Сикльов те молинес тут вогиестар

1-2. а) Со ащи те пречинел аменге те пхенас амаро воги е Йеховаске? б) Катар жанас кай о Йехова мангел те шунел амаре молитвес?

Подекхана мислинес ли туке кай пхенес йекх тай също те молитвенде или кай на пхенес е Йеховаске то воги кана молинес тут? Ако мислинес туке салка букя, на синян само ту. Амен иси бут букя те керас тай подекхана пхенас само кратка молитвес. Ащи даже те овел аменге пхаро те пхенас амаро воги е Йеховаске соскето мислинас кай на заслужинас те иринас амен кариг лесте.

² И Библия пхенел аменге кай е Йеховаске си важно ма те пхенас леске шукар думес а те молинас амен вогиестар тай те овас смирена кана молинас амен леске. Ов шунел „давкха со манген [лестар] о мануша колато си ковле вогиескере“. (Пс. 10:17) Ов шунел секо дума която пхенас леске соскето мангел те жанел сар синям. (Пс. 139:1-3)

3. Со ка дикхас калке урокиесте?

³ Тогава ащи те пучас амен: Соске на требе те лажас те молинас амен е Йеховаске? Сар ащи амаре молитвес те керен амен по-лачше амала е Йеховаса? Со ащи те сикльовас таро молитвес анди Библия колато пхенде лескере служителя тай сар ащи он те помагинен аменге? Тай со ащи те керас кана си аменге боркха пхаро кай на жанас со те пхенас е Йеховаске? Акана ка дикхас калка букя.

МА ЛАЖА ТЕ МОЛИНЕС ТУТ Е ЙЕХОВАСКЕ

4. Со ащи те помагинел аменге те на лажас те молинас амен е Йеховаске? (Псалм 119:145)

⁴ Кана ахальовас кай о Йехова си амаро верно амал ковато мангел о най-лачшо за аменге, ка овел аменге по-лесно те молинас амен леске тай те пхенас леске амаро воги. О мануш ковато пишингяс о 119 Псалм дикхелас те овел лачшо амал е Йеховаса. Лес сине бут проблемя. Десаве мануша хоратиненас хохавне букя за леске. (Пс. 119:23, 69, 78) Леске сине пхаро соскето керелас грешкес-да. (Пс. 119:5) Ама ов на лажалас те пхенел по воги е Йеховаске. (Четине Псалм 119:145.)

5. Соске на требе те мукас о кханиле букя колато мислинас за аменге те спиринен амен те молинас амен? Пхен йекх примери.

⁵ О Йехова мангел даже калка колато керде баре безеха те молинен пес леске. (Иса. 55:6, 7) Аке соске на требе те мукас о кханиле букя колато мислинас за аменге те спиринен амен те молинас амен. Аке йекх примери. Йекх пилоти жанел кай ако требел леске помощ ащи те хоратинел е манушенца колато дикхен сар жан о букя е самолекиенца. Мислинес ли кай ако иси проблеми ов нанай те родел лен соскето ка лажал кай нашалдило или кай кергяс грешка? Ако аме-да подекхана на жанас со требе те керас или кергям безех, ащи без те лажас те молинас амен е Йеховаске. (Пс. 119:25, 176)

САР АЩИ ТЕ МОЛИТВЕС ТЕ КЕРЕН ТУТ ПО-ЛАЧШО АМАЛ Е ЙЕХОВАСА

6-7. Со ащи те помагинел аменге те пхенас е Йеховаске амаро воги? Пхен йекх примери. (Дикх и бележка-да.)

⁶ Кана пхенас амаро воги е Йеховаске ка ачшовас по-лачше амала леса. Тогава со ащи те помагинел аменге те молинас амен вогиестар?

⁷ Мислине саво Дел си о Йехова.a Кибор по-бут мислинас саво си о Йехова боркха по-лесно ка ащи те пхенас леске амаро воги. (Пс. 145:8, 9, 18) И Кристин колакоро дад сине бут кханило пхенел: „На сине манге лесно кана хоратинав е Йеховаса те мислинав кай ов си мо Дад. Мислинавас кай ашал далкхеске кай керав грешкес о Йехова ка иринел манге думо.“ Со помагингяс лаке? Ой пхенел: „Мислингьом бут далкхеске кай о Йехова сикавел верно любов тай давкха помагингяс манге те верувинав кай ов дехел ман. Акана жанав кай ов винаги ка овел жи манде. Даже ако керав десаве грешкес ка продължинел те дехел ман тай те помагинел манге. Като мислинав кибор бари си е Йеховаскери любов си манге по-лесно те пхенав леске со анел манге радост тай саве букиенге хав холи.“

8-9. Соске си шукар те мислинас со те пхенас англал те молинас амен? Пхен йекх примери.

⁸ Мислине со те пхенес. Англал те молинес тут ащи те пучес тут: „Саве проблемя иси ман акана? Иси ли декхой колеске требе те простинав? Требел ли манге е Йеховаскери помощ ашал далкхеске кай десаве букя ме животосте променисайле?“ (4 Царе 19:15-19) Също ма бистер сар о Исусес сикавгяс амен те молинас амен. Мислине со ащи те пхенес те молитвате за е Йеховаскере алавеске, лескере Царствоске тай е букиенге колато ов мангел те керел. (Мат. 6:9, 10)

⁹ Кана и Алиска ахалили кай лакере ромес иси тумори ко шеро тай сиго ка мерел сине лаке трудно те молинел пес. Ой пхенел: „Сине манге боркха пхаро кай кана започнинавас те молинав ман на жанавас со те пхенав.“ Со помагингяс лаке? Ой пхенел: „Англал те молинав ман мислинав со ащи те пхенав е Йеховаске за те на хоратинав само манге тай ме ромескере насвалипнаске. Тогава локьол манге тай ащи те пхенав е Йеховаске различна букя.“

10. Соске на требе те сигярас кана молинас амен? (Дикх о снимкес-да.)

¹⁰ Ма сигяр кана молинес тут. Даже о кратка молитвес ащи те керен амен по-лачше амала е Йеховаса. Ама кана отделинас по-бут време те молинас амен ка ащи те пхенас е Йеховаске амаро воги.b Е Алискакоро ром о Илия пхенел: „Дикхав те молинав ман бут дром презал о диес тай ачшильом по-лачшо амал е Йеховаса отсарто дикхав те пхенав по-дълга молитвес. О Йехова нисар нанай те дел ман зори те свършинав по-сиго, тогава соске ме те сигярав.“ Ту-да ащи те керес давкха: Дикх кана тай кате ка ащи те молинес тут даже на глас без декхой те пречинел туке тай дикх често те молинес тут по-дълго.

МИСЛИНЕ СО СИКЛЬОВЕС ТАРО МОЛИТВЕС КОЛАТО СИ КИ БИБЛИЯ

11. Соске си шукар те мислинас е молитвенге колато си пишиме ки Библия? (Дикх о блокчес-да „Чувствинес ли тут сар ленде?“)

¹¹ Ка овел шукар те мислинес со пхенде е Йеховаскере служителя ко пуране диеса пере молитвенде тай ко гиля коленца хвалиненас е Йеховас. Като дикхес сар он пхененас по воги е Йеховаске ка мангес те керес о също. Ленгере молитвенде ащи те аракхес неве букя колато те пхенес тере молитвенде. Тай също ащи те аракхес молитвес колато сикавен точно сар ту чувствинес тут.

12. Со ащи те пучас амен кана четинас десави молитва ки Библия?

¹² Кана четинес йекх молитва ки Библия пуч тут: „Кой пхенгяс калка думес тай со ачшолас лескере животосте кана молисайло далкхеске? Мислинав ли сар лесте? Со сикльовав лескере молитватар?“ Сигурно ка требе те родес амаре лиленде за те ахальовес калка букя, ама давкха бут ка помагинел туке. Акана ка дикхас щар молитвес тай со сикльовас лендар.

13. Со сикльовас тари молитва която пхенгяс и Анна? (1 Царе 1:10, 11) (Дикх и картинка-да.)

¹³ Четине 1 Царе 1:10, 11. Кана и Анна пхенгяс кайка молитва ла сине дуй баре проблемя. Нащине те овен ла чшаве тай лакере ромескери второ ромни бут тормозинелас ла. (1 Царе 1:4-7) Ако тут-да иси проблеми ковато нанай сар те опринес, со ащи те сикльовес тари молитва която пхенгяс и Анна? Лаке локило кана пхенгяс пе саворе холя е Йеховаске. (1 Царе 1:12, 18) Аменге-да ащи те локьол ако мукас амаро пхарипе е Йеховаске андо васта като пхенас леске амаро воги. (Пс. 55:22)

14. а) Со авер сикльовас тари Анна? б) Сар и Библия ка помагинел аменге амаре молитвес те ачшон по-шукар? (Дикх и бележка.)

¹⁴ И Анна биянгяс пе чшес е Самуилес тай кана накхле десаве бреша ингалгяс лес паш о първосвещеники Илий. (1 Царе 1:24-28) Тогава молингяс пес е Йеховаске за те благодаринел леске кай пазинел тай дикхел пе верноне служителен.c (1 Царе 2:1, 8, 9) Ла още сине ла проблемя ама вместо те мислинел ленге ой мислинелас по-бут далкхеске сар о Йехова благословингяс ла. Со сикльовас? Ка овел аменге по-лесно те издържинас ако мислинас далкхеске сар о Йехова помагингяс аменге жи акана.

15. Со ащи те сикльовас тари молитва която пхенгяс о пророк Йеремия? (Йеремия 12:1)

¹⁵ Четине Йеремия 12:1. О пророк Йеремия халас холи кай о мануша колато керен кханиле букя живинен по животос тай дикхьол кай нанай лен нисаве проблемя. Леске сине пхаро също соскето о израилтяня асанас леске. (Йер. 20:7, 8) Аме-да ащи те чувствинас амен сар лесте кана асан аменге или кана дикхас кай е кханилен иси шукар животос. О Йеремия пхенгяс саве букиенге хал холи, ама нисар на пхенгяс кай о Йехова си виновно. Кана дикхляс сар о Йехова накажинел калкен колато ухтиниле мамуй лесте, сигурно лескери вяра кай о Йехова си справедливо барили. (Йер. 32:19) Аме-да ащи те пхенас е Йеховаске кибор бут дукхал амен кана икерен пес грозно аменца. Ама ка сикавас кай верувинас-да далкхесте кай ов ка махнинел о кханилипе тай кай жанел най-лачшес точно кана те керел давкха.

16. Со ащи те сикльовас тари молитва която пхенгяс о левити? (Псалм 42:1-4) (Дикх о картинкес-да.)

¹⁶ Четине Псалм 42:1-4. Кайка гили пишингяс йекх левити ковато нащине те поклонинел пес е Йеховаске ко храми заедно околе израилтяниенца. Кавка псалми сикавел кибор пхаро сине леске. Аме ащи те чувствинас амен сар лесте ако нащи те икльовас кхерал например соскето синям бут насвале или ако синям ко пханлибе ашал далкхеске кай служинас е Йеховаске. Йекх диес ащи те овас лачшес, а авер диес те овел аменге пхаро. Ама сар-да те чувствинас амен ащи те пхенас давкха е Йеховаске. Давкха ащи те помагинел аменге те ахальовас по-лачшес со си аменге тай те дас амен годи кола букя си по-важна. О левити например дикхляс кай пак ащи те хвалинел е Йеховас. (Пс. 42:5) Ов мислингяс далкхеске-да сар о Йехова дикхел леске. (Пс. 42:8) Като молинас амен е Девлеске ка ащи те ахальовас по-лачшес со си аменге, ка локьол аменге тай ка овен амен силес те издържинас.

17. а) Со ащи те сикльовас тари молитва която пхенгяс о пророк Йона? (Йона 2:1, 2) б) Сар ащи десаве стиховя таро псалмя те помагинен аменге кана си аменге пхаро? (Дикх и бележка.)

¹⁷ Четине Йона 2:1, 2. О пророк Йона молисайло кана сине е мачшеске ко воги. Въпреки кай на шунгясас е Йеховас ов сине сигурно кай о Йехова ка шунел лес. Пе молитвате ов използвингяс думес таро псалмя.d Дикхьол кай ов бут шукар жанелас лен. Като мислингяс за ленге лескери вяра кай о Йехова ка помагинел леске барили. Ако амен-да дикхас те сикльовас наизуст десаве стиховя тари Библия, кана молинас амен е Йеховаске пхаре диесенде ка дас амен годи ленге тай ка локьол аменге.

МОЛИНЕ ТУТ Е ЙЕХОВАСКЕ ТАЙ АЧШОВ СА ПО-ЛАЧШО АМАЛ ЛЕСА

18-19. Сар о думес ко Римляни 8:26, 27 помагинен аменге кана на жанас со те пхенас е Йеховаске? Пхен йекх примери.

¹⁸ Четине Римляни 8:26, 27. Подекхана си аменге боркха пхаро кай на жанас сар те пхенас е Йеховаске со си аменге. Ама ов на мукляс амен коркоре. Тогава е Девлескоро духос „молинел е Девлес те помагинел“ аменге. Сар? Пе духоса о Йехова кергяс бут молитвес те овен пишиме ки Библия. Кана нанай амен силес те пхенас леске со мислинас, о Йехова приеминел десаве думес калке молитвендар все едно аме пхенгям лен тай отговоринел аменге.

¹⁹ Кавка помагингяс бут е Еленаке тари Русия. О жандаря долде калке пхеня ашал далкхеске кай молинел пес тай четинел и Библия. Тогава сине лаке боркха пхаро кай нащине те молинел пес. Ой пхенел: „Тогава диньом ман годи кай кана на жанав за соске те молинав ман, о Йехова ка приеминел о молитвес колато пхенде лескере служителя ко пуране диеса ... все едно ме пхенгьом лен ... Давкха делас ман бут силес ко пхаре диеса.“

20. Со те керас за те овел аменге по-лесно те молинас амен кана си аменге пхаро?

²⁰ Кана си аменге пхаро ащи кана молинас амен те започнинас те мислинас авере букиенге. Со ащи те помагинел аменге? Ащи те четинас десаве псалмя на глас. Ащи също те пишинас со си амаре сърцесте сарто кергяс о цар Давид. (Пс. 18, 34, 142; думес ко начало.) Нанай законя со те керас за те подготвинас амен англал те молинас амен. (Пс. 141:2) Кер со си най-шукар за туке.

21. Соске ащи те молинас амен вогиестар?

²¹ Локьол аменге като мислинас кай о Йехова ахальовел сар синям още англал те пхенас леске. (Пс. 139:4) Ама ов бут мангел те пхенас леске со си аменге тай те сикавас леске кай мукас амен леске андо васта. Аке соске ма лажа те молинес тут те Дадеске. Сикльов таро молитвес колато си ки Библия. Молине тут вогиестар. Пхен е Йеховаске со анел туке радост тай саве холя иси тут. О Йехова си то лачшо Амал тай винаги ка овел жи туте!