09 УРОКИ
И молитва ка помагинел туке те овес амал е Девлеса
Дали подекхана мангес декхой те помагинел туке, ако на жанес со те керес? Мангес ли помощ, кана иси тут проблемя? Мангес ли декхой те утешинел тай те успокоинел тут? Мангес ли те ачшовес по-близко е Йеховаса? И молитва ащи те помагинел туке саворе калке букиенге. Ама сар те молинес тут? Шунел ли о Дел саворе молитвес? Со ащи те керес, за те овес сигурно, кай ов ка шунел тере молитвес? Нека те дикхас.
1. Каске требе те молинас амен тай саве букиенге ащи те молинас амен?
О Исусес сикавгяс, кай требе те молинас амен само амаре небесноне Дадеске. О Исусес молинелас пес е Йеховаске. Ов пхенгяс, кана молинас амен те пхенас: „Амаро Дад, ковато синян андо небес...“ (Матей 6:9) Кана молинас амен е Йеховаске, барярас амаро амалипе леса.
Ащи те молинас амен е Девлеске всичконаске. Ама за те отговоринел о Дел амаре молитвенге, требе те молинас амен букиенге, колато си леске угодна. „Со-да те мангас според лескери воля, ов шунел амен.“ (1 Йоан 5:14) О Исусес пхенгяс саве си десаве букя, коленге ащи те молинас амен. (Четине Матей 6:9-13.) Ащи те молинас амен е букиенге, коленге хас холи, ама на требе те бистерас те благодаринас-да е Девлеске всичконаске со керел аменге тай те молинас лес те помагинел околенге.
2. Сар те молинас амен?
И Библия пхенел аменге те „чшорас амаро сърцес“ англал о Дел. (Псалм 62:8) Калка думес сикавен аменге, кай амаре молитвес требе те овен вогиестар. Ащи те молинас амен на глас или наум. Кана молинас амен, нанай значение дали синям кочиенде, дали бешас или синям упрал пхиренде, ама най-важно си те сикавас уважение кариг о Йехова. Ащи те молинас амен, кате-да те овас тай кана-да те овел, презал о диес или презал и рат.
3. Сар о Дел отговоринел амаре молитвенге?
О Йехова използвинел различна букя, за те отговоринел амаре молитвенге. Ов диняс амен по Слово, и Библия, за те ащи те ахальовас о отговоря амаре въпросиенге. Е Девлескоро Слово „керел гогявер калкес, ковато на жанел бут“. (Псалм 19:7; четине Яков 1:5) О Йехова ащи те помагинел аменге те овас спокойна, кана иси амен проблемя. Ов ащи те традел пе служителен те помагинен аменге, кана наистина требел аменге помощ.
РОДЕ ПО-ХОРЕСТЕ
Дикх сар те молинес тут вогиестар, за те приеминел о Дел тере молитвес, тай ахальов сар и молитва ащи те помагинел туке.
4. Со те керас, за те шунел о Дел амаре молитвес?
Саве букя си важна, за те шунел о Дел амаре молитвес? Дикхен о КЛИПИ.
О Йехова мангел те молинас амен леске. Четинен Псалм 65:2 тай хоратинен калке въпросиенге:
Мислинес ли, кай о Дел, „ковато шунел о молитвес“, мангел ту-да те молинес тут леске? Соске?
Ако мангас о Дел те шунел амаре молитвес, требе те дас всичко амендар, за те живинас, сарто ов мангел. Четинен Михей 3:4 тай 1 Петър 3:12 тай хоратинен калке въпросиеске:
Соске ащи те овас сигурна, кай о Йехова ка шунел амаре молитвес?
Кана ачшол война, секо йекх таро народовя, колато ухкьон йекх мамуй авересте, ащи те молинен пес те побединен. Възможно ли си о Дел те отговоринел салке молитвенге?
5. Требе те молинас амен вогиестар
Бут мануша сине сикавде те пхенен йекх тай съща молитвес. Ама харешинен ли е Девлеске салка молитвес? Четинен Матей 6:7 тай хоратинен калке въпросиеске:
Сар те на пхенес „йекх тай съща думес секо дром“, кана молинес тут?
Секо диес ащи те мислинес со кергяс о Йехова туке тай после те благодаринес леске. Кер лес секо диес йекхе куркеске тай ко крайос ко курко ка овен ефта различна букя, коленге молисайлян.
Йекх лачшо дад мангел лескоро чшаво те пхенел леске по воги. О Йехова-да мангел те молинас амен леске вогиестар
6. И молитва си подаръки таро Дел
Сар и молитва ащи те керел амен зорале, особено кана си аменге пхаро? Дикхен о КЛИПИ.
И Библия пхенел, кай и молитва ащи те помагинел аменге те овас спокойна. Четинен Филипяни 4:6, 7 тай хоратинен калке въпросиенге:
Сар помагинел аменге и молитва, нищо кай нанай винаги те махнинел амаре проблемя?
Саве букиенге мангес те молинес тут?
Жанес ли?
И дума „амин“ означинел „нека те овел“ или „верно си“. Таро пуране диеса жи авдиес, ко крайос ко молитвес пхенел пес „амин“. (1 Летописи 16:36)
7. Ма бистер те молинес тут
Подекхана ащи те овен амен бут букя те керас тай те бистерас те молинас амен. Кизом сине важно е Исусеске те молинел пес? Четинен Матей 14:23 тай Марко 1:35 тай хоратинен калке въпросиенге:
Со кергяс о Исусес, за те овел лес време те молинел пес?
Ту кана ащи те молинес тут?
ДЕСАВЕ МАНУША ПХЕНЕН: „Нанай значение каске молинес тут, о Дел си йекх тай шунел саворе молитвес.“
Со мислинес ту?
СО СИКЛИЛЯМ
Кана молинас амен вогиестар, ачшовас по-близка е Девлеса. И молитва помагинел аменге те овас спокойна тай дел амен и сила, която требел аменге, за те керас о букя, колато мангел о Йехова.
О най-важна букя таро уроки
Каске требе те молинас амен?
Сар требе те молинас амен?
Сар помагинел аменге и молитва?
АХАЛЬОВ ПО-БУТ
Дикх десаве букя, колато бут мануша пучен е молитваке.
Седем често задавани въпроса относно молитвата („Стражева кула“ 1 октомври 2010)
Дикх соске си важно те молинес тут тай сар ащи те молитвес те ачшон са по-шукар.
Ахальов каске пхенел и Библия, кай требе те молинес тут.
Дикх таро музикално клипи дали иси значение кате тай кана молинас амен.