1 Уроки

О Дел мангел те овес лескоро амал

О Дел мангел те овес лескоро амал. Пучлян ли тут дали ащи те овес амал ем–е Бареса таро дуйнас? Е Аврамеске, ковато живингяс англал бут вакъти, вакергьолас кай си Девлескоро амал. (Яков 2:23) И Библия пхенел кай авере мануша–да уле Девлескере амала. Он–да уле бут бахтале. Авдиес иси мануша састе пхувяте, колато си Девлескере амала. Ту–да ащи те овес Девлескоро амал.

Те овес амал е Девлеса си по–шукар каборестар те овес амал манушеса. О Дел нисар нанай те дукхавел пе чачуне амален. (Псалм 18:25) По–лачше си те овес Девлескоро амал каборестар те овес барвало. Кана екх барвало мануш мерел, лескере лове джан аверенде. Ама о мануш ковато си амал е Девлеса иси лес барвалипе, ковато ни екх нащи те лел. (Матей 6:19)

Десаве мануша ка манген те ачшавен тут те пенджарес е Девлес. Он ащи те овен те амала тай те енданя. (Матей 10:36, 37) Те асана туке тай те даравена тут, пуч тут: Кас те шунав? Мислине адалкхеске: Те пхенена туке те на хас, ка шунес ли? Нанай те шунес. Требе те хас та те живинес. О Дел ащи те керел те живинес са! Адалкхеске на мук ни екхе те ачшавел тут, те сикльовес сар те овес амал е Девлеса. (Йоан 17:3)