те пишинел, ов пхенгяс е християниенге, кай требе те подготвинен пес те мислинен сар о Исусес. (Четине 1 Петър 4:1.) Кана пишингяс „подготвинен тумен“, о Петрес използвингяс думес, колато пхенен о войникя, кана лен о букя, колато ка требен ленге, за те жан ки война. Ако о християня дикхен те мислинен сар о Исусес, лен ка овел всичко со требел ленге, за те побединен е Бенгескоро светос тай секо йекх мисъл, която традел лен те керен кханилипе. (2 Кор. 10:3-5; Еф. 6:12)

4. Сар кавка уроки ка помагинел аменге те керас со пхенгяс о Петрес?

⁴ Ка дикхас сар мислинелас о Исусес тай сар аме ащи те мислинас сар лесте. Ка ахальовас сар ащи 1) те мислинас сар о Йехова, за те овас йекх амаре пхраленца тай пхениенца, 2) те овас смирена тай 3) те овас гогявер, като мукас амен е Йеховаске андо васта тай молинас амен леске.

МИСЛИНЕ САР О ЙЕХОВА

5. Сар йекхвар о Петрес сикавгяс, кай на мислинел сар о Йехова?

⁵ Дикх сар йекхвар о Петрес сикавгяс, кай на мислинел сар о Йехова. О Исусес пхенгясас пе апостоленге, кай требе те жал ко Йерусалим, кате ка долен лес, ка марен лес тай ка мударен лес. (Мат. 16:21) О Петрес жанелас, кай о Исусес си о Месия, ковато ка спасинел е Девлескере народос тай нащине верувинел, кай о Йехова ка домукел те мударен лес. (Мат. 16:16) Аке соске о Петрес цидингяс е Исусес ригате тай пхенгяс леске: „Господарю, ов лачшо кариг туте, давкха нанай те ачшол туса.“ (Мат. 16:22) О Исусес тай о Петрес на мислиненас еднакво, соскето о Петрес на мислинелас сар о Йехова.

6. Сар о Исусес сикавгяс, кай мислинел сар о Йехова?

⁶ О Исусес жанелас сар мислинел лескоро Дад тай мислинелас точно сар лесте. О Исусес пхенгяс е Петреске: „Наш мандар, Сатана! Ту синян сар бар ме дроместе, колесте ащи те съпнинав ман, соскето на мислинес сар о Дел, а сар о мануша.“ (Мат. 16:23) О Петрес пхенгясас калка букя лачшипнастар, ама о Исусес на мангляс те шунел лес, соскето жанелас, кай за те керел е Йеховаскери воля, ка требе те мъчинел пес тай те мерел. О Петрес ахалило, кай требе те сикльол те мислинел сар о Дел тай аме-да требе те сикльовас о също.

7. Сар по-късно о Петрес сикавгяс, кай мангел те мислинел сар о Йехова? (Дикх и картинка.)

⁷ По-късно о Петрес сикавгяс, кай мангел те сикльол те мислинел сар о Йехова. Ало о време о Йехова те мукел о мануша околе народовиендар те авен лескере народосте. О Дел бичшалгяс е Петрес те жал паш ко Корнилий тай те проповединел леске. О Корнилий сине йекх таро първа мануша, колато преди служиненас авере девленге, ама ачшиле християня. О юдея на мангенас те овел лен нищо общо е манушенца, колато служинен авере девленге. О Петрес требелас те променинел давкха сар мислинел, за те ащи те проповединел ленге. Кана ахалило со мислинел о Дел калке манушенге, ов започнингяс те мислинел сар лесте. Аке соске кана о Корнилий викингяс лес, о Петрес веднага гело паш лесте. (Деян. 10:28, 29) Ов проповедингяс леске тай саворе манушенге лескере кхерестар тай он покръстисайле. (Деян. 10:21-23, 34, 35, 44-48)

8. Сар ащи те сикавас, кай мислинас сар о Йехова? (1 Петър 3:8)

⁸ Кана накхле десаве бреша о Петрес пхенгяс пе пхраленге тай пе пхениенге те „овен йекхе гогяте“. (Четине 1 Петър 3:8.) Аме ащи те мислинас сар амаре пхраленде тай пхениенде, ако сикльовас тари Библия сар мислинел о Йехова тай дикхас те мислинас сар лесте. Например о Исусес пхенгяс пе ученикиенге те тховен о Царство ко първо тхан пе животосте. (Мат. 6:33) Аке соске декхой таро сбори ащи те решинел те започнинел те служинел сар пионери или те керел авер букя анди служба. Вместо те пхенас леске, кай требе те дикхел пере лачшипнаске, требе те хвалинас лес тай те дикхас те помагинас леске.

ОВ СМИРЕНО

9-10. Сар о Исусес сикавгяс баро смирение?

⁹ Ки рат англал те мударен лес, о Исусес мангляс те сикавел е Петрес тай околе апостолен те овен смирена. По-рано о Исусес бичшалгясас е Петрес тай е Йоанес те подготвинен о букя, за те хан заедно за последно, англал те мерел. Йекх таро букя, колато сигурно требелас те керен, сине те дикхен те овел легени тай кърпа, за те ащи о госкя те тховен пе пире англал те хан. Ама кой ка овелас боркха смирено, за те тховел околенгере пире?

¹⁰ О Исусес сине готово те керел давкха тай сикавгяс баро смирение. Сигурно е апостоленге сине бут чудно сар о Исусес керел нещо, ковато керелас йекх слуга. О Исусес нангило по горно шехи, пханляс пес йекх кърпаса, чшоргяс пани ко легени тай започнингяс те тховел ленгере пире. (Йоан 13:4, 5) О Исусес тховгяс саворе апостоленгере пире, даже е Юдаскере, ковато ка пределас лес. Сигурно требелас леске бут време, ама о Исусес смирено кергяс давкха. После ов пхенгяс: „Ахалилен ли со кергьом за туменге? Туме пхенен, кай синьом Учители тай Господари тай кавка си верно, соскето ме наистина синьом. Ама щом тумаро Учители тай Господари тховгяс тумаре пире, туме-да требе те керен о също йекх аверескере.“ (Йоан 13:12-14)

11. Сар о Петрес сикавгяс, кай сиклило те овел смирено? (1 Петър 5:5) (Дикх и картинка-да.)

¹¹ О Петрес сиклило таре Исусескоро смирение. Кана о Исусес вече ирисайлосас ко небес, о Петрес саскяргяс манушес, ковато бияндилосас банго. (Деян. 1:8, 9; 3:2, 6-8) Бут мануша дикхле со кергяс о Петрес тай кидисайле турял лесте. (Деян. 3:11) Ама о Петрес на мангляс о мануша те хвалинен лес, въпреки кай барило турял манушенде, коленге сине важно те ачшовес баро мануш. Ов сине смирено тай сикавгяс, кай и слава си е Йеховаске тай е Исусеске, като пхенгяс: „Ашал [е Исусескере] алавеске тай ашал амари вяра лесте о пире калке манушескере, колес дикхен тай пенжарен, зорайлиле.“ (Деян. 3:12-16) По-късно о Петрес пишингяс е християниенге, кибор си важно те овен смирена тай използвингяс думес, колато сикавенас, кай требе те пхиравен о смирение сар шехи. Кана четинас давкха, дас амен годи сар о Исусес пханляс пес йекх кърпаса тай тховгяс пе апостоленгере пире. (Четине 1 Петър 5:5.)

12. Сар ащи те овас сар о Петрес тай те продължинас те сикльовас те овас смирена?

¹² Аме ащи те овас сар о Петрес тай те продължинас те сикльовас те овас смирена. Ащи ли ахальовас кой си смирено само далкхестар со хоратинел? На-а. И дума „смирение“, която използвингяс о Петрес, сикавел со ка мислинел о смирено мануш за песке тай околенге. Аме керас лачшипе околенге, соскето дехас е Йехова тай е манушен, а ма соскето мангас те хвалинен амен. Ка сикавас, кай наистина синям смирена, ако вогиестар служинас е Йеховаске тай околенге, даже кана никхой на дикхел со керас. (Мат. 6:1-4)

ОВ „ПХАРЕ ГОГЯКОРО“

13. Пхен со означинел те овес „пхаре гогякоро“.

¹³ Со означинел те овес „пхаре гогякоро“? (1 Пет. 4:7) Мануш, ковато си пхаре гогякоро, дел всичко пестар те ахальовел со мислинел о Йехова, кана лел решение. Савка мануш на бистерел, кай о най-важно лескере животосте си лескоро амалипе е Йеховаса. Ов на мислинел, кай си бари бути тай кай жанел всичко. Ако синям пхаре гогякере, ка мукас амен е Йеховаске андо васта, като често молинас амен леске.a

14. Сар йекхвар о Петрес на мукляс пес е Йеховаске андо васта?

¹⁴ И рат англал те мерел, о Исусес пхенгяс пе ученикиенге: „Саворе туме ка мукен ман, ашал далкхеске со ка ачшол манца кайка рат.“ О Петрес мислинелас, кай си бут зорало тай пхенгяс: „Даже саворе авер те мукен тут, ме нанай те мукав тут.“ Кайка рат о Исусес пхенгяс десавенге таро ученикя: „Ачшовен жангале тай молинен тумен.“ (Мат. 26:31, 33, 41) Ако о Петрес керелас давкха, ка овелас лес достатъчно смелост, за те пхенел, кай си е Исусескоро ученики. Ама ов пхенгяс, кай на пенжарел е Исусес тай после халяс бут холи далкхеске. (Мат. 26:69-75)

15. Сар о Исусес сикавгяс, кай си пхаре гогякоро презал и последно рат, англал те мерел сар мануш?

¹⁵ О Исусес мукелас пес е Йеховаске андо васта. Въпреки кай сине съвършено, ов молингяс пес бут дром презал и рат англал те мерел. Давкха диняс лес и смелост те керел е Йеховаскери воля. (Мат. 26:39, 42, 44; Йоан 18:4, 5) Сигурно о Петрес нисар на бистергяс, кай о Исусес молингяс пес бут дром кайка рат.

16. Сар о Петрес сикавгяс, кай ачшило пхаре гогякоро? (1 Петър 4:7)

¹⁶ О Петрес сиклило те мукел пес е Йеховаске андо васта, като молинел пес леске. Кана сине възкресиме, о Исусес пхенгяс леске тай околе апостоленге, кай ка получинен о свято духос, за те проповединен и лачши новина. Ама о Исусес пхенгяс ленге те ачшон ко Йерусалим, жикай давкха на ачшол. (Лука 24:49; Деян. 1:4, 5) Со кергяс о Петрес жикай жарелас? Ов тай лескере пхрала „постоянно молиненас пес“. (Деян. 1:13, 14) По-късно, кана пишингяс по първо лил, о Петрес пхенгяс пе пхраленге тай пе пхениенге те овен пхаре гогякере тай те мукен пес е Йеховаске андо васта, като молинен пес. (Четине 1 Петър 4:7.) О Петрес сиклило те мукел пес е Йеховаске андо васта тай ащине те помагинел околенге андо сбори. (Гал. 2:9)

17. Со требе те продължинас те керас? (Дикх и снимка-да.)

¹⁷ За те овас гогявер, аме требе често те молинас амен е Йеховаске. Аме ахальовас кай требе те молинас лес те помагинел аменге даже кана требе те керас десаве букя, колато си аменге лесна. Кана требе те лас десаве важна решения, аме мукас амен е Йеховаске андо васта тай верувинас, кай ов жанел со си о най-лачшо за аменге.

18. Сар ащи те сикльовас по-лачшес те мислинас сар о Йехова?

¹⁸ Бут синям благодарна, кай о Йехова кергяс амен те ащи те овас сар лесте. (Бит. 1:26) Верно си, кай нащи те овас точно сар лесте. (Иса. 55:9) Ама сар о Петрес, ащи те продължинас те мислинас сар о Йехова, те овас смирена тай те овас пхаре гогякере.