12 ШЕРО
Сар ащи те ачшовес е Девлескоро амал?
1, 2. Кола уле десаве амала е Йеховаскере?
КАС мангес амалеске? Декхас, колес дехес тай колеса ахальовен тумен. Декхас, колескере качества харешинес тай си лачшо мануш.
2 О Йехова избиринел десаве манушен те овен лескере амала. Например о Авраам уло йекх таре Йеховаскере амала. (Исаия 41:8; Яков 2:23) О Йехова дехелас е Давидес–да. Ов пхенгяс, кай о Давид уло „мруш, угодно лескере илеске“. (Деяния 13:22) О пророки Даниил–да уло „бут дехиме“ таро Йехова. (Даниил 9:23)
3. Соске о Авраам, о Давид тай о Даниил уле е Йеховаскере амала?
3 Сар о Авраам, о Давид тай о Даниил ачшиле е Йеховаскере амала? О Йехова пхенгяс е Авраамиеске: „Ту шунгян мо гласос.“ (Битие 22:18) О Йехова ачшол амал далкхенца, колато смирено шунен лес. Даже ащине те ачшол амал йекхе целоне народоса. О Йехова пхенгяс е израилтяниенге: „Шунен мо гласос тай ме ка ачшовав тумаро Дел, а туме ка ачшовен моро народос.“ (Йеремия 7:23) Ту–да требе те шунес е Йеховас, ако вогиестар мангес те овес амал леса.
О ЙЕХОВА ПАЗИНЕЛ ПЕ АМАЛЕН
4, 5. Сар о Йехова пазинел пе амален?
4 И Библия пхенел, кай о Йехова дикхел сар те „използвинел пи сила, за те анел полза далкхенге, колато служинен леске целоне илеса“. (2 Летописи 16:9) Андо Псалм 32:8 о Йехова обещинел пе амаленге: „Ка помагинав туке те ахальовес о букя тай ка сикавав туке о дром, колесте требе те пхирес. Ка дав тут годи тай ми якх ка овел упрал туте.“
5 Йекх зорало душмани мангел те пречинел аменге те ачшовас е Девлескере амала. Ама о Йехова мангел те пазинел амен. (Четине Псалм 55:22.) Сар амала е Йеховаскере, аме служинас леске целоне илеса. Ачшовас леске верна, даже кана си аменге пхаро. Тай аме–да, сар о Давид, синям сигурна далкхесте со пишингяс ов е Йеховаске: „Нанай со те поклатинел ман, соскето ов си ме десноне ригатар.“ (Псалм 16:8; 63:8) Сар о Бенг дикхел те пречинел аменге те ачшовас е Девлескере амала?
Е БЕНГЕСКОРО ОБВИНЕНИЕ
6. Со пхенгяс о Бенг е манушенге?
6 Андо 11 шеро дикхлям, кай о Бенг ухтинило мамуй о Йехова тай пхенгяс, кай ов си хохавно тай несправедливо, соскето на мукляс е Адамиес тай е Ева те решинен коркоре со си лачшипе тай со си кханилипе. Е Библиякоро лил Йов сикавел, кай о Бенг обвининел е манушен–да, колато манген те овен е Девлескере амала. О Бенг пхенгяс, кай он служинен е Девлеске ашал далкхеске со получинен лестар, а ма соскето дехен лес. О Бенг даже пхенел, кай ащи те керел секоне йекхе манушес те ухкьел мамуй о Дел. Нека те дикхас со сикльовас таро Йов тай сар о Йехова винаги уло леса.
7, 8. а) Кова уло о Йов? б) Со пхенгяс о Бенг е Йовеске?
7 Кова уло о Йов? Ов уло лачшо мануш, ковато живингяс 3600 бреша англал амаре диесенде. О Йехова пхенгяс, кай тогава ки пхув на уло авер мануш сар лесте. О Йов бут дехелас е Девлес тай мразинелас о кханилипе. (Йов 1:8) Ва, о Йов уло е Йеховаскоро истинско амал.
8 О Бенг пхенгяс, кай о Йов служинелас е Девлеске само соскето сине лес полза далкхестар. О Бенг пхенгяс е Йеховаске: „На тховгян ли ограда турял лесте, турял лескере кхересте тай всичконасте со иси лес? Благословингян лескере вастенгери бути тай лескере стада ачшиле бут ки пхув. Ама молинав тут, вазде то вас, ле всичко со иси лес, тай дикх дали нанай те дел тут арманя англал те якхенде!“ (Йов 1:10, 11)
9. Со домукляс о Йехова те керел о Бенг?
9 О Бенг пхенгяс, кай о Йов служинел е Йеховаске ашал далкхеске со получинел лестар. Също пхенгяс, кай ащи те традел е Йовес те спиринел те служинел е Йеховаске. О Йехова на уло съгласно е Бенгеса, ама домукляс ов те изпитинел е Йовес, за те ахальовел пес дали о Йов уло е Йеховаскоро амал, ашал далкхеске кай дехелас лес.
О БЕНГ КЕРЕЛ КХАНИЛИПЕ Е ЙОВЕСКЕ
10. Саво кханилипе кергяс о Бенг е Йовеске тай со кергяс о Йов?
10 Първо, саворе животна е Йовескере уле чорде или мударде. Палал далкхесте по–бут таре Йовескере служителя уле мударде. О Йов нашалгяс всичко со сине лес. Ко крайос йекх бари балвал мударгяс е Йовескере деше чшавен. Всичко давкха кергяс о Бенг. Ама о Йов ачшило верно е Йеховаске. „Саворе далкхе букиенде о Йов на грешингяс тай на пхенгяс, кай о Дел кергяс десаво кханилипе.“ (Йов 1:12–19, 22)
О Йехова благословингяс е Йовес лескере верноне амалипнаске
11. а) Со авер кергяс о Бенг е Йовеске? б) Со кергяс о Йов?
11 О Бенг на откажисайло. Ов пхенгяс е Девлеске: „Вазде вас упрал лескере кокаленде тай упрал лескере телосте тай дикх дали нанай те дел тут арманя англал те якхенде.“ О Бенг чшивгяс упрал о Йов бут кханило насвалипе. (Йов 2:5, 7) Давкха–да дром о Йов ачшило верно е Йеховаске. Ов пхенгяс: „Бискай дишинав, нанай те ачшавав мери неопетненост!“ (Йов 27:5)
12. Сар о Йов сикавгяс, кай о Бенг си хохавно?
12 О Йов на жанелас саве уле е Бенгескере обвинения или соске страдинелас зомкха бут. Ов мислинелас, кай лескере страдания авен таро Йехова. (Йов 6:4; 16:11–14) Въпреки далкхесте, о Йов ачшило верно е Йеховаске. Ачука ачшило ясно, кай о Йов на дикхелас само песке. Ов уло е Девлескоро амал, соскето дехелас лес. Саворе обвинения е Бенгескере уле хохавне!
13. Саво сине о резултати далкхестар, кай о Йов ачшило верно?
13 Въпреки кай о Йов на жанелас со ачшолас андо небес, ов ачшило верно е Девлеске тай докажингяс, кай о Бенг си хохавно. О Йехова благословингяс е Йовес лескере верноне амалипнаске. (Йов 42:12–17)
САР О БЕНГ ОБВИНИНЕЛ ТУТ
14, 15. Саво си е Бенгескоро обвинение кариг саворе манушенде?
14 Ащи те сикльовес важно уроки далкхестар со ачшило е Йовеса. Авдиес о Бенг обвининел амен, кай служинас е Йеховаске, ашал далкхеске кай ащи те получинас варесо лестар. Андо Йов 2:4 пишинел, кай о Бенг пхенгяс: „Мануш ка дел всичко со иси лес пере животоске.“ Чука о Бенг обвининел ма само е Йовес, а саворе манушен, кай дикхен само песке. Бут бреша палал е Йовескоро мериба, о Бенг панда хоратинелас кханиле букя е Йеховаске тай обвининелас лескере служителен. Например андо Притчи 27:11 четинас: „Мо чшо, ов гогявер тай лошанкяр мо ило, за те ащи те отговоринав далкхеске, ковато марел манге муй.“
15 Ту ащи те избиринес те шунес е Йеховас тай те овес лескоро верно амал. Чука ка сикавес, кай о Бенг си хохавно. Даже ако требе те керес баре променес тере животосте, за те овес е Девлескоро амал, давкха си о най–лачшо решение, ковато ащи те лес! Давкха решение си бут важно. Туке–да о Бенг пхенел, кай нанай те овес верно е Девлеске, кана иси тут проблемя. Ов дикхел те хохавел амен, за те на ачшовас верна е Девлеске. Сар керел давкха?
16. а) Саве букя използвинел о Бенг, за те спиринел амен те служинас е Йеховаске? б) Сар о Бенг ащи те опитинел пес те спиринел лично тут те служинес е Йеховаске?
16 О Бенг използвинел различна букя, за те аравел амаро амалипе е Йеховаса. Ов атакувинел амен „сар ревящо лъвос тай родел кас те хал“. (1 Петър 5:8) Ма чудине тут, ако те амала, те енданя тай авер мануша манген те спиринен тут те изучинес и Библия тай те керес давкха со си правилно. Ащи те дикхьол туке чука, кай все едно о Бенг атакувинел тут.a (Йоан 15:19, 20) Авере ригатар, подекхана о Бенг керел пес „ангели е светлинакоро“. Чука ащи те опитинел пес те хохавел амен те на шунас е Девлес. (2 Коринтяни 11:14) Авер варесо, ковато керел о Бенг, за те цидел амен таро Йехова, си, кай традел амен те мислинас, кай на синям достойна те служинас е Йеховаске. (Притчи 24:10)
ТЕ КЕРАС ДАВКХА СО МАНГЕЛ О ДЕЛ
17. Соске шунас е Йеховас?
17 Кана шунас е Йеховас, докажинас, кай о Бенг си хохавно. Со ка помагинел аменге те овас послушна? И Библия пхенел: „Дехе е Йеховас, тере Девлес, те целоне илеса, те целоне вогиеса тай те целоне зоралипнаса.“ (Второзаконие 6:5) Аме шунас е Йеховас, соскето дехас лес. Кана амаро дехиба кариг о Йехова барьол, ка керас вогиестар всичко со мангел амендар. О апостол Йоан пишингяс: „Давкха означинел о дехиба кариг о Дел — те керас давкха со мангел амендар, а давкха со мангел амендар нанай пхаро.“ (1 Йоан 5:3)
18, 19. а) Саве букя пхенел о Йехова, кай си кханиле? б) Катар жанас, кай о Йехова на мангел амендар те керас варесо, ковато нащи те керас?
18 Кола си десаве букя, колато о Йехова пхенел аменге, кай си кханиле? Иси десаве примеря андо блоки „Мразине давкха со мразинел о Йехова“. Кана дикхес лен, ащи те мислинес, кай далкха букя нанай зомкха кханиле. Ама кана четинес о стиховя тари Библия тай внимателно мислинес упрал ленде, ка ахальовес кизом си мъдро те керес давкха со мангел о Дел. Може би ка ахальовес, кай требе те керес десаве променес тере животосте. Въпреки кай подекхана ащи те овел туке пхаро, ако керес далкха променес, ка овел тут о мири тай и лошали, колато анел о амалипе е Йеховаса. (Исаия 48:17, 18) Катар жанас, кай си възможно те керас далкха променес?
19 О Йехова нисар на мангел амендар варесо, ковато нащи те керас. (Второзаконие 30:11–14) Сар йекх истинско Амал, ов пенжарел амен по–лачшес амендар. Ов жанел состе синям силна тай состе синям слаба. (Псалм 103:14) О апостол Павел насърчинел амен: „О Дел си верно тай нанай те домукел те овен изкушиме по–бут, далкхестар кизом ащи те издържинен, даже кана авел о изкушение, ка сикавел туменге о дром те икльон лестар, за те ащи те издържинен.“ (1 Коринтяни 10:13) Ащи те овас сигурна, кай о Йехова винаги ка дел амен о зоралипе те керас давкха со си правилно. Ов ка дел тут „и сила, която си по–бари тари нормално“, за те помагинел туке, кана си туке пхаро. (2 Коринтяни 4:7) О Павлес дикхляс сар о Йехова помагингяс леске, кана сине леске пхаро, адалкхеске ащине те пхенел: „Всичконаске иси ман силес, благодарение далкхеске, ковато дел ман сила.“ (Филипяни 4:13)
СИКЛЬОВ ТЕ ДЕХЕС ДАВКХА СО ДЕХЕЛ О ДЕЛ
20. Саве качества требе те сикавес тай соске?
20 Ако мангас те овас е Йеховаскере амала, ма само требе те спиринас те керас о букя, колато о Йехова пхенел, кай си кханиле, а требе те керас по–бут далкхестар. (Римляни 12:9) Е Девлескере амала дехен давкха со дехел ов. Андо Псалм 15:1–5 пишинел саве си е Девлескере амала. (Четине.) Он сикавен качества сар лескере, сарто „дехиба, лошали, мири, дълготърпение, милост, лачшипе, вяра, мекота, самоконтрол“. (Галатяни 5:22, 23)
21. Сар ащи те сикльос те сикавес о качества, колато дехел о Дел?
21 Сар те сикльос те сикавес далкха шукар качества? Требе те ахальовес давкха со дехел о Йехова, като четинес тай изучинес редовно и Библия. (Исаия 30:20, 21) Кана керес давкха, то дехиба кариг о Йехова ка барьол, а кана ачшол давкха, ка мангес те овес леске послушно.
22. Саво ка овел о резултати, ако шунес е Йеховас?
22 О променес, колато може би ка требе те керес тере животосте, си все едно те нангьовес о пуране шехя тай те урявес неве. И Библия пхенел, кай требе те нангьовес „и пурани личност“ тай те урявес „и неви личност“. (Колосяни 3:9, 10) Даже те на овел локо, кана керас далкха променес тай шунас е Йеховас, ов обещинел те дел амен „бари награда“. (Псалм 19:11) Избирине те шунес е Йеховас тай чука те докажинес, кай о Бенг си хохавно. Служине е Йеховаске, ма соскето ка дел тут награда андо бъдеще, а дехимнастар. Тогава ка овес е Йеховаскоро истинско амал!
a Давкха на означинел, кай е Бенгес иси влияние упрал о мануша, колато дикхен те спиринен тут те изучинес и Библия. Ама ов си „о дел далкхе светоскоро” тай „о цело светос си е Кханилеске андо васта“. Адалкхеске нанай чудно, кана десаве мануша дикхен те спиринен амен те служинас е Йеховаске. (2 Коринтяни 4:4; 1 Йоан 5:19)