Пхуре пхралален тай пхенялен, туме синьен подаръки е сбориеске
„Нащи те верувинав кибор бут букя ащине те керав кана синьомас терни. Вече пхурильом тай нащи те керав кибор керавас преди.“ (Кони, на 83)
Сигурно ту-да нащи те керес боркха бут кибор кергян кана синянас терно. Въпреки кай служингян е Йеховаске бут бреша, акана ащи те овел туке пхаро соскето мислинес со ащине те керес преди, а на дикхес со ащи те керес акана. Со ащи те помагинел туке ако иси тут савка проблеми?
СО МАНГЕЛ ТУТАР О ЙЕХОВА?
Пуч тут: „Со мангел о Йехова мандар?“ Ащи те локьол туке кана четинес о думес ко Второзаконие 6:5 кате пишинел: „Дехе е Йеховас, тере Девлес, те целоне илеса, те целоне вогиеса тай те целоне зоралипнаса.“
Кавка стихи сикавел кай о Йехова мангел те служинес леске тере целоне илеса, вогиеса тай зоралипнаса. Като жанес давкха нанай те дикхес со керен окола или со ащине те керес ту преди.
Кана синянас терно ту десас е Йехова о най-лачшо ковато ащине те дес лес тогава. Авдиес сигурно дес лес о най-лачшо ковато ащи те дес лес акана. Аке соске ащи те овес сигурно кай акана дес е Йеховас боркха кибор десас лес преди. Десас лес о най-лачшо преди тай дес лес о най-лачшо акана-да.
Кана синянас терно десас е Йеховас о най-лачшо тутар тай дес лес о най-лачшо акана-да
АЩИ БУТ ТЕ ПОМАГИНЕС ОКОЛЕНГЕ
Ма мислине е букиенге колато вече нащи те керес, а дикх со ащи те керес акана. Иси десаве букя колато нащине те керес кана синянас терно, ама акана ащи. Аке десаве лендар:
Пхен околенге со сиклилян презал о бреша. Дикх со пишинел ки Библия калке стиховиенде:
О цар Давид: „Синьомас терно тай пхурильом, ама нисар на дикхльом о Дел те мукел манушес, ковато керел со си лачшо лескере якхенде, или те мукел лескере чшаве те просинен маро.“ (Псалм 37:25)
О Исус Навиев: „Аке, още хари тай ка мерав, ама туме бут шукар жанен кай секо йекх дума таро шукар обещания колато диняс о Йехова, тумаро Дел, ачшили. Он ачшиле англал тумаре якхенде. Секо йекх дума ачшили.“ (Ис. Н. 23:14)
Сигурно ту-да пхенгян салка букя. О Давид тай о Исус Навиев бут дром презал о бреша дикхле давкха со пхенде. Аке соске ленгере думес ащине те барярен околенгери вяра.
Ако служинес е Йеховаске бут бреша, ту-да ащи те хоратинес далкхеске сар ов помагингяс туке тай околенге. Декхана дикхлян ли сар о Йехова благословинел пе народос? Тогава пхен давкха околенге тай ащи те барярес ленгери вяра. Като пхенес те пхраленге тай пхениенге сар о Йехова помагингяс туке презал о бреша ка дес лен куражи. (Рим. 1:11, 12)
Ако винаги кана ащи жас ко събрания на живо, ка овел шукар туке-да околенге-да. И Кони пхенел: „Кана синьом ко събрания на живо давкха дел ман бут силес. Нанай сар те овел манге пхаро кана дикхав кибор бут дехен ман ме пхрал тай ме пхеня. Дикхав те сикавав кибор синьом ленге благодарно като дав лен цикне подаръкя. Дикхав също те жав на служба тай те керав авер букя е пхраленца тай е пхениенца.“
О ЙЕХОВА СИ ТУКЕ БЛАГОДАРНО ВСИЧКОНАСКЕ СО КЕРЕС ЗА ЛЕСКЕ
Ки Библия пишинел буте манушенге колато нащине те керен бут ама о Йехова дехелас лен. О Симеон например сине йекх пхуро израилтяни ковато сине живдо кана бияндило о Исусес. Кана ов жалас ко храми сигурно ащине те дикхел сар о по-терне мруша керен важно бути отхе. Тогава о Симеон ащине те мислинел песке кай нанай ценно е Йеховаске щом вече нащи те керел кибор керелас сар терно. Ама о Йехова на мислинелас сар лесте. Ов дикхелас кай о Симеон си леске верно тай адалкхеске сикавгяс леске е цикне Исусес. О Йехова даже използвингяс лес за те пхенел кай о Исусес ка овел о Месия. (Лука 2:25-35) Ов на дикхелас кибор силес иси е Симеонес, а кибор си бари лескери вяра тай „делас лес по свято духос“.
О Йехова благословингяс е Симеонес като сикавгяс леске е цикне Исусес тай като диняс лес по духос за те пхенел кай ов ка овел о Месия
Ту-да ащи те овес сигурно кай о Йехова ценинел давкха кай служинес леске верно въпреки кай може би нащи те керес бут букя. Ов мангел те дас лес давкха со иси амен, а ма давкха со нанай амен. (2 Кор. 8:12)
Аке соске ка овел шукар те дикхес со ащи те керес. Например со ащи те керес анди служба даже ако си за хари? Ащи ли те помагинес те пхраленге тай те пхениенге като звънинес ленге или като пишинес ленге картичка? Салка цикне букя колато сикавен любов ащи те ден околен бут силес особено ако авен манушестар ковато служингяс е Йеховаске бут бреша.
Даже те овен тут проблемя е састипнаса ту ащи те керес бут е Йеховаске. Ко блокчес „Давкха спасингяс лакоро животос“ дикх со ачшило ки Източно Африка.
Ма бистер кай ти вяра тай давкха кай синян верно е Йеховаске ащи те дел околен куражи. Ту дес бут шукар примери като издържинес тай ащи те овес сигурно кай о Дел нанай те бистерел давкха со керес тай и любов която сикавес като помагинес околенге. (Евр. 6:10)
КЕР СО АЩИ ЗА ТЕ ПОМАГИНЕС ОКОЛЕН
О учена пхенен кай о пхуре колато дикхен те помагинен околенге си по-састе, мислинен по-шукар тай живинен по-бут.
Верно си кай о шукар букя колато керес нанай те керен тут по-терно. Само е Девлескоро Царство ащи те махнинел о безех ашал колеске пхурьовас тай мерас. (Рим. 5:12)
Ама ако керес давкха со мангел о Йехова тай помагинес е манушенге те ахальовен за леске, ка овес сигурно кай лескере обещания ка ачшон тай даже ащи те овес по-састо. Пхуре пхралален тай пхенялен, ма бистерен кай о Йехова дикхел со керен за леске тай кай тумари вяра си сар златос е сбориеске.