Со ка изпитинес амаре християнсконе събраниенде?

Бут мануша спиринен те жан ко кхангеря, соскето отхе на аракхен духовно ръководство тай утеха. Тогава соске те жас ко християнска събрания е Йеховаскере Свидетеленгере? Со ка аракхес отхе?

И лошали те овес машкар любещоне тай загрижиме манушенде. Презал о първо веки о християня сине организириме сборовиенде тай сине лен събрания, за те поклонинен пес е Девлеске, те сикльовен и Библия тай те насърчинен пес йекх аверес. (Евреи 10:24, 25) Далкхе събраниенде сине любещо атмосфера, адалкхеске он чувствиненас пес, кай си машкар истинсконе амаленде — ленгере духовна пхрала тай пхеня. (2 Солунци 1:3; 3 Йоан 14) Аме следвинас ленгоро примери тай синям радостна сар ленде.

И полза далкхестар те сикльовес сар те прилагинес е Библиякере принципя. Сарто андо библейска времена, авдиес–да мруша, жувля тай чшаве киден пес заедно. Способна учителя използвинен и Библия, за те помагинен аменге те ахальовас сар те прилагинас лакере принципя амаре животосте. (Второзаконие 31:12; Неемия 8:8) Саворе ащи те участвинен андо обсъждания е слушателенца тай андо гиля. Далкхеса сикавас амари християнско надежда. (Евреи 10:23)

И благословия те укрепинес тери вяра андо Дел. О апостол Павел пхенгяс йекхе сбориеске лескере времестар: „Бут мангав те дикхав тумен ..., те насърчинас амен йекх аверес, секо йекх чрез и вяра е аверескери — туме чрез мери тай ме чрез тумари.“ (Римляни 1:11, 12) Кана общувинас редовно амаре пхраленца тай пхениенца ко събрания, ка укрепинас амари вяра тай амари решимост те живинас според о принципя е Библиякере.

Насърчинас тут те приеминес и покана те авес ко следващо събрание е сбориескоро тай те изпитинес лично далкха букя. Ка овес посрещниме вогиестар. О входи саворе събраниенде си свободно — на киден пес парес.

• Саво примери следвинас кана кидас амен?

• Сави полза ка овел амен кана жас ко християнска събрания?