1 ШЕРО
Кова си о Дел?
1, 2. Со пучен бут дром о мануша?
О ЧШАВЕ пучен бут букя. Ащи те обяснинес ленге варесо, ама он бут дром пучен: „Соске?“ Кана отговоринес ленге, ащи пак те пучен: „Ама соске?“
2 Саворе пучас амен бут букя — сарто о терне, ачука о пхуре–да. Ащи те пучас со те хас, со те урявас или со те кинас. Или ащи те пучас амен важноне букиенге е животоске тай далкхеске со ка ачшол андо бъдеще. Ама кана нащи те аракхас о отговоря, ащи те откажинас амен те родас лен.
3. Соске бут мануша мислинен, кай нащи те аракхен о отговоря пере важноне въпросиенге?
3 Дали о отговоря амаре важноне въпросиенге си анди Библия? Десаве мануша мислинен, кай си чука, ама ленге дикхьол, кай си бут пхаро те ахальовел пес и Библия. Он ащи те мислинен, кай само о пасторя тай о поповя жанен о отговоря. Авер мануша лажан те пхенен, кай на жанен о отговоря. Ту со мислинес?
4, 5. Саве важна въпрося иси тут? Соске требе те продължинес те родес о отговоря?
4 Сигурно мангес те жанес: Соске биянгьовас? Со ачшол кана мерас? Саво си о Дел? О баро Учители, о Исусес, пхенгяс: „Продължинен те манген тай ка получинен, продължинен те роден тай ка аракхен, продължинен те чукинен тай ка овел туменге путердо.“ (Матей 7:7) Ма откажин тут те родес, бискай на синян сигурно, кай аракхлян о верна отговоря.
5 Ва, ако продължинес те родес, ка аракхес о отговоря анди Библия тай ка дикхес, кай нанай бут пхаро те ахальовес лен. (Притчи 2:1–5) Давкха со сикльовес ка помагинел туке те овес по–щастливо акана тай ка дел тут шукар надежда за ко бъдеще. Акана ка дикхас йекх въпроси, колеске бут мануша нащи те аракхен о отговори.
ДАЛИ О ДЕЛ ИЗПИТИНЕЛ АМЕН КХАНИЛИПНАСА?
6. Соске десаве мануша мислинен, кай о Дел на интересувинел пес далкхестар, кай си ленге пхарипе?
6 Андо светос иси бут кханилипе. Турял аменде дикхас войни, омраза тай дукх. О мануша насвальовен, мъчинен пес тай мерен. Десаве мануша пучен пес: „Ако о Дел дикхел аменге, соске на махнинел саворе далкха кханиле букя?“
7. а) Со пхенен десаве пасторя тай поповя, кана ачшол варесо кханило? б) Соске ащи те овас сигурна, кай о кханиле букя на авен таро Дел?
7 Подекхана о мануша мислинен чука, ашал далкхеске со шунен таро пасторя тай о поповя. Кана ачшол варесо кханило, он пхенен, кай чука мангляс о Дел или кай давкха си изпитание таро Дел. Ама и Библия на пхенел давкха. Ой сикавел, кай о кханилипе нисар на авел таро Дел. Андо Яков 1:13 пишинел, кай о Дел на изпитинел никхас кханилипнаса. Отхе пишинел: „Кана декхас иси изпитание, нисар те на пхенел: ‘О Дел изпитинел ман.’ Соскето о Дел нащи те овел изпитиме кханилипнаса, тай ов–да на изпитинел никхас чука.“ Давкха означинел, кай о Дел ащи домукел те ачшон кханиле букя, ама нисар на керел лен. (Четине Йов 34:10.) Нека те дикхас йекх примери.
8, 9. Соске нанай честно те пхенас, кай о Дел си виновно амаре проблемиенге? Де примери.
8 Представине туке терне мрушес, ковато панда бешел пе даяса тай пе дадеса. Лескоро дад бут дехел лес тай сикавгяс лес те лел лачше решения. Ама йекх диес о терно мруш ухкьел мамуй пе дадесте тай икльол пумендар. Керел кханиле букя тай ашал далкхеске патинел. Ка мислинес ли, кай лескоро дад си виновно далкхеске со ачшило, соскето на спирингяс пе чшавес тай домукляс ов те икльол пумендар? Нанай сар! (Лука 15:11–13) Сарто давкха дад, ачука о Дел–да на спиринел е манушен, кана он ухкьен мамуй лесте тай керен кханиле букя. Требе те дас амен годи, кай кана ачшол варесо кханило, давкха нанай таро Дел. Нанай честно те пхенас, кай о Дел си виновно.
9 Е Девлес иси сериозно причина, кай панда домукел те ачшон кханиле букя. Андо 11 шеро ка ахальовес со пхенел и Библия далкхеске. Ама ов сигурно, кай о Дел дехел амен тай нисар нанай виновно амаре проблемиенге. Даже само ов ащи те махнинел лен. (Исаия 33:2)
10. Соске ащи те овас сигурна, кай о Дел ка оправинел саворе проблемя, колато керде о кханиле мануша?
10 О Дел си свято. (Исаия 6:3) Всичко со керел ов си шукар, шужо тай лачшо. Аке соске ащи те доверинас амен леске. Ко мануша нанай чука. Подекхана он керен кханиле букя. Даже о най–лачшо владетели нащи те оправинел о проблемя, колато керен о кханиле мануша. Никхой нанай зомкха зорало, кизом си о Дел. Ов ащи те оправинел саворе проблемя, колато керде о кханиле мануша, тай ка керел давкха. О Дел ка махнинел о кханилипе завинаги. (Четине Псалм 37:9–11.)
САР ЧУВСТВИНЕЛ ПЕС О ДЕЛ, КАНА О МАНУША СТРАДИНЕН?
11. Сар чувствинел пес о Дел, кана о мануша страдинен?
11 Сар чувствинел пес о Дел, кана дикхел со ачшол андо светос тай саво пхарипе цидес тере животосте? И Библия сикавел, кай о Дел „дехел и справедливост“. (Псалм 37:28) Ов бут мангел те овел справедливост тай лачшипе андо светос, а на дехел о кханилипе тай и несправедливост. Леске си бут пхаро, кана о мануша страдинен. И Библия пхенел, кай „задукханило лес о ило“, кана дикхляс, кай и цело пхув пхердили кханилипнаса андо минало. (Битие 6:5, 6) О Дел на променисайло. (Малахия 3:6) И Библия пхенел, кай о Дел дикхел туке. (Четине 1 Петър 5:7.)
И Библия сикавел, кай о Йехова си амаро лачшо Създатели, ковато кергяс саворе букя
12, 13. а) Соске дехас околен тай дикхас ленге, тай сар чувствинас амен, кана дикхас о пхарипе андо светос? б) Соске ащи те овас сигурна, кай о Дел ка махнинел о пхарипе тай и несправедливост?
12 И Библия също пхенел, кай о Дел кергяс амен те препас упрал лесте. (Битие 1:26) Давкха означинел, кай о Дел диняс амен о съща шукар качества сар лескере. Ако дукхал тут, кана дикхес сар лачше мануша мъчинен пес, сигурно е Девлес дукхал панда по–бут! Катар жанас давкха?
13 И Библия сикавел, кай „о Дел си дехиба“. (1 Йоан 4:8) Со–да те керел о Дел, керел лес дехимнастар. Аме дехас, соскето о Дел дехел. Помислин далкхеске: Ако синянас зомкха зорало, те ащи те махнинес о пхарипе тай и несправедливост андо светос, ка кересас ли давкха? Ва, ка кересас лес, соскето дехес е манушен. Тогава со ка керел о Дел? Ов си бут зорало тай ка махнинел о пхарипе тай и несправедливост, соскето дехел амен. Ащи те овес сигурно, кай о Дел ка изпълнинел саворе обещания, колато си пишиме ко начало далкхе лилесте! Ама, за те овес сигурно, кай давкха ка ачшол, требе те пенжарес по–лачшес е Девлес.
О ДЕЛ МАНГЕЛ ТЕ ПЕНЖАРЕС ЛЕС
Ако мангес те ачшовес амал декхаса, пхенес леске торо алав. О Дел пхенел аменге поро алав анди Библия
14. Сар си е Девлескоро алав тай катар жанас, кай требе те използвинас лес?
14 Ако мангес те ачшовес амал декхаса, со пхенес леске най–наангле? Торо алав. Е Девлес иси ли алав? Бут кхангеря сикавен, кай лескоро алав си Дел или Господ, ама далкха думес нанай алава. Он си титлес, сарто о думес „тхагар“ или „президенти“. О Дел пхенгяс аменге, кай лескоро алав си Йехова. Андо Псалм 83:18 пхенел пес: „За те жанен о мануша, кай само ту, колескоро алав си Йехова, синян о Всевишно упрал и цело пхув.“ О мануша, колато пишинде и Библия, пишинде е Девлескоро алав лате декхате 7000 дром. О Йехова мангел те жанес тай те използвинес лескоро алав. Ов пхенел туке по алав, соскето мангел те ачшовес лескоро амал.
15. Со означинел о алав Йехова?
15 Е Девлескоро алав, Йехова, сикавел аменге бут букя леске. Давкха алав означинел, кай о Дел ащи те керел всичко со обещинел тай всичко со мангел. Нищо нащи те пречинел леске. Само е Йеховас ащи те овел давкха алав.a
16, 17. Со означинел: а) „Всемогъщо“; б) „Вечно Тхагар“; в) „Създатели“?
16 Сарто вече дикхлям, андо Псалм 83:18 пхенел пес е Йеховаске: „Само ту ... синян о Всевишно.“ Анди Библия иси авер–да титлес само е Йеховаске. Например андо Откровение 15:3 пхенел: „Баре тай бут шукар си о букя, колато керес, Йехова, Девла Всемогъщи. Праведна тай истинна си тере дрома, ту, ковато синян Вечно Тхагар.“ Со означинел и титла „Всемогъщо“? Означинел, кай о Йехова си о най–зорало саворендар ки пхув тай ко небес. А и титла „Вечно Тхагар“ означинел, кай ов винаги съществувинелас. Андо Псалм 90:2 пхенел пес, кай ов винаги сине тай винаги ка овел. Давкха си бари бути, нали?
17 Само о Йехова си о Създатели. Андо Откровение 4:11 пхенел пес: „Ту заслужинес Йехова, Девла амареа, те овел тут и слава, и почит тай о зоралипе, соскето ту кергян саворе букя тай всичко ачшило тай сине кердо, соскето ту манглян давкха.“ Ва, о ангеля, о черхеня ко небес, о плодове ко кашта, о мачше андо морес — всичко, колеске дес тут годи, кергяс лес о Йехова!
АЩИ ЛИ ТЕ ОВЕС Е ЙЕХОВАСКОРО АМАЛ?
18. Соске десаве мануша мислинен, кай нащи те овас амала е Девлеса? Со пхенел и Библия далкхеске?
18 Кана десаве мануша четинен саве качества иси е Йеховас, ащи те даран тай те мислинен: „О Дел си зомкха зорало, зомкха баро тай зомкха дур амендар, соске те мангел те дикхел манге?“ Ама дали о Дел мангел те мислинас чука? Нисар! О Йехова мангел те овел паше жи аменде. И Библия пхенел, кай о Дел „нанай дур секоне йекхестар амендар“. (Деяния 17:27) О Дел мангел те приближинес тут жи лесте тай обещинел, кай ов–да „ка приближинел пес жи туте“. (Яков 4:8)
19. а) Сар ащи те ачшовес е Девлескоро амал? б) Кола качества е Йеховаскере харешинен туке най–бут?
19 Сар ащи те ачшовес е Девлескоро амал? О Исусес пхенгяс: „За те овел лен вечно животос, требе те пенжарен тут, ковато синян о единствено истинско Дел, тай далкхес, колес ту бичшалгян, е Исусес.“ (Йоан 17:3) Продължине те сикльовес е Йеховаске тай е Исусеске, тай ка пенжарес лен по–лачшес. Чука ка овел тут вечно животос. Например вече дикхлям, кай „о Дел си дехиба“. (1 Йоан 4:16) Ама иси лес авер–да шукар качества. И Библия пхенел, кай о Йехова си „милостиво тай лачшо, на нерверинел пес хариестар тай лесте иси бари милост тай истина“. (Изход 34:6) О Йехова си „лачшо тай готово те простинел“. (Псалм 86:5) О Дел си търпеливо тай верно. (2 Петър 3:9; Откровение 15:4) Като четинес и Библия, ка сикльовес по–бут далкхеске саве шукар качества иси е Девлес.
20–22. а) Сар ащи те овес паше жи ко Дел, щом нащи те дикхес лес? б) Со те керес ако декхой традел тут те спиринес те изучинес?
20 Сар ащи те овес паше жи ко Дел, щом нащи те дикхес лес? (Йоан 1:18; 4:24; 1 Тимотей 1:17) Кана четинес е Йеховаске анди Библия, ов ка ачшол торо амал. (Псалм 27:4; Римляни 1:20) Кизом по–бут сикльовес е Йеховаске, зомкха по–бут ка дехес лес тай ка овес по–паше жи лесте.
Секо дад дехел пе чшавен, ама амаро небесно Дад дехел амен панда по–бут
21 Ка ахальовес, кай о Йехова си амаро Дад. (Матей 6:9) Ов диняс амен животос тай мангел те овел амен о най–шукар животос. Давкха мангел секо лачшо дад пе чшавенге. (Псалм 36:9) Ва, и Библия сикавел, кай ащи те ачшовес е Йеховаскоро амал. (Яков 2:23) Представине туке: О Йехова, давкха ковато кергяс всичко, мангел те овес лескоро амал!
22 Десаве мануша ащи те траден тут те спиринес те изучинес и Библия. Он ащи те даран, кай ка жас авере кхангеряте. Ама ма мук никхой те спиринел тут те ачшовес е Йеховаскоро амал. Ов си о най–лачшо Амал, ковато ащи те овел тут.
23, 24. а) Соске требе те продължинес те пучес? б) Со ка ахальовас таро следващо шеро?
23 Кана изучинес и Библия, ащи те овен букя, колато на ахальовес. Ма лажа те пучес или те мангес помощ. О Исусес пхенгяс, кай требе те овас смирена, сар о цикне чшаве. (Матей 18:2–4) О чшаве пучен бут букя. О Дел мангел те аракхес о отговоря. Адалкхеске изучине внимателно и Библия, за те овес сигурно, кай давкха со сикльовес си верно. (Четине Деяния 17:11.)
24 За те сикльовес е Йеховаске, най–лачшес си те изучинес и Библия. Андо следващо шеро ка дикхас соске и Библия си различно саворе околе лилендар.
a Ако тере Библияте нанай о алав Йехова или ако мангес те ахальовес по–бут далкхеске со означинел е Девлескоро алав тай сар те пхенес лес правилно, дикх и 1 бележка ко крайос далкхе лилесте.